فهموني علاه تحبو الطب 20 سنة قراية زيدلها 20 سنة

[3ab2ou]

السلام عليكم خاوتي و صح فطوركم

و الله حبيت نفهم علاه اللي يجيب من فوق 14 يولي يتواحم على الطب علاه كاين غير الطب فالدزاير و زيد بصراحة هادو اللي حابين الطب رايحين غير علاجال الدراهم ول يعني عندهم رغبة فالقراية تاع الطب ول كلقا الشعب كامل طب قال ندير طب و خلاص ,,و الله كاينين اختصاصات هايلين لصحاب 14 و طلع كيما هندسة كهربائية و الكترونيك تاع بومرداس ول محروقات بومرداس تخرج انجينيور وين تحب تروح تروح فالخليج ول فالجزاير انا كون جبتو ب 15 بلا منخمم ندير هندسة كهربائية بومرداس مي الله غالب ربي كتبنا حاجة وحدوخرا و الحمد الله

[boyka 1993]

اخي انا جبت 15 كنت حاب هندسة كهربائية والكترونيك بصح الله غالب العام لي فات 16

[موح الحراشي]

اولا الطب مهنة انسانية،لي يديرها علاجال الدراهم غير ميشقاش،لانه رانا نشوفو اطباء جشعين يشوهو صورة المهنة،والبعض الاخر غير متقن لعمله

[Soundoussnow]

هههههههه يا اخي اقتراحك هذا يصلح غير للذراري
وحنا لبنات من غير التعليم ولا الطب قلي برك وش يصلحنا هذي اولا
وثانيا شكون قالك بلي لي حاب يدير الطب يحوس غير على الدراهم ؟؟؟؟؟
نقلك حجا أنا ملي كنت صغيرة كنت حابسا مفرينيا خاوتي يقراو مليح ويفرحو في ماما وبابا بمعدل ٩ في الابتدائي وانا جهدي جهد روحي نجيب ٧ والبراكة بصح كنت دايرا في بالي هدف ومستقبل رسمتو في مخي كنت حبا نخرج طبيبة أسنان وبمرور السنين بديت نحط راسي اكثر واكثر في قرايتي طورت روحي لحقت للباك جبت 15 ومع بلادنا الظالمة ملحقتش لعام لي فات لحلمي
زدت عودة السنة وجبت ثاني 15 وهبطة في الفاصلة بصح وكيلهم ربي خدمة فوق ما تتوقع بصح الله غالب هذي بلادنا
يا اخي كاين ناس تسعى لتحقيق حلم الطفولة ومهيش تجري على الدراهم كيما رآك تقول ..... الحمد لله رانا عايشين
شكرًا وصح صحورك يا لخاوا

[sunhamed]

طب مليحة لأن فيها مستقبل مضمون
وعلى حساب الأشخاص لي أعرفهم يقروا طب الأغلبية يتجه لها من أجل الدراهم
(يوجد من يتجه لها لأنها حلم الطفولة لكن نسبة ضئيلة)
و بالنسبة لقصة أن هندسةكهربائية و إليكترونيك و محروقات بومرداس تروح وين تحب
هذا الكلام كان سابقا(قبل 5 سنوات)
وفي دزاير خدمة مضمونة=طب أو مدرسة عليا للأساتذة
غير ذلك من التخصصات لازمك: (كونكور+تعب + وقت) باش تخدم.

[lebiod mahdi]

salam khawwti ....kayen li ydir medcine ygol lk 3la 7e9ach khedma madmona ana ngol lo bli mkanch hta haja fe had danya madmona al wahed ydiir o yetawkel 3la molana o sayé

[poweryn]

هههههههههههههههه قالك بالهندسة الكهربائية و إلكترونيك تروح وين تحب
راكم مخدوعين كيما كنت أنا العام اللي فات + بعد ما تسجل يعطوك بطاقة الطالب مكتوب فيها st/gee يعني تخصص تكنولوجيا لكن فقط شعبة هندسة الكهربائية و إلكترونيك أي تخصص موجه
نعرف ناس راهم يقراو معانا ندموا لعدم إختيار الطب
أنا شخصيا منحبش الطب و لا يمكنني دراسته و لكن الهندسة الكهربائية و إلكترونيك ببومرداس ليست على الإطلاق كيما راك حاسبها

[Flora Gucci]

الي اختار الطب علاجال المادة و الدراهم ، غير مايطمعش فيهم
صفي نيتكككك الرزق على ربي سبحااانوو

[3ab2ou]

صاحيتو على وجهة النظر تاعكم و اللي كان مدايرها حلم الطفولة هاديك حاجة وحدوخرا اما الهندسة كهربائية و الكترونيك و الله عندي بن عمي دار تخصص electrothiqnic وراه فالسونطراك لاباس بيه و ديما يقولي الوالد تاعي او بن عمي محابش يروح لبرا يعني هو اللي محابش ,,وزيد كاين صاحبو تاع الشايب انجينيور فالفوراج خرج من هادي تاع بومرداس كان يخدم فليبيا و كي صرات الفوضى و قالهم القدافي زنقة زنقة خخخخ ضرك و الله او فالسعودية

[فوزي الفايز]

الطب ليست منجما للمال

فهنالك وظائف في الجزئر شهريتها اكثر من الطبيب

دون ان نذكر 7 سنوات + سنوات التخصص و غيرها

وطبعا في النهاية كل شخص ورغباته ونواياه

[kenza boucetta]

كل واحد ونيتو في اختيار الطب وربي هو الأعلم

وهندسة كهربائية ومحروقات مليحة بزااااف بصح لذراري برك ماش لينا حنا لبنات المهم لي اختار حاجة ربي يسرلو فيها

موفقين .آمنكم الله /سلام

[تائبة الى ربها]

في كل عام يتخرج ربما 500 طبيب عام على الأقل و تقولو خدمة مضمونة

[switchers]

لمعاندة من العائلات الجزائرية هادا واش كاين

[besma 16]

يا اخي كل حسب رغبته منهم من يحب ان يخدم الانسانية و ينتظر الجزاء من الله قبل كل شيء...منهم من يريد تحقيق حلمه او حلم والديه و منهم من يبحث عن المال (اتمنى ان يهدي الله الاشخاص الماديين) لكن بين هذا و ذاك لا يمكن ان نفرض رغباتنا او ميولاتنا على غيرنا ..من اراد شيء لاجل الخير وفقه الله و من اراده للشر حسبنا الله مما يريد..في النهاية الناس مختلفون و هذا ما علينا ان نتقبله

[lafouz7]

لا تنسى قول بعد بسم الله الرحمن الرحيم : "من احيا نفساً فكانما احيا الناس جميعاً"

+

مهنة انسانية ومحترمة بالاضافة الى قيمة الفرد في المجتمع ومكانته