تطبيقات دورة اوت 2016

[mariamalak]

السلام عليكم
اقترح عليكم وضع تطبيقاتكم هنا حتى لا تختلط علينا الصفحات
و تبقى صفحة الاخت حبيبة لطرح الاقتراحات

نأتي الى البرنامج الذي سنستمتع بتطبيقه رفقة بعض
باذن الله
سينقسم الى عدة مجالات كالعادة
الدين و الصحة و الثقافة و الطبخ و العناية الشخصية
و ينقسم الى برنامج يومي و آخر اسبوعي و آخر شهري

نبدأ على بركة الله بالبرنامج اليومي

صبـاحا

(أرجوأن نحدد مع بعض الساعة التي نبدأ فيها أشغالنا مع بعض):

 صلاة الفجر + الدعاء + أذكار الصباح+ قراءة ورد من القرآن + صلاة الضحى
 ترتيب الأسرة
 تنظيف الحمام
 خلطة للوجه او الجسم او الشعر
 غسل غسلة واحدة من الملابس
 طبخ الغذاء + ]]العشاء + تجهيز صينية قهوة المساء(ان أمكن)[[
 غسل الأواني + تنظيف البوتاجي و طاولة الأكل و الفرن
 ترتيب الصالة
 كنس الغرف ]مسحها[ + مسح المطبخ

مســاءا 18h00:

 30د ممارسة الرياضة (وقتها اختياري ما بين الصباح او المساء)
 أذكار المساء
 تحضير العشاء + ]غذاء يوم الغد (ان امكن)[
 نشر الملابس + تطبيق و ترتيب الجافة
 غسل الأواني + تنظيف المطبخ + مسح الفرن
 تلميع حوض المطبخ
 تغيير فوط المطبخ (فوط الأكل)
 10 د جمع الفوضى من الصالة
 تحضير ما يلزم ليوم الغد
 رمي القمامة
 كنس/أو مسح ارضية المطبخ
 قراءة كتاب
(بالنسبة لموضوع الكتاب سنتفق عليه كل بداية أسبوع و تبحث وتختار كل واحدة منا الكتاب الذي تريد قراءته في هذا الموضوع ثم آخر الأسبوع تكتب كل مشتركة تلخيصا وافيا عن كتابها الذي قرأته فنتبادل الخبرات و الفائدة)

هذا البرنامج اليومي الثابت الذي سنقوم به يوميا مع بعض

و التالي هو البرنامج الأسبوعي

الاثنين:

تنظيف يومي + البرنامج اليومي الديني من صلاة و أذكار و قراءة قرآن و دعاء + الصيام + ماسك لتنظيف و تصفية الوجه + تجربة وصفة حلوى جديدة و مشاركتنا بها + مشاركتنا بالتقرير عن الكتاب الذي تم قراءته

الثلاثاء:

تنظيف يومي + البرنامج اليومي الديني من صلاة و أذكار و قراءة قرآن و دعاء + سماع محاضرة و مشاركتنا بنقاطها الأساسية المفيدة + ماسك لتغذية و اصلاح الشعر التالف

الاربعاء:
تنظيف يومي + البرنامج الديني اليومي + قراءة حديث نبوي مع فهمه و مشاركتنا به + اعطاؤنا فكرة جديدة لتنمية قدرات الاطفال و امتاعهم

الخميس:

تنظيف يومي + البرنامج الديني اليومي + الصيام + خلطة لتصفية و توحيد لون الجسم+ حمام مغربي لتقشير بشرة الجسم + اعطاؤنا فكرة جديدة لتحسين العلاقة الزوجية و اخراجها من الروتين

الجمعة:

تنظيف يومي + البرنامج الديني اليومي + قراءة سورة الكهف + الاستمتاع رفقة العائلة و اقامة الزيارات لصلة الرحم

السبت:

تنظيف يومي + البرنامج الديني اليومي + تجربة
وصفة طبخة صحية جديدة و مشاركتنا بها + الاستمتاع رفقة العائلة و
اقامة الزيارات لصلة الرحم

الاحد:

تنظيف يومي + تنظيف اسبوعي لكل اركان البيت+ البرنامج
الديني اليومي
((بالنسبة للعاملات يمكن أن تقمن بالبرنامج التنظيفي الاسبوعي يوم السبت))


البرنامج التنظيفي الأسبوعي :

((الذي سيكون يوم الأحد بعد عطلة نهاية الاسبوع و رجوع الزوج للعمل))

 تغيير ملاءات الاسرة + غسل الافرشة
 مسح الغبار في كل الغرف
 مسح النوافذ في كل الغرف
 تنظيف الثلاجة و اعادى ترتيبها + الميكروويف + مسح كل مرافق المطبخ
 تنظيف الحوش عميقا + مدخل البيت
 تنظيف ارضيات البيت كله بالمنظفات عميقا
 تنظيف المغسلة و التواليت (أعزكم الله بالمبيضات) + جدران الدوش + المرآت + تغيير المناديل

[لحن الحياة.]

صبااااااااااااااااااااااااااااح الخير للجمييييييييييييييييييييييع

انا عندي مشكلة النواض بكري والسهر كثيييييييييييرامانوضتش بكري اليوم بصح نحاول مناو جاي نوض
مادرتش الاذكار لاني كنت مزرووووووووبة صليت وبديت ديراكت فشغل
نظفت المنزل غسلت اواني القهوة وجدت الحنة لشعري نديرها بعد الظهر ما نقدرش نطبق وصفة حلوى لان جدتي جاتنا هذاوين امي راح ديرلها الغداء
وانا راح نتصفح شوي انترنات
ثم نستغل الفراغ في تنظيم الخزانة و مسح الابواب (ومقابض الابواب )بالجافيل و نلمع الحمام و المرحاض (اكرمكم الله )
لاني ما نقدرش نرقد فالقيلولة نحب نستغلها في اعمال التظيف لي منلقالهاش وقت صباح وفي المساء

[omelbanin]

السلام عليكم، واش راكم انشالله تكونو بالف خير.
تقريري للفترة الصباحية :
نضت اليوم على 6 (صلاة الفجر، العذر الشرعي) اذكااار الصباح ، غسلت وجهي بغسول للوجه [IMG][/IMG]

طيبت القهوة،واستقهويت، اول حاجة درت الملابس في الغسالة، نضفت المرحاض والدوش،

ناضو الأولاد والزوج. سرجت الغرف. ورحت للمطبخ. شرا الزوج السردين، نقيتو وغسلتو ودرتو في الثلاجة،

غسلت الاواني، سيقت الهول والكوزينة، والبيوت مسحتهم برك.
نشرت الغسيل.
وطيبت الفطوووور. سردين مقلي وسلطة. فطرنا وغسلت الاواني ومسحت كلش بالجافيل باش ما تبقاش رائحة السردين.
والان راني رايحة ندوش، وندير ماسك لوجهي تاعالسدر وماء الورد. سلاااااااام.

[حياتي كلها امل]

تقريري لهذه الصبيحة الصلاة والاذكار وصلاة الضحى تم والحمد لله
غسل الاواني مسح الفرن والبوتاجي وغسل الحمام تم
ترتيب الغرفة والصالة مسح الكولواغ والمطبخ تم والحمد لله
طبخ الفطور وغسل الاواني تم والحمد لله
الماسك للوجه انا راح نستعمل ماسك من colballe تاع الطفل
حلوة ماعنديش اللوازم اليوم لكن راح نحاول نلتزم بيه
كتاب انا نحب المطالعة نحاولة نتفقو على كتاب معين
الى المساء بحول الله سلام

[mariamalak]

السلام عليكم
نضت صليت و قريت وردي من رمضان ما قريتش و ناضت بنتى رضعتها رقدت عاودت رقدت نضت على 7 و نص درت الحليب لبنتى ووجدت بلاتو ليا فيه قهوة و خبز بالمارغرين و عصير و ياغورت و شفت الاخبار و نضت لكوزينتى غسلت الماعين و نضفت الكراسي و الطاولة و ناضو بناتى درتلهم الحليب فطرو و درتلهم ورقة واش يديرو اليوم خملو غرفهم و الصالون و جمعو الالعاب و انا شعلت الماشينة تاع القش و درت الفطور معكرونة بلاكرام فراش و العشاء طاجين زيتون و زدت رونت ليكراب باش نطيبهم للقوتى و درتلهم لي بوب كورن
رجعت غديتهم و قلتلهم يديرو نصف ساعة تمارين فى كتاب خاص بالعطلة كنت شريتولهم و انا غسلت الماعين و سيقت الكوزينة و الكولوار و الدوش و نشرت الكسوة
رقدت بناتى الصغار و صليت الظهر و درت حمام بخار لوجهى نحيت النقاط السوداء و درت ماسك قارنيي و جيت نرقددددددد هههه
كى نوض ان شاء الله نطيب ليكراب ياكلو و نلم الكسوة ايلا نشفت و نخرجهم للبارك يلعبو

[فراشات العمر]

والسلام عليكم
النوم منتصف الليل والنهوض علا الثالث رائد عندو سخانة بردتو بالما ودرتلو سيبو من بعد طيبت لحليب ونوضت زوجي للسحور من بعد صليت صلاتي وقرئت ورد نام رائد ورقدت قدامو حتى لسبعة ونص نوضت منتصر يفطر ويروح للمسجد يقرى القرءان من بعد لميت غرفتي وفطرت معتصم تكاسلت في الاول من بعد رفدت لفراش وكنست ثم جاني الفحولة سيقت كامل الدار وغسلت كوات كبيرة وتابي من بعد درت غدا لبيت شيخي شليطة وغديت ولادي ثم كملت تسياق وخليت ولادي يلعبو بالما رجعولي الدار تقطر ضرك نوض ليهم
باي باي بعد حين

[لحن الحياة.]

راني دايرة الحنة لشوشتي خخخخخخخخخخخخخخخخخخخخخخخخخخخ تقول زومبي

[طالبة الجامعة]

السلام عليكم نضت على الساعة السادسة صليت واستغفرت وبعدها طيبت قهوةحليب وقعدت مع النت وعلى السابعة والنصف خدمت شغلي على التاسعة دوشت وودنا تلفطور والان راني نخدم في نابرون بالكروشي

[hanamohamed]

 صلاة الفجر + الدعاء + أذكار الصباح+ قراءة ورد من القرآن + صلاة الضحى تمت ( متاخرة 6 صباحا )
 ترتيب الأسرة تم
 تنظيف الحمام تم
 الرياضة درت 30 د 2 ميل
خلطة للوجه تم (درت ماسك تاع الحليب الفاسد مع الملح )
دوشت بعد الريلضة والماسك
غسل الملابس ونشرتها تم
 طبخ الغذاء تم
 غسل الأواني + تنظيف البوتاجي و طاولة الأكل و الفرن تم
 ترتيب الصالة تم
 كنس الغرف ]مسحها[ + مسح المطبخ تم

[صبرا13]

السلام عليكم و رحمة الله و بركاته
لست اذا كنت سأنظم للبرنامج لانه بالاضافة لتنضيف البيت لدي الكثير من المسؤليات الاخرى، و لكن لدي سؤال انا أقرا كلمة فراشات، هل هذا تطبيق لطريقة flyladie الامريكية؟

[لحن الحياة.]

تمارين السكوات راح نخليهم لليل لانهم يتطلبو اكل

[غزالة1]

السلام عليكم
اليوم لم التزم جيدا بالبرنامج لانو عدت الى بيتي من يومين فقط فانا في مرحلة تنظيم
نهضت صليت الصبح
قرات ورد من القران 5 صفحات و الاذكار
نظفت الاواني و حضرت قهوة الصباح لكن كل واحد ينهض في وقت كل مرة ماما الحليب
فرزت على الخفيف
غسلت ملابس بيدي لانو لا تصلح في الغسالة
وضعت الغذاء كان عندي من امس
اخذت غفوة
قهوة المسائ

الان راني تعبانة راح نحضر العشاء
سلام

[ام متين]

تقرير اليوم بما اني اطلعت على الدورة غير في هذا اليوم لاني كنت مسافرة وبحكم التعب بعد السفر لم التزم بكل شيئ
النهوض اليوم متاخرة شوية 7.30 بعد تحضير القهوة وذهاب الزوج للعمل قعدت امام التلفاز لان الكل راقدين ومن بعد بديت بالعمل لكن دون ترتيب اوتنظيم من بعد اطلعت على النت وشفت الدورة ماقدرتش نقراها كامل وتشجعت وبديت رتبت الغرفة نتاعي وانتقلت للمطبخ بليت الدقيق باه نعمل محاجب
دوزنت المحاجب وصوص الشخوخة للعشاء وغسلت ماعن لفطور من بعد عجنت العجينة وطيبت المحاجب وفطرت انا والاولاد
من بعد كملت طيبت الشخشوخة وغسلت الماعن وسيقت الكوزينة
دوشت وصليت الظهر وريحت شوية
من بعد نضت نحضر مسكوتة للقهوة لقيت ولدي لكبير استعمل البيض الي رايحة نعمل بيه وليت طيبت قهوة لي والاولاد حليت مع مسمن
غسلت الماعن وفرزت حقيبة السفر وكنت ناوية نسيق البيوت كامل لكن الزوج رجع من العمل فاجلت ذلك للغد ان شاء الله
شرب قهوة وبقينا نقراو في الجرائد من بعد صلاة المغرب تعشينا وجيت نطل عليكم و راني رايحة نغسل الماعن ونرتب الكوزينة حتى ياذن العشاء ونصلي
نحاول نلتزم بالبرنامج من الغد ان شاء الله تصبحن على الف خير

[مواطنة جزائرية]

مساءكم فل وورد مساء الصحة و العافية
أنا كيما قلت من قبل أنا كارية منزل نعيش فيه مع زوجي و ابني و من مدة بدات مضايقات من صاحب المنزل باه يرفعلنا في سعر الكراء لذلك فضلنا نغيرو السكن و من هذيك المدة و أنا في إحباط تام و الفوضى ما تتخيلوش و كي سمعت البارح بالدورة فرحت و سجلت و الله قريت بعض من تطبيقات الاخت حبيبة ربي يخفظها اتغيرت النفسية و الحمد لله المهم مضن اليوم على 8:00 صباحا (عذر شرعي) مديت نص ساعة لروحي درت كريم و مكياج خفيف و سرحت من القدام برك هههههه و لبست احسن بيجامة عتدي و طيبت فطور الصباح فطرت و الحمد لله و هذه مدة و انا مهملو هذو الحوايج من باعد قمت بوليدي و بدأت المعركة هههههههه بديت الستائر وضعتهم في الغسالة و فرغت الصالون و سيقته ومن ذاك بدت نحط فيه كامل الحوايج اللي نظفتهم و جدتهم للرحلة كيما المطارح و الفاليزات اللي فيهم القش و الزور وليكوات و البساطات و رحت لشمبرت وليديي فرغتها لميت الالعاب و قاع لي قارنيتير بعد ما نظفتهم في كراطن و نقلتهم للصالون و سيقت الشامبرا و مسحت الغبرا و عاودت رجعت للغسالة نشرت الستائر عاودت درتفيها قش لميتو بعد التنظيف و كي كملت تغدينا (الغدا هو عشاء البارح) غسلت الماعو ونظفت المطبخ و من باعد غسلت لي طابي و الى القيلولة و على الخامسة مساءا عجنت مطلوع و درت لوبيا بيضاء و نشرت الغسيل و دخلت الستائر طبقتهم و أاخيرا تعشينا و نظفت المطبخ و الحوض ورقدت وليدي والان ندير جولة في المنتدى و الكتاب حملت كتاب كيف تبني شخصية قوية وإيجابية ؟ للمؤلف فينكاتا أيار نقرا صفحات والى الغد تصبحون على خير و الله شمرا لكن يومي كان له طعم اخر بفضلكن شكرا


سامحوني لكان طولت عليكم و اذا ما التزمنش الظروف هي السبب

طابت ليلتكن

[omelbanin]

السلام عليكم، راني حملت كتاب كيف تطلق قواك الخفية، وراح نبدأ نقرا فيه.

تصبحون بالف خير.