مشكلتي

[مشكلتي]

لسلام عليكم
اريد رايكم في مشكلتي مع حماتي
المهم تشاجرنا انا وزوجي وضربني ..منبعد راح جاب امو ماعلاباليش علاش وكيفاه جاتو الفكرة هادي في راسو كنا قادرين نفريو المشكل وحدنا
وقتها كنت في حالة ونبكي وغاضتني روحي بزاف على مادرتش حاجة نستاهل عليها الضرب المهم هدرت معايا نورمال قالتلي علاش تقابدتو قلتلها والو قالتلي اهدريلي قلتلها والو المهم هو قالي قوليلها علاه قلتلو قوللها نتايا حتى لقيتها قالتلي يسمى ماعندي مادخلني كي ماحبيتيش تحكيلي قلتلها انا ما قلتلكش ماعندك مادخلك قلتلها او يحكيلك هو مالا ماسقساتوش وبقات تقولو انا امو ونتي ماحبيتيش كي جا عيط لمن يعيط مالا قلتلها انا كاش ماقلتلك ياخي انا قلتلو ليه احكيلها المهم هي اتهمتني باللي قصدت نقولها ماعندك مادخلك وانا والله ماهدرتها كنت نبكي لاني كليت طريحة
المهم هي راحت وهو خرج قعدت فالدار حتى منبعد جا وطلب مني السماح وتسامحنا نورمال
مالا انا قلتلو امك دخلناها معانا فالمعمعة وقلقناها روح جيبها نطلبوا منها السماح كي قلقناها معانا راح جابها قلتلها اسمحيلنا كي قلقناك المهم سلمت عليها 3 مرات وهو تاني وراحت لدارها

المهم فاتت لحكاية وبعد يامات جاو دارنا عندي يسكنو في ولاية اخرى بابا مسكين عندو عام مادخلش داري كان مريض بترولوا قدمو فالمستشفى كي رتاحلو الجرح جاء هو وماما وخواتاتي
المهم داري ودار شيخي لاصقين ....مالا شيخي جا لعندنا ياه يقابل والديا وراجلي راح لعند امو باه يجيبها ماحبتش قالتلو ماعندي علاه نجي
جا قالي اي راقدة وانا سمعت هدرتها قلتلو اني سمعتها قالي ماحبتش قلتلو نروح نهدر معاها قالي روحي رحت قلتلها لاه ماجيتيش قالتبي لاه نجي قلتلها كيفاه يعني قالتلي ماني مالفة نجي ما نحي درك علاجال والديك قلتلها علاه واش درنالك قالتلي منهار قلتيلي ماعندك ما دخلك وماجيتش شكيتلك حلفت ماندخلش دارك قلتلها بصح اني ماقلتلكش قالتلي قلتي حلفت وقلتلها او ربي علابالو ورحت لداري وهي ماجاتش وانا مازدتش رحت عندها انا غاضوني والديا علاخاطر ماشافت منهم غير الخير راجلي ميليتار والله بابا عاطيلو الطونوبيل تاعو كل مايجي يمدهالو باه نحوسوا بيها ونقضيو امورنا على خاطر ساكنين في منطقى بعيدة على الفيلاج وهوما مايخليو بيها حتى بلاصة كل يوم يديهم لطريق وساعات امو تقولو روح جيب خالتلك وختك ووووو والله يركبوها كثر مني وفاللخر ماحبتش تجي تسقسي على نسيبها وقالتها بصريح العيارة -مانجيش-
وحبيت نوضحلكم حاجة تاني هي كي قالتلي حلفت مانجيش هي جات من قبل باه نروح للعرس معاهم ....انا هداك العرس ماكناش معروضين وماقالتليش تروحو معانا المهم سجاو رواحهم وراحو للحفافة ولبسو قشهم حتى قاللهم بنها لاخر راح عليا الحال مانقدرش نديكم باه عيطت لراجلي وقالتلو هيا تروحو قاللها ماناش معروضين قالتلو ام جاو عرضوكم الصباح كي قالي راجلي هيا البسي باه تروحي قلتلو مانروحش مانيش واجدة جات تقولي هيا تروحي وحبيتك تروحي تنحي على بالك حتى سجيت روحي بالزربة ورحت المهم داروني قنطرة وكي عدنا مروحين من العرس يعتلهم خوه الصغير باه نسجيو رواحنا نروحو راحو لبسوا وهزو حوايجهم وخرجو وما قالوليش .....حتى قاللهم راجلي وين هي باه عيطولي انا لي جاست هادو ماهدرتش عليهم وهي على سبب مكانش منو دارت الشي هاداك كامل المهم قصة انها حلفت ماجيش لداري مكانش منها على خاطر جات على مصلحتها .....يرحم باباكم اعطيوني رايكم ولوكان وحدة ولا واحد تعرضوا والديه لاهانة كيما هادي كيفاه يدير وشكرا

[نورسين.داية]

السلام عليكم

يعني أنتي مشكلتك ...عدم إحترام أم الزوج لوالديك ....و مسألة حلفها عن الدخول لمنزل إبنها
من خلال ما رويتي واضح انها ترفضكي قلبا و قالبا

أنا شخصيا بالنسبة لي هادي ليست مشكلة : من خلال فكرة معينة

لي جا مرحبا بيه و سهلى ...............و لي راح الله إلاقيه الخير ......................أتمنى أنكي فهمتي قصدي

[لمعة السيف]

اتمنى من اي مشتكي ومشتكية ان يطرحو المشكل باللغة العربية حتى يتسنّى لنا الفهم لان الدراجة تختلف من ولاية لاخرى وقد لا يفهمها الكل لهذا اختي لم افهم من كلامك الا القليل ...اختي هذه المشاكل يكاد لا تخلو بها كل بيت..العداواة بين الكنة والحماة واهل الكنة واهل الحماة ...يعني مشكلتك تعد عادية مع مايقع من امور في البيوت ..ان الظلم لشئ عظيم يعني لا نقدر ان نظلمك او نظلم حماتك لاننا لم نطلع الا على شكواك والله يعلم ماحال شكوى حماتك ..المهم سننصحك حسب شكواك ..اختي انت افضل من الكثيرين اي انك تسكنين وحدك
وانت مستقلة عن حماتك وهي ام زوجك لا تنسي انها ولدته وكبرته وانت وجدتيه جاهز هذا لايبرر التجاوز في حقك .ولكن اصبري واحتسبي ان كان زوجك يحبك وهو يتفهمك ويتفهم اهلك ولا يهمك موقف حماتك ..المهم لاتظلميها وقد راضيتها وهذا الاهم .وتجاهليها وحاولي ان لا تملئي راسك بهذا وخصصي وقت فراغك لامور تنفعك وتنسيك هذه المشاكل..

يقول الحق سبحانه: وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا..وأخرج مسلم كذلك من حديث أبي هريرة رضي الله عنه قال: قال رسول الله صلى الله عليه وسلم: لا تحاسدوا ولا تناجشوا ولا تباغضوا ولا تدابروا ولا يبع بعضكم على بيع بعض، وكونوا عباد الله إخواناً، المسلم أخو المسلم لا يظلمه ولا يخذله ولا يحقره، التقوى ها هنا ويشير إلى صدره ثلاث مرات، بحسب امرئ من الشر أن يحقر أخاه المسلم، كل المسلم على المسلم حرام دمه وماله وعرضه.

المهم لا تظلميها والله سيجازي كل ظالم آجلا ام عاجلا قال النبي صلى الله عليه وسلم: ليس منا من خبب امرأة على زوجها، أو عبداً على سيده. رواه أبو داود.على العموم ننصحك بالصبر والاخلاق الحميدة اي استمري في تعاملك مع حماتك بهذا الاسلوب لانها خصال حميدة وان قابلتك عكس ذلك لعل ذلك ياتي بنتيجة مرضية وناجحة وعلى الزوج ان يسعى لصلح بينكما وليس عليه ان يطيعك او يطيع امه في مخالفة الشرع والوقوف الى اي واحدة منكما ..اما بخصوص اهلك وابوك بالتحديد فحاولي ان لا تخبريهم بمشاكلك مع ام زوجك احسن ان لا تأججي نار الحقد بينهما فيتفاقم المشكل من اجل مصلحتك وايضا من اجل زوجك والتفاهم بينكما ..ان تكوني ذكية وتعرفين كيف تجعلين الامور لصالحك وصالح الجميع وفقك الله .

[yako02]

شوفي يا اختي لي حبك حبيه و لي كرهك حبيه و بقاي بعيدة عليه ...المهم في الموضوع هو انك تحاولي تكسبي رضاها مع الوقت و الاهم من ذلك هو رأي زوجك في الموضوع اذا هو متفهم الاملر و كان شاهد على واش حصل بيناتكم و انك مقلتيلهاش ماعندك ما دخلك يعني انت راكي مهنية متعمريش راسك بزاف يجي نهار و تنعل ابليس و جي لدار وليدها راني قتلك المهم زوجك ميديش موقف ضدك و متحاوليش تكرهيلو يماه لانو هي تاني بلاك كون تحكمو تعمرو عليك بلاكي حاولي تقوليلو روح جيبها انت يعني زوجك هو يحلف ليماه باش جي عندو و يقلها كان مشكل و كنا كامل مقلقين و الله يا اختي زوجك هو الوحيد لي قادر يصلح الموقف ...الله الموفق

[جويرية الإيمان]

نقلك حاجة

متعمريش راسك كامل بيها (أقصد المشكل)

أنسيها كامل و روحي لدار شيخك و كأنه لا يوجد شيئ

و لما عجوزتك تعاودلك الهدرة غيري انت الموضوع

يعني ما تريحيش معاها في الكلام .

لأن العجايز ما تسدق تلقى حاجة ماه تحكم مرت بنها .

لوكان نقلك أنا واش نسمع من عند عجوزتي

بصح و الله غير نلوحها في التوش و ما نرجعلهاش و نتكلم معاها عادي

حتى هي تجع تتكلم معايا تقول حاجا ما صرات .

[الحلم الجميل]

من كثر ما اقرا و اشاهد مشاكل فمشكلتك يا اختي ليست صعبة ...انت عندك زوجك يحترمك و يحبك حتى لو ضربك فهو طلب السماح
و مشكلتك في عجوزتك يا اختي معظم الحموات هكذا فانت اتصرفي و كانه ماكاين والوا يعني زوريها اطمني عليها
و مع مرور الايام راح تعرف غلطها و اذا ما رجعت فهي حرة المهم انت عارفة انه ما عملتي شئ يغضب..و صراحة سبب المشكل هو زوجك
لماذا يستدعي امه ليخبرها ما جرى بيناتكم هذا ليس من حقه ..و انت فعلتي صواب لما ما حكيتيلها سبب الخلاف لانك محافظة لاسرار زوجك
المهم عامليها بكل خير و خليها على الله و بالنسة لاهلك فلا يغيظك الحال فهناك مشاكل اكبر من مشاكلك و تشيب الراس فاحمدي الله كثيرا و اسغفري ..كيما يقولوا اذا كبرتيها تكبر و اذا صغرتيها تصغار..فانت ارمي وراء ظهرك و عيشي حياتك و عسى الله يهدي حماتك و زوجك..و الله يشفي ابوكي و يخفف عليك

[lilas rym]

يا اختي تهنيتي منها وش دخلها بيناتكم اصلا قولها احلفي وزيدي احلفي انا لي ما يقيمليش والديا والله لا نقيمو والله غير اهانة كبيرة نصيحة من عندي صباح الخير واش راكم خلاص ثقلي روحك عليهم.
المفيد كي تكوني متفاهمة مع راجلك الدنيا وما فيها كيعاد هو اللي راح يدخلك للجنة ماشي مو.
ربي يهدي سرك ويهنيك.

[أم عبد الكريم]

شوفي نقلك حاجة متعمريش راسك بيهم والديك جاو عندك انتي مجاوش عندها يعني تجي ولا متجيش كل واحد يدير باصلوو باخلاقوا المهم راجلك راهو يقادر والديك و يحترمهم متكبريش لحكاية اكثر من حجمها ( انا تاني ندير هكا تكون حلجة تافهة و نكبرها) لانو انتي فقط اللي راح تتعبي في حياتك اللي بغا يدخل دارك مرحبا بيه و اللي حلف عليها الله يسهل هي ولدها راهو يروحلها و تني وعلاه تقلقي في روحك

[loufa]

ماتعمريش راسك بيها انتي من كلامك درتي اللي عليك واكثر حاولتي ترضيها محترمتها مقيمتها الان قيمي روحك لانك اذا ماقيمتيش روحك يعفسوك اجبدي روحك وخلي العلاقة بينكم رسمية يعني العيد ديريلها قسمتها وادخلي عندها نص ساعة كي تكون عندك عرضة ابعثي ابنها يجيبها اذا جات مرحبا بيها واذا مجاتش الله يسهل متهدريش فيها عند راجلك لا بالخير ولا بالشر والمرة الجاية متروحيش للعرس كي يكون اخر دقيقة ورباركيلهم بعدو بزيارة خفيفة وحتى لما تسمعي بيهم مرض نفس الشيء خذي حاجة في يدك وزوري خفيف ظريف
متكثريش الهدرة بزاف وتوقفي عن تقديم التبريرات مثل انا مش قصدي ومقلتش ووو
والله يرجعو يحسبولك حساب ويقيموك ربي يهنيك

[imane1]

المشكلة بدأها زوجك \


تخاصم معك ..لما يحضر أمه ؟؟



علمي زوجك كيف يحل مشاكله لحاله .. تتخاصمان فيبقى خصامكما بينكما سبحان ربي لما يسمع الآخرون ؟؟

لو أنك تخبرين أمك لأقام الدنيا فوق رأسك

ولو أن المرأة تخبر أهلها لجاز ذلك بحال من الاحوال لما تنطوي عليه من ضعف وقلة عقل ..

لكن مالذي يبرر للرجل اعلام اهله بمشاكله مع زوجته ؟؟



أختي , أنا أختلف وزوجي ولا أخبر أمي ولا يخبر أمه

ونتعامل بشكل عادي امام أهله حتى انني ان لم أقل لامه انني غاضبة منه ماكانت لتلاحظ ذلك




ما ينبغي أن يتكرر ذلك أختي ..



أسأل الله أن يلين قلبك وقلبها وأن يهديها سواء السبيل

عموما اذا كان الأمر كما تروين , فأنت لم تخطئي في شيء

حتى في عدم اخبارها لم تخطئي .. ينبغي ان تكون ثمة خصوصية بينك وبين زوجك

لكن مادام زوجك احضرها كان ينبغي ان يقول لها بنفسه ماحصل

والا يروح بالها مباشرة انكما اختلفتما بسببها ..



واش نقولو الله يهدينا كامل , الناسكلها عندها مشاكل ونورمال يتضربو ويضربو لكن في الستر خير ..