هم كبير على عاتقي

[مشكلتي]

السلام عليكم ورحمة الله اود منكم المساعدة والنصيحة المناسبة
اما بعد انا امراة متزوجة واهل زوجي يزعجونني كثيرا بكثرة التطبطيب عل الباب هذا داخل هذا خارج
نفتح الباب ستين الف خطرة فالنهار
الدوش تاعي داخل الشمبرة والله لولبارح خرجت من الدوش بعدما سمعتهم يطبطبو قلت بلاك كشما يحتاجو في الاخير لقيتهم جابولي حبة خفاف!
وساعات مايجي يرقد ابني حتى نتعب معاه مع الاخير تقربيعة وحدة فلباب ينوضوهلي
وساعات نكون مع راجلي يطبطبو علينا وفي الاخير هاكي تقاشر نشفو!
وساعات نبات سهرانة مع ولدي كي نحب فالنهار نرقد ينوضوني من النوم مع الاخير (عندك خيط اصفر؟)
وهكذا دواليك
طبطبطب .....هاكي حبة تشينة
طبطبطب.....عندك السينيال فتلفاز؟
طبطبطب.....هاكي زوج بيضات
طبطبطب......هاو التريكو تع ابنك نشف
طبطبطب......ارواحي تشوفي جا لي يبيع كذا
طبطبطب.......الطفل راه راقد؟
طبطبطب.....الطفل ريح شوي ولا مزال عيان؟
طبطبطب.....ارواحي تسخني معانا فلكوزينة لاه راكي قاعدة وحدك
طبطبطبطبطب خلاص هبلوني عقدوني .قلت لزوجي ديرلهم حد سورتو العجب تع انت معايا وهوما يقربعو علينا قالي منقدرش نقوللهم اهدري معاهم انتي
ضرك مفهمتش انا نهدر معاهم بلعقلية ولا بالتشناف ولا نحطلهم ورقة كيما قالتها وحدة ولا كيفاه ندير
ااتخيلو رواحكم في بلاصتي وقولولي واش تديرو يرحم بوكم الناس لي متفهمش روحها الله يقطعها من فوق لرض

[مصطفى_س]

السلام عليكم

اظن انك انسانة حساسة نوعا ما يعني تتحسسين من الازعاج و بالاخص ازعاجات اهل زوجك
ماذا لو رزقك الله خمسة اولاد و كانوا اكثر ازعاجا ؟هذا يريذ الاكل والاخر يريد النوم و الاخر اتسخت ملابسه و الاخرى
تريد ان تلعب و ..... هل ستجيبين انهم اولادك ؟ و لا يزعجونني ؟ لا بل الاطفال يزعجون كثيرا حتى و ان كانوا ابناءك
و يجب ان تتعلمي الصبر
هنا اسالي نفسك هل ستفقدين اعصابك ؟هل ستخرجين من المنزل ؟ هل ستضربين كل من جاء في طريقك ؟
توجد نساء والله لا يجدن الوقت لحك شعرهن من كثرة الاشغال في البيت و تربية الاولاد و الصبر الصبر على ازعاجاتهم

الازعاجات التي ذكرتها انا عن نفسي لا اعتبرها ازعاجات بل هي مجرد اهتمام و بعض التساؤلات
تفضلي حبة برتقال هذا من كرمهم
تفضلي جوارب ابنك او زوجك هذا من كرمهم
هل الولد بخير هذا من كرمهم
تفضلي بيضتان هذا من كرمهم
هل نام الطفل ؟ ممكن يريدون اللعب مع الولد و يحبونه
تعالي للمطبخ لكي تشعري بالدفئ هذا من كرمهم
هل عندك خيط اصفر هنا طلبوا المساعدة
هذه عفوية فقط لا غير

اظن ايضا انك تغلقين باب الغرفة دائما و لا يفتح ابدا و اعتقد ايضا ان زواجك حديث
صحيح لك خصوصياتك في المنزل و لا يسمح للغير الدخول الى الغرفة لانها غرفة النوم
لكن قد يكون غلق الباب دائما هو احد الاسباب

معاملة اهل زوجك لك معاملة جيدة و كثير من النساء تتمنىاه و لكن لا افراط و لا تفريط
حاولي معالجة المشكلة بان تتركي الباب مفتوح احيانا و تغلقيه احيانا اخرى عند الحاجة
حاولي ان تكوني اجتماعية مع اهل زوجك بشرط ان لا تطيلي في الكلام او الجلوس
حاولي ان لا تكوني حساسة من افعالهم و تاخذيها بانها اهتمام و ليس ازعاج
اصبري اختاه ان فرج الله قريب يوما ما سترزقين ببيت انت واطفالك و تعيشين لوحدك
و تبقى علاقتك مع غيرك جيدة

لا انصحك باظهار الغضب على وجهك حتى و انت غاضبة
لا نصحك بادخال زوجك في مثل هذه الظروف

قد اظيف بعض الكلمات حين يتسنى لي الوقت لاحقا

[بشرئ عاشقة العلم]

شا بغي نقولك كبري قلبك و صاي ممكن مهمش يديرو فيها عن سوء نية مع انو علابالي بلي هذا ازعتج كبير و مهيش قاع طبيعة صراحة.... فهميك اي بالعقل بظروفك لي قلتيهم و ممكن يتفهموك و يحسو بالاحراج

[abder03]

السلام عليكم - مقانة بين طبطب و طبطب
طبطب ارواحي طبينا الاكل و اغسلي الملابس انه دورك اليوم او طبطب هاكي حبات من البرتقال
طبطب وعلاش تنشري في ملابسك في مككاننا او طبطب هاكي التقاشر نشفوا
طبطب وعلاش ماجتيش تقابلي ظيفنا راكي متكبر علينا او طبطب هاكي خفافة
طبطب امراة كيما انت حاسبه روحى الفوق انت متلزمناش و قلوا لراجلك يطلقك و جيب اخرى خير منك او طبطب رقد ولدك
الخلاصة: مصدر ازعاج افضل من مصدر مشاكل