مشكلتي

[مشكلتي]

السلام عليكم أردت أن أطرح هداالمشكل علَّ و عسى أن أجد الصواب عندكم أختي إنخطبت منذ فترة بدون عقد شرعي يعني جاو هدرو عليها و هاد الشاب كانت تعرفه من قبل المهم وافق أبي و أمي المشكلة الأولى أنهما يلتقيان كثيرا و الذي يراهما يظن أنهما متزوجين و المشكلة الثانية أنه من عاداتنا و كل الجزائريين أنه في كل عيد أهل العريس يجو يغافرو العروسة و يجيبولها قاطو أو أي شئ آخر في العيد صغير جاو و جابولها أما في العيد الكبير مابغاوش يجو و ماما معجباش الحال أختي من شافت ماما هاك راحت شرات بدعية تع 7000دج(مع العلم أختي تخدم) و أعطاتها لخطيبها باش يرسل أمه على أساس هو شراها و حتى حد معلابله يعني كدبوها علينا راني نستنا فرودود و قولو يلا هي راهي نيشان؟؟

[زاد اليقين]

الشكلة فيكم لانكم تنتظرون الهدايا عادي المهم الخطبة والتفاهم لانو الهدايا ماتبني قصور

[شقراء سوف]

الغلطة في اختك كيفاش هي تشري والمسيو يجي يهديهالها على اساس هو الي جايبها والغلطة الكبيرة الي ميتحكاش عليها هو كيفاش يرضاها لعمره يقبل من خطيبته حاجة كيما هكذا ولا بدات تعجبه الشهرية من الان///// ووالدتك من الاحسن متستنى والو غير هناء بنتها الباقي يتعوض وربي يهنيها

[faty05]

اهدرو مع أختك
قولولها تعاود تخمم مليح في هذ الخطيب
و زيد تنقص من الخرجات معاه بلا فائدة خطراش مش وقتهم
حتى يفتحو و يسهل ربي

[faty05]

اهدرو مع أختك
قولولها تعاود تخمم مليح في هذ الخطيب
و زيد تنقص من الخرجات معاه بلا فائدة خطراش مش وقتهم
حتى يفتحو و يسهل ربي

[اكرامو26]

ماجاش في اللبسة واختك مسكينة حشكمت شرات الرجبة ان شاء الله ربي يكمللها هذا مانطلبو

[التوليب الجميلة]

normal machralhach tkoul l mamak machralich machi mlih haka liha deja méme houwa balak ywalaf hakda mafhamtch ana houwa wajhou shih w zad hkamha normal non malazamch

[ايمان نور الجزائر]

المشكلة يا اختي تكمن في الخرجات
اصلا ماراهمش ملاح وكان ما يكتبش ربي تربح غير العيب والهدرة وتجيب مشاكل لعايلتها وخواتاتها
اما انو تشري جبة وتمدها لخطيبها يجيبها شيء عادي
بالصح بزاف هكا ....الهدايا في كل مرة
لو امك لا تطالب بالهدايا لما اضطرت اختك لهذا الفعل

[om chiraz]

Salam chofi khti ani fahmatak hna hadi fa dzayar ysamoha lamhiba bali kol 3id yjibo la3rosa fa l3id srir nkolo lhalwa w chwia kadowat wala fa l3id hakha ta3 lham ou yamak maraltatch machi rahi tasana f likado ta3hom mais chi3a w chab3a kodam nas kal banti jabolha lamhiba hakha tafrah b bantha mais kayna haja hado 3lach majawch mahomch kablin wala ma3andhomch wala maya3arfoch hadi la reponce ta3ha mohima jawbini oumba3d nkamlo nchalah

[فتاة الدعوة]

يا اخت هدي اختك ماتخممش براسها راها تخمم بقلبها لازم تصارح امها وماتخبيش عليها اي شيء هدا الرجل مينجمش يشري هدية بسيطة ومن بعد واش يصرا ؟؟؟؟؟؟؟؟؟؟؟قوليلها تخمم مليح وهي لتحكم نتمنى لها السعادة وهناء

[سطايفية بكل فخر]

اختي هده عادة سيئة فالجزائريين كل واحد وظروفو
امك خطات لانها غضبت ومقدرتش ظروف نسابها
واختك غلطت لانها كدبت على امك
وزوجها اخطا لانو حكمها عليها
على العموم ان شاء الله اخر مرة تكدب فيها اختك
واحكي انت مع امك وفهميها بلي كل واحد وظروفو واحكي مع اختك وقلها لي يكدب على امو ممكن يكدب على زوجو
قلها تبني حياتها على الصدق باش يباركلها ربي
بالتوفيق ان شاء الله يتعلمو من اخطائهم

[سطايفية بكل فخر]

المشاركة الأصلية كتبت بواسطة ايمان نور الجزائر

المشكلة يا اختي تكمن في الخرجات
اصلا ماراهمش ملاح وكان ما يكتبش ربي تربح غير العيب والهدرة وتجيب مشاكل لعايلتها وخواتاتها
اما انو تشري جبة وتمدها لخطيبها يجيبها شيء عادي
بالصح بزاف هكا ....الهدايا في كل مرة
لو امك لا تطالب بالهدايا لما اضطرت اختك لهذا الفعل

مش عادي كيفاش لرجل يرضى انو يحكم حاجة من مراة مش مرتو قدام ربي
امها كون تسمع بيها تبطلها وتقلها طامع فيك
والفتاة راهي ثبتت على اها انها طماعة في هدايا الرجل
منصلحوش خطا بخطا
+°
فيما يخص الخرجات عندك الحق

[سطايفية بكل فخر]

المشاركة الأصلية كتبت بواسطة om chiraz

salam chofi khti ani fahmatak hna hadi fa dzayar ysamoha lamhiba bali kol 3id yjibo la3rosa fa l3id srir nkolo lhalwa w chwia kadowat wala fa l3id hakha ta3 lham ou yamak maraltatch machi rahi tasana f likado ta3hom mais chi3a w chab3a kodam nas kal banti jabolha lamhiba hakha tafrah b bantha mais kayna haja hado 3lach majawch mahomch kablin wala ma3andhomch wala maya3arfoch hadi la reponce ta3ha mohima jawbini oumba3d nkamlo nchalah

وعلاش نسيوو الظن كل واحد وظروفو بلاك معندهمش والشي راهو غالي
هي قاتلك شراتلو الجبة ب700 وزيدلها الحلوى ولالخضرة و,,,
هو بهادو يخمم في عرسو
وعلاش لازم يجيبو ولا مهمش قابلين
حنا في سطيف عادي تجيب او لا
كاييني لي ميجيبولهاش خلاص وفالعرس يديرولها حاجة دهب ولا يديها فوياج
منحكموش على الناس هكا برك كل واحد وظروفو

[محب الحكمة]

المشكل كل المشكل في البنت و خطيبها....
أولا نحن نتظر من اهل العريس لا لانها طامعة في هدة و أو شيء أخر...و انما جرت العادة هكذا...يجي اهل العريس في مناسبات باش تتاكد النية ..يعني مازالهم دايما شدين في كلمتهم تاع الخطبة...
ثانيا : لماذا لم تاتي أم العريس في العيد..ربما هي من الأول غير موافقة وجات المرة الاولى بالحاح من ابنها فقط..
ثالثا اذا هذا الراجل ماقدرش يشري هدية..على الاقل ما يكذبش على نفسها و يغلط ناس و يتقبل الملابس لي جابتهمل البنت....

اذا كانت اختك حابة تعيش مليحة قوليلها تسقم روحها و تكونها صريحة في كل شيء و تبعد على هذا الخطاب باسكو يغبنها هو بنسبة 40 بالمئة و هي تغبنه بنسبة 60 بالمئة...افراق مليح و ربي فيه الخير و هو الاعلم بحالنا

[الزبرجد]

السلام عليكم

إضافة إلى مجمل ما اتفق عليه الإخوة : أردت أن أنبهك لشيئين اثنين

أولهما أن كل رجل يريد زوجة بلا ما يضال يصرف عليها قبل العرس هو اللي يخمم في الخرجات الكثيرة

لأن تلك الخرجات التي تظهر لأختك بريئة هي في الواقع دامغة و ملغية لأي خطوة تراجع ..

..يعني مع توالي الخرجات يصبح أحسن نتيجة هي الزواج و لو على حساب كل الشروط التي وضعت سلفا

ثانيهما أن أختك تخمم بعقلها و ليس بقلبها كما قيل ...لأنها هي التي تخرج معه و تعرف ما معنى أن ينسحب العريس

في هذا الوقت و في ظل هاته الظروف التي كانت هي سببا فيها بسذاجتها ...و لكنها بدات تخمم بعقلها كي تطفرت

أحسن الحلول أنكم تستدعو أهل العريس و تتفاوضو معاهم بشأن الاسراع و التعجيل بالزواج ...و الله أعلم