ماذا لو تبادلنا الادوار

[كاميلا]

السلام عليكم
تخبلوا معي لو تبادلنا الادوار يعني مشكلة الحماة والكنة نستبدلها بالزوج والنسيب تخيلوا فقط يا رجال

لو انك ايها الزوج تتزوج تجد نسيبك او اب زوجتك حاكملك على الوحدة

-يتشرك عليك مثلا وعلى خلقتك
-يلوحلك المعاني المتضمنة التعايير
-يتعدى في اهلك
-منين تكون مع مرتك يشوف معاك بحنية وكي تنوض مرتك يخزر فيك كالقاتل
-يحبك تسكن معاه يتداخل في تربيتك لاولادك
-يمنشر فيك في كل بلاصة
-ممكن يسبك ويضربك
-يؤمر بنته بطلب الطلاق
-يتصرفلك في دارك
-يدي من مصروف دارك
-يدخل لغرفة نومك يدير فيها واش يحب
-كل يوم وهو في دارك
-يحبك تجيه تخدم عليه مثلا طيشله الزبل حاشاكم تاع داره وتسيقله الحمام
-يحبك متروحش لاهلك تنساهم
-كون يجي ويشوف اهلك عندك يقلب عليهم خلقته ويبدا يدير العيب
-يكذب عليك
-يفتن بينك وبين مرتك
-يتهمك في شرفك ويطلقك
-الخ الخ الخ الخ









راني قلتلكم تخيلوا معي فقط الحالة هاذي لو تحطيتوا فيها واعود واكرر تخيلوا خذا ولو لمدة دقائق وقولونا ماذا ستكون ردة فعلكم بدون مثاليات


وشكرا :d

[اياد حياتي]

سأقول لك انا اختي على الرغم طلبتي هذا من الرجل حتى وان كان نسيب عاقل وما يديرش هذا وتصيبو كارهو معلاباليش علاه الزوج ماشي الكل ميحملوش نسابهم باباك هكا امك هكا ......................

[امونة14]

يعطيك الصحة كاميلا هاذا موضوع مهم لكل رجل يجاوب عليه

[كاميلا]

لكن واحد مجاوب حب يقول ماناش في بلاصتكم حتى هادي وميحبوش يديروها رجال الجزاير خخخ

[سحابة مسافرة]

يكون مليح معاه و متهلين فيه كي يجيهم يفرحو بيه و تلقايه و الله ميحب فيهم شعرة ...خلي يا يديرولو هكا
اين انتم يا رجال جاوبوا نشوفو القدرة نتاعكم

[toulay]

سلام عليكم
ردة فعلي هي REBELLION قالك اذا زاد الشيء عن حده انقلب الى ضده
مين يشوفو العبد ساكت وميهدرش يحبو يستغلو الفرصة مالا من الاول الصرامة باش كل واحد يبقى في حدو
البنت راحت تعيش مهنية ولا راحت الى une caserne والكلام السيء راهو une violence verbale
العين بالعين والسن بالسن والبادي اظلم
شكرا

[إسلام الفاروق]

مرتي هي دافع عليا اذا كانت ادوار متبادلة طبعا هههههههههه

[امونة14]

نتوما رجال تقولو ربي وصانا على والدين يعني والدين زوج وزوجة نتوما حاسبين غير والدين زوج هوما والدين اما والدين زوجة مشي والدين
يعني زوجة تستحمل ذل والديك ليها ونتوما لوكان يوصوك برك على بنتهم تقولو راهم يدخلو في خوصوصياتي
قال الله تعالى \ولهن مثل الذي عليهن بالمعروف\

[عثمان الجزائري.]

القضية سهلة جدا إذا تغيرت الأدوار......النتيجة: أجعله أب لطليقة و تنتهي المعاناة...
الحل سهل و بسيط و يقضي على كل الجراثيم....

[nihal159]

المشاركة الأصلية كتبت بواسطة عثمان الجزائري.

القضية سهلة جدا إذا تغيرت الأدوار......النتيجة: أجعله أب لطليقة و تنتهي المعاناة...
الحل سهل و بسيط و يقضي على كل الجراثيم....

يعني راك تشوف بلي حل المشاكل العائلية يكمن في الطلاق؟؟؟؟؟؟؟؟ يعطيك الصحة.

[عثمان الجزائري.]

المشاركة الأصلية كتبت بواسطة nihal159

يعني راك تشوف بلي حل المشاكل العائلية يكمن في الطلاق؟؟؟؟؟؟؟؟ يعطيك الصحة.

لا أبدا أختاه، المشكل أختي يكون في البداية قبل الخطبة أصلا، فاللازم على الطرفين السؤال عن العائلة كيفية العيش قبل الدخول في متاهات، مثلا من ترى أنها لا يمكن بأي حال تحمل العجوز فلها أن تطلب بيتا مستقل فهو من حقوقها الشرعية,,.,

[القائدة]

شوفي بلا ما نتخيلو العكس دايما رانا شايفين كيفاش أن الزوجة تجتهد باش تكسب و ترضي أهل زوجها في المقاااابل نجد الزوج يتكسل على اهل مرتو و لا يهتم .
مثلا تجدين الزوج لا يحب نسيبتو حماتو و دائما يشتكي منها !
و الزوجة إذا اشتكت من امه يقيم الدنيا ولا يقعدها!
فهو يحب أن تكون زوجته كي القطة مع أمه و خاوتو أما هو لا يفعل مع اهلها نفس ما يطلبه منها !
في حين أن محاسنة أهل الزوجة واجبة على الزوج
فقط اطلب من هؤلاء الأزواج شيء واحد و هو :
اذا انت تطالب بأن تنادي زوجتك لأمك بكلمة : أمي
فبادر انت كذلك بمناداة نسيبتك ب : أمي
و انحلت .

[~أمة الله~]

عليكم السلام ورحمة الله وبركاته
قضية العصر والله المستعان، عِندما أقرأ عن مُعضلة الحماة والكنّة يضيق صدري والله المستعان..
واللهِ أختي القِياس بين الحماة والنسيب، قِياس غير صحيح والله أعلم لوجود فوارِق عديدة...
مرّة سمعت في مُحاضرة أو درس كلمة علقت في ذهني وأظنّها توضّح قليلا وعلاش الدّرك على المرأة في هذا الأمر، أنّ الرّجل أصلّه السّعي للرّزق والعمل خارِج البيت فهذا هُو المكان الذي يقضي فيه مُعظم وقتِه فتناسَب أن يكون ابتلاؤُه في هذه الدّنيا مِن هذا الجِنس، يعني يُبتلى في العمل، في هذه الأمور,,,
والمرأة مكانها داخِل البيت، فابتِلاؤُها أن يُنغِّص عليها أحدهم داخِل مملكتها...
المُهم في الأخير، الإنسان يحاول يُسدّد ويُقارِب فالنّاس فيهم الجيّد والسّيء -الكنّات والحماوات - كلّ واحد يستحمل خوه ويتحلّي بِكثير مِن الصّبر ويكثر مِن الدّعاء أن يُعينه الله...إلى أن تمضي الأيّام...
وآسفة على التدخّل أختي بِما أنّ السؤال مُوَجَّه للرِجال...
فتح الله عليكِ....

[elhosseyn3483]

اريد ان اسالك عن معاملة امك لزوجة اخيك
فكري بحكمة
ولا تشوهي صورة الحماة
لان بعض الكناة يفعلن اي شيء من اجل الهروب من منزل الكبير
والتفريق بين الزوج واهله
الحمد لله على زوجتي الصالحة وامي (التي لا تصفها اي كلمة)
بالرغم من ان الاثنين متفاهمين عليا بصح نحبهم

انا استعين بنسيبتي على زوجتي
وزوجتي تستعين بامي علي

[alhor72]

أجيب بكل موضوعية فأنا لن أقبل أي شخص يتدخل في أموري الشخصية وخاصة الزوجية وإذا تدخل نسيبي في أموري الخاصة طبعا سيكون لي موقفا من هذا أما بالنسبة للوالدين فمهما فعلوا بنا وتدخلوا في حياتنا الخاصة فإننا من باب بر الوالدين نصبر على كل ما يفعلونه تجاهنا أو تجاه زوجاتنا طاعة لله ثم لهم من باب التقرب إلى الله رغم أن القلب منزعج من ذلك وفيما يخص سؤالك في تبادل الأدوار أسألك سؤال : ماذا تحس الزوجة عندما تكون العلاقة بين زوجها وووالديها متوترة وسيئة للغاية ؟ ألا تحس مثل الزوج تماما لما تكون علاقة زوجته سيئة مع والديه ؟ أظن أن الأمر نفسه والله أعلم