كيفاش تنظمي وقتك كأم جديدة??

[oprah]

السلام عليكم
كام جديدة و كثيرات مثلي يلقاو صعوبه في ممارسة الحياة بعد مجيئ المولود الجديد
وقتاش تنوضو و كيفاش تقسمو اعمال البيت و هل تلقاي وقت باش تهتمي بروحك?

كيفاش تلهي وليدك باش يخليك تخدمي شغلك خاصه ادا كان 3 اشهر و قليل النوم?
تقضي و تخليه راقد? متخافيش يشرقلك §
تفضلي راجلك كي يجي يعاونك ولا تدبري راسك و كي يجي لازم كلش يكون مسقم?
نتمنى نستفادو مع بعض و نعرفو كيفاش نظمو وقتنا
والاكل تليكيدي وخلاص ولا تطبخي الفطور و العشا?
مازال مجربت العيشه هادي لانو بحكم المرض مازالني في دارنا و حايره كيفاش رايحه ندير كي نروح لداري
ممكن كل وحده تدخل متبخلش على خياتها لي راهم لاصقين كيفي و تحكيلنا بالتفصيل كيفاش تفوت نهارها ملي تنوض حتى ترقد و تقولنا عمر البيبي
نرجو المساعدة:s df:

[سيرين 5]

أنتظر الردود لأني حامل و نخدم و مانيش عارفة كيفاش راح نقدر نوفق بين الخدمة و الدار و البيبي الجديد لي راه جاي بإذن الله ؟؟؟؟

[Simassim]

اختي اول شي لازم تكوني صبورة. النوم لوقت متاخر ودعيييييييه انا تاني راه عندي ولد عمره عامين من اول يوم قليل فرقاد وزيد راه لحق عليه خوه قد ماتجري الوقت يكمل والشقا مايخلاصش.
انت حاولي تنظيم روحك بروحك. ولدك مين يكون راقد اقضي صوالح تاع الدار ولنفس الوقت مالازمش تخربي الحالة اي حاجة تجبديها رجعيهم في بلاصتها هكدا تنقص عليك الخدمة
انا كنت نبدأ بلافطور هو الاول. عالاقل الراجل يصيب واش يأكل. والميناج نمسح كل مرة. عندي غي الحمام لي لازم كل يوم ينغسل. مرات نبدأ بيه قبل مانتقهوا الصباح
وصوالح القهوة تاع الصباح ونوجدهم فالليل
الاكل انت لازم تكوني ذكية لما تطيبي تختاري الاكل لي يساعدك فالوقت وممكن تخدمي بالزيادة وتخلي فالمجمد متلا الصوص تومات او مرات نخدم مرق باللحم والحمص. نكتر اليوم نزيد معاه جلبان ونص نخليه للغد ندير بيه روز او نقلي معاه بطاطا. وندير الميناج تاع الدار
راجلك ادا عاونك ماشي عيب يمكن يحط معاك الاكل او يجمع الماعن او عالاقل. قوليلهوا يجمع غي صوالحه ومايخليهمش مخطوطين في كل مكان

بالنسبة للطفل من يكون راقد ماراحش تقعدي واقفة حداه. ماراح لايشرق لايجيف انت المهم ماتخليش بالقرب منه الأشياء لي يمكن تسبب الاختناق متل الالعاب او الغطاء

[Basketteuse]

انا للدرك ماقدرتش نرجع للريجيم المعتاد، بنتي اليوم قفلت 3 اشهر، وميعادها ماترقدش خلاص في النهار نتعب بزااف، وتزيد تنوض في الليل ترضع ، نصبح دايخة حتى للعشرة باه نوض، هي بالطبع تكون نايضة معايا لانها تشرب رادبول !!
نغسل لوليدي وتفطر انا وياه ومن بعد نروح نغسلها ونرضعها، ونحطها لاشتا تبكي لاني كون نتبعها ماندير والو !!!
اكثر الاحيان نليكيدي حاجة خفيفة لانو يكون راح الحال،! ومع الشغل تاع الدار اللي يكون يسنى فيا . نبقى بين وبين حتى نكمل ونطيح كاو
وساعات نخلي كلش ياكلو الفرماج، خطراكش مع بنتي ماترقدش خلاص في النهار تعبت نفسيا وانهارت أعصابي ، نستنى تكبر شوي ونبدأ نوكلها وان شاء الله نرجع لحياتي الطبيعية
نقولك امر علابالي وليدك مايرقدش راح تتعبي بزاااف، بصح ادا عندك الوسع في الدار ، خلي الدرسة تاعو في بلاصة وحدة باه تبقى الدار نظيفة وماتضطريش تعاوديها كل يوم مثلي
والاكل لازم الراجل يعاون شوي ، ويوسع بالو حتى يتعدلو الاحوال ،ان شاء الله

[ome jade]

كام جديدة الوقت مراحش يتنظم لانك مراحش انتي تتحكمي فيه البيبي الصغير هو لرح يتحكم في وقتك يعني الاناض تقعدي معاه واذا بكي تسكتيه واذا جاع ترضعيه وهذا كامل علي حسابك وحساب البيت انا الان ام لثاني مرة وبنتي عندها شهرين ونصف ومزال محكمتش روحو نوض دايخا وكي نرقد ميتا وخلاص قالك ما يكبر حتي يشيب راس

[سارة حبيبة زوجها]

نتمنى الاخوات يفيدونا بتجاربهم
نبدا بروحي ابني عندو 4 اشهر ينوض صباح نغسله ونرضعه و نحطه نبدا بالفطور الله غالب راجلي ما يبغيش البايت ونكون خممت فالليل واش ندير باش ما نظلش ندور فالكوزينة والا بكى نطل عليه ونولي لشغلي ما يليقش نولفه قدامه 24 ساعة
ندير الفطور وندير القش فالماشينة ينغسل - القش ماشي كل يوم نغسل - ونسيق الدار ومن بعد نقابل ولدي حتى للعشية مين يدخل راجلي للدار نخليه يقابل الصغير نقوله ولدك توحشك العب معاه
وندير العشا ونغسل الماعن ونقي الكوزينة كامل ونوجد القهوة لغدوا الشغل الكبير نديره فهاد الوقت نستغل مين يكون باباه معاه
ولدي ما يرقدش بكري نقيه ونرضعه ونخليه يلعب وانا في نفس الوقت راني نرتب فغرفة باش غدوا نلقاها نقية
راجلي نقوله ما تعاونيش فشغل الدار قابل الولد برك تهنيني
ومين يكون ولدي راقد نهتم بروحي ولا ندير شغل ومرة على مرة نطل عليه
واهم حاجة مين يرقد ولدي نديرله سورة البقرة منها يسمعها هو وانا تعطيني نشاط كبير سبحان الله