مشكلتي مع زوجي

مشكلتي · 2013-06-21, 17:39

السلام عليكم

أنا متزوجة منذ مدة أكثر من عام نسكن وحدي و زوجي يعني ما عندي ما نقول فيه يعاملني مليح و ناس ملاح و الناس الكل تشهدلو بحسن السيرة الحمد لله
هو واسع البال و صبور و ثقيل في كل شي و هذه الصفة مليحة لكن أحيانا تكون أشياء بسيطة تقلقو و التقلاق تاعو واعر يولي يعيط و يخبط اومبعد يقعد و حدوا و مايحبش حتى يشوفني مع أنو شبب المشكلة تافه و كاين حوايج تصرا كثر منها وما يتقلقش أنا دكا حبيت نقلكم واش صرا ومادابيا تعاونوني و تفولولي أنا اللي غالطة ولا هو لأنني راح نهبل من التخمام ونقول بالاك أنا غلطت.
زوجي شوية مدين و مايحبش اللمات يحب الوحدة المهم ملي تزوجنا كي يعرضوني للحفلات نحس بلي ماهوش حاب مالا نقلو ماكلاه نروح وهو بالتأكيد يعجبو الحال دكا عرضوني لحفلة و قالي روحي في اومبعد قالي ألبسي فير حاجة خفيفة (قندورة) بذراع ما أقنعتو بلي مازلت عروسة و أول مرة نحضر لحفلة لازمني نلبس حاجة مليحة قالي لازم توافق الوالدة هي تعرف و بالطبع عجوزتي وافقت وقاتلي مازلتي عروسة المهم اليون وأنا نخيط القفطان تاعي قتلو باش نخدملو لحزام باش يشريلي الدوزان قالي معليش غدوة نروح نشريلك بعد مدة جاني وقال راكي مقلتيليش من قبل راح تلبسي حزام قتلو القفطان لازملو حزام يمشوا مع بعض و بعدها بدا يقلي نتوما النساء تحبو تبينو رواحكم و ديما بمشاكلكم و في الإخير فالي ماتخدميلوا ماوالو ألبسي هاكداك هدا كامل و أنا ساكتة و مارديت حتى بكلمة.
بعد الصلاة وجدتلو لغدا و كان باين على وجهي أني مانيش مليحة قالي وشبيك و بقا يسقسي فيا قتلوا على جال كي قتلي ماتخدميش الحزام و بدا يقلي ماتفسديليش نهاري ويزيك بلا تنقريد و إلا نحلفلك ماتروحي. سكت ومازدت حتى كلمة و بدينا نتغداو و مقدرتش نتمالك نفسي بداو الدموع يهبطو ماقدرتش نحكم في روحي كي شافني نبكي بدا يعيط و يقلي حتي النهار تاع الربو تاعي ماتخلينيش نريح و هدا كامل على جال لحزام و قالي هزي عليا مانتغداش وراح حصر روحو في البيت لخرا وحدو وفالي مادوريش بيا.

اسمحولي لا طولت عليكم حكيتلكم بالتفصيل باش تعاونوني
الحاجة لولا قولولي أنا فاش غالطة
الحاجة الثانية كي نسكت و مانرجعللوش خلاص و نقبل بأي حاجة يقولها هل هي سبب في أو يعاملني هكدا ولازم حتى أنا نفرض رايي و لا هذا هو الثح و نصبر و خلاص.

hakeem · 2013-06-21, 17:59

أنت تضحين بعلاقة زوجية على جال حفلات او عرضات و تعلمين أنه ما يدوملك غير راجلك ؟؟؟؟ أين هو المشكل إذا ما رحتيش للحفلات ثم بما انك تعلمين أنه لا يحب الحفلات فلماذا لا تضحين بنزعها من قاموس عقلك على جالو ؟؟؟؟ ماشي انتوما النسا حياتكم كامل و انتوما تتحدثون عن الحب و عن التضحية على جال الطرف الآخر ؟

يكون عنك الحق لو منعك من زيارة أهلك او منعك من الصلاة أو جاك سكران أو لديه علاقات مع نساء أو أنه لا يقوم بواجباته لكن في هذي أنا شخصيا أعتبره محق خاصة و أن هذه الحفلات لا تجلب إلا تكسار الراس و الغيرة بين النساء و الحسد .....يرحم باباك كاش نساء راهم يتلاقاو في الخير ؟؟؟؟ ياخي يتلاقاو غير في التمنشير و الزوخ و الفتنة ووووووووو

saidsaida · 2013-06-21, 18:00

اختى العزيزة شفتينى وانا ننصحك على خاطر فايتاتك بالزاف بالزواج كيما ايقولو الى فايتك بليلة فايتك بحيلة ما اعليك غير الصبر والحكمة باتخاض القرار اسمحيلى انقلك هذا الزوج عنيد ما ليه غير تشكريه فقط ودرك اتشوفى كيفاش يرجع على روحو درك اتروحى ليه واتقوليلو انا ما نيش رايحة للحفلة وراك انتا خير من كل شئ واذا حبيتى عندى رقية لهداية الزوج مجربة نبعثهالك وربي ايوفقك

achwak crazy girl · 2013-06-21, 18:00

ختي .......... انت صح مزااالك عروسة ولازم تروووحي بحاااجة شاابة

ولكن على حساااب واش حكيتي نظن انو هو ماهوش حابك تروحي بالقفطااان يمكن راه يغير عليك ............
انا هذا رايي وديجا راكي انت هو كي يهدر راكي تسكتي يعني نورمالمو يعاملك احسن من هكذا بزاااف ......... ?????
بلاك كشماااا بيه قوليلو يحكيلك علاه يتنارفا بدون سبب اون + اليوم تااعو روبو بلاك كان حاي يريح معااك ولا
والله اختي مكانش قد زوجك وبيتك
وشكرااااااااااااااا

sali-sali · 2013-06-21, 18:00

السلام عليكم
اختي البسي حاجة مستورة و خلاص
وحاولي تسكتي وتخليه كي يزعف..لازم تساعفي..احسن ماتكبر مشكلة على موضوع تافه

سنة4 · 2013-06-21, 18:03

يأختي انا معنديش فكرة بزاف على هذ المشاكل الزوجية على خاطر ماني مخطوبة و لا مزوجة مي واش راني نشوف يصراو مشاكل بزاف في اليامات اللولة انتاع الزواج و انتي ياختي حاولي متكثريش الهدرة بزاف مع راجلك كي كون قلقان و متحاوليش تفرضي رايك بالسيف خليه حتى يهدى او فهميه بشوية و بلا زعاف يعني مابينيلوش بلي راكي قلقانة ياختي راكي في بداية زواجك او متخليش امور تافهة و بسيطة كيما هذي تعكرلك حياتك و طيعي راجلك وانتهلاي فيه خاصة هو مليح معاك او ناس ملاح او ربي يهنييك او بعد عليكم المشاكل او ربي يهديكم اسمحلى راهو مجرد اعطاء راي وحل

مريم الصابرة · 2013-06-21, 18:10

السلام عليكم اختي
المشكل بسيط بزاف كبريتيه وقلقتي راجلك شوفي إنت عارفاتو مقلق بزاف ويعني ما يحبش الهدرة بزاف إنت كنت دبري امورك او تلبسي اي حاجة هذيك نتاع عروسة جديدة لازم نلبس ماكانش منها وإنت كي جبت قفطان من الاول ما جبتيش معام حظام اختي تعلمي الامور البسيطة تعالجيها وحدك الرجال ما يحبوش الامرو التافهة هذي وهذي بداية تعارف عقلية زوجك ولازم تتحمليها الصراحة إنت ما غلطت وهو ثاني عندو الحق ممكن كان تعبان ومراهش موالف بامرو النسا وإنت خليتيه ياكل وبديتي تبكي لو رحت لغرفتك وبكيتي على روحك نصيحتي ما تكرهيلوش حياتو بامور كيما هاكا هو امر نسا إفريهم وحدك ولما عارفاتو يتقلق حاولي تتفاداي وإنك ما ترديش عليه حاجة مليحة خليه يهدا وحدو يجي ربي معاك وهذا هو الواج لازم تتحملي شكرا

ام نسمة · 2013-06-21, 18:25

حزام قفطان .......................يصرا عليه هكذا ...................لوكان حاجة كبيرة واش يصرا ..............................يا اختي مادامكي عروسة البسي حوايجك تاع العرس علاش عليك الخياطة والحزام ووووو ......سبحان الله الدنيا كيفاش نساء تبكي من مرارة الخيانة وسوء المعاملة والحرمان من الحق الشرعي ...................وانتي تبكي من اجل حزام حفلات مناسبات ...............حرام عليك روحك راكي بديتي تبني في الجدار الصلب اللي يغلق الحب والتواصل بين الازواج من جراء تراكم المشاكل التافهة .............لالا اختي ......ماشي هكا يالوكان تشوفي النسا وش راهم حاملين هموم ترجعي تضحكي على روحك .......ماشي تبكي وتنكدي عيشتك وعيشة رجلك على جال حزام قفطان اسيدي ديري حزامة نورمال او اعتذري بطريقة لبقة عن الحفل واربحي زوجك حبيبك

wahiba T · 2013-06-21, 18:49

اختي انا والله انشوف انوا مافيش مشكل اصلا معليش اختي روحي صالحيه وفي الاول والاخر يقعد هو زوجك واب اطفالك ....ربي يهنيكم

wafa16 · 2013-06-21, 18:54

راجلك بالاك عندو مشاكلو بالاك معقد بالاك يغير عليك
لكن حنونة اتعلمي تقفزي على روحك و علاش تدخليه في حزام القفطان هادو عفايس تع نسا ماشي تع رجال
و الرجال ما يحبوش هاد الامور التافهة
اتكلي على روحك و اشري دوزانك و الا عله هو اهدري معاه كلي ما كان والو
باين عله منيرفي و كي شافك تبكي ما صاب كيفاش يدير كملها بلعياط

السي محمد · 2013-06-21, 19:12

هههه ما زلت عروسة؟؟؟؟؟ الله يهديك وش من عروسة؟؟؟؟

احنا في عقلنا كرجال كي يخلاص العرس ماراكيش عروسة يا ربي يعطيك مهلة تاع اسبوع او شهر تحسي روحك عروسة في افضل الحالاات ضرك راكي زوجة و ربما اُم فقط

الهدرة تاع عروسة و لازم نلبس و قفطان و حزام وووو ما تمشيش معانا

انا نقوللك الصراحة راجلك إنسان عادي و تقليدي جدا مثله مثل غيره يشبهلي

احنا الرجال لا تهمنا التفاصيل اللي انتوما تقعدوا تدوروا و تكثروا الهدرة عليها بزاف

رايحة للعرس = روحي و فقط ما تزيديش هدرة

لا قندورة و لا حزام و لا هم يحزنون

و عندو الصح ما تروحيش للحفلات

اصلا فيها الغنا و الاختلاط مع الرجالو النسا العرايانات و الكاميرا و الوقت الفارغ بلا فايدة؟؟؟وش رايحة تديري للحفلة؟؟؟
تخيّلي يصوّروك ترقصي في الحفلة او قاعدة برك و غدوا راجلك يلقاك في اليوتوب و لا الفايسبوك؟؟؟؟

شفتي راجلك كاش مرّة شرا كوستيم جديد على عرس صاحبو؟؟؟؟

عرس = عرس .

انتوما كلمة عرس = نساء جدد = جمايع =موضة= التفاخر في اللباس= لباس جديد= مصروف إضافي على الزوج

انتي ماراكيش غالطة و لكن انتي مش فاهمة كيفاش يخمّم راجلك

انتي راكي تعاملي راجلك على انه يخمم كيما انتي؟؟؟ و هنا المشكل

زوجك ليس امراة مثلك زوجك رجل عندو عقل و كيان و نفسية و عاطفة مختلفة تماما

اذا حبيتي المشاكل تنقص حطي روحك في مكانه وحاولي تخمّمي في المشكل بعقله هو مش بعقلك انتي

ربي يهنيكم

محمد جديدي التبسي · 2013-06-21, 19:40

لا ينفع مع النساء إلا الحزم خاصة في الموقف الذي ذكرته
المفروض عليه يقولك ما تروحيش للحفلات نهائيا ويقطعها بموس ماضي كيما نقولو
زوجك تنازل وسمحلك بالذهاب كوني على قد ثقتو والبسي ما يرضي الله حاجة مستورة والسلام علاه كثرة الكلام وحزام ووو

AKIS · 2013-06-21, 19:49

لزوجك كل الحق

حميد.ص · 2013-06-21, 19:50

- متزوجة مدة أكثر من عام ...................اعتقد ان المشكل لا راهو فيك و لا راهو في زوجك.......ببساطة عندكم مدة قصيرة ملي زوجتو راكم الان تكتشفو في بعضاكم ......بعد مدة معينة راكم تتجاوزو هذا المشكل ان شاء الله

ايمان23 · 2013-06-21, 19:59

والله الاعضاء الكرام كفاو ووفاو في النصيحة بارك الله فيكم
نزيدك حاجة اذا كان راجلك يكره الحفلات قصي عليك المشاكل خلي غير حفلات خاوتك لقراب
بالنسبة للبسة البسي الي تحبيه علاه لازم تاخدي رايه المهم حاجة محترمة الرجال يكرهو التفاصيل كيفنا
واهم حاجة خليك من البكاء والنكد اكثر حاجة يكرهوها الرجال وما تقوليش كي نبكي يتعاطف معايا ويزيد يحبني بالعكس يكره خلي دمعتك عزيزة
وربي يسعدكم