عاونوني رايحة نموت

خديجة 1010 · 2013-01-02, 13:15

السلام عليكم ورحمة الله وبركاته
انا مخطوبة من المفروض عرسي راهو قريب بضح وقع مشكل بيني وبين خطيبي داوسنا وعايرني وقالي كلام انا متحملتوش قلتلو بلي عييت منو وتضرفاتو عيكلي وقالي والله منزيد نعيطلك وقولي لداركم بلي خلاص بيني وبينك والكارني والتصاور قطعيهم ولا احرقيهم ولا يكفر ويطيح قولولي وش ندير حاسة روحي راح نموت راجل كيما هذا وش راح ندير معاه

كاميلا · 2013-01-02, 13:18

لازم يهدروه معاه الرجال اختي

حزن بحر · 2013-01-02, 13:21

ربي يفرج عليكي حبيبتي وان شاء الله تكون لحظة غضب برك وترجعو
ماعندك غير ربي اتمسكي فيه وماتقلقيش روحك هذي الدنيا ولي مكتوب راح تشوفيه
صلي صلاة استخارة اذا فيه خير راح يعيطلك وتتراضاو واذا فيه الشر هذي السبة وكلشي في الدنيا مكتوب
حبيبتي هدي روحك شوي وماتحكي والو لداركم وذا راكي قريبة من امك احكيلها وحدها
وبعد اسبوع روحي ليه واحكي معاه اذا كان حاب يرجع راه يولي واذا كان قراره ماتسبيه ماتعايريه قولولي مكتوب وخليه
ربي مايتخلاش عليكي
وان شاء الله لحظة غضب برك

•~ندية الجوري~• · 2013-01-02, 13:37

ما تقلقيش روحك

إن شاء الله تكون لحظات غضب و تعود المياه إلى سواقيها
ما تقولي حتى شيء لأههلك
تريّثي في أمرك

قد تكون كلمة طيّبة بينكما فاتحة خير جديدة
و تتصلّح الأمور بيناتكم

و لكن إذا علم الأهل و الكبار
يصعب الأمر أكثر
خليه يرتاح و يفكر في عقلو

و بإذن الله كل شيء يتصلّح

و بلا ما تقوليلو عييت منك
إذا قبل ما توصلي ليه سمعها منك
فماذا بعد ....

مريم الصابرة · 2013-01-02, 13:44

السلام عليكم اختي
حبيت نسقسيك وقولي بكل صراحة شكون الغالط وما تقوليليش هو لانو يوصل يطيح ويكفر او يسبك ويقولك الكارني احرقيه يعني إنت وصلتيه لحد كبير من الغضب وعلاه توصلو لهذي وإنتم مخطوبين يعني متزوجين واش راح يصرا سامحيني مي راكي كرهتيلو حياتو قبل ما تدخلي عندو لازم تتعلمي تساعفي وما تقوليش راجل كيما هذا واش ندير بيه خطيبك إنت تعرفيه يعني وعلاه من الاول ماكانش يقولك هكذا من راي إستناي عليه شويا حتى يروح الغضب نتاعو كان بقا هكذاك لازم يحكو الرجال معاه هذا ماكان وكان غلكت إطلبي السماح منو وكان هو غلط معليش إصبري يعرف غلطاتو لكن ننصحك محال تسبي الراجل مهما يقولك أسكتي وخليه يفرغ قلبو ولما يهدا وحدو يجي يطلب السماح موفقة

بتول8 · 2013-01-02, 13:45

ميهدر معاه حتا واحد
هادا مش مربي اصلا كعاد يكفر
طيشي عليك و اتهناي منو ضرك خير

خديجة 1010 · 2013-01-02, 14:49

شكرا علي كل لي ردو عليا راهو عيط درك وقالي قولي لداركم بلي خلاص قلتلو انا جيت خطبتني من عند بابا كي تبطل تهدر معاه قالي انا منهدر منحوس حتي نبعتلك ورقة الطلاق قلتلو امالا درك نعيط لداركم قالي انا دارنا ميحكموش فيا نحكم في روحي انتي ديري رايك وانا ندير رايي

موج و صخر · 2013-01-02, 15:13

مادام عاود قالك بطلت
لازم تحكي لوالديك
باش يكلموا والديه و يبان الصح
نقول لك حاجة : راك في دار باباك و تجرا عليك بالشتم و الكلام السيء...حتى انك قلت كفر...
مالا نهار تعودي في دارو واش يدير فيك
حبيبتي راجعي روحك مليح
الي ما يخافش من ربي و يكفر...اكيد لا تامنيه على نفسك..
بالاك ربي سبحانه سبب هذا السبب لانه فيه خير لك و الله اعلم.
و الله المستعان

سدرةالمنتهى · 2013-01-02, 15:46

صحيح البنزين سريع الاشتعال لكن مايشعلش لو ما حطيتيش فيه عود الكبيرت
لذا حاولي تفكري واش غلطتي معاه و الموضوع اللي تناقشتو فيه حتى ولى يعيط و يكفر و ياس منك قبل الزواج حاولي تطلبي منو السماح لانو باين الغلط منك على حساب حديثك و هدنيه و قوليلو الشيطان دارها بيناتها و خلينا نلعنوها و نتغلبو عليه و مانخلوهش يفرح كي فرق بيناتنا و الله اعلم عن مشكلتك ممكن توضحي اكثر هذه اللي وصلت حتى للطلاق و تحرقي الكارني انشاء الله نسمعو عليك غير الخير و رجعتو لبعضاكم

خديجة 1010 · 2013-01-02, 15:55

والله ماقلتلو شيئ هو لي بدا يخلط فالهدرة كي قلتلو احترمني شوية انا مرانيش طفلة تع زنقة مادابيا نهدرو في حاجة سيريو قالي انا منعرفش السيريو وانت نار تحت تبن ونكشفك باعقل وبدا يكفر ويطيح
وهو عندو طبيعة كي نكونو نهدرو فالتلفون يبدا يجياح ويبسال ويهدر هدرة معندها حتي معني بعدها انا قلتلو نعودو نهدرو خطرة فالسمانة قالي اوك بصح ولا يعيط كل يوم وعمرو ميهدر علي حاجة تع صلاح غير تمهبيل وتمسخير وانا منحبش هكا هدامكان

مسلمة انا · 2013-01-02, 16:02

المرا تحب اللي يساعفها ماشي على اي خطا يسب وعلاه راهو داير فيك مزية كي راه خاطبك

نقولك خمي في خطيبك كاب لابنائك في المستقبل اذا راضية يسب وعيط علييك قدام ولادو وهوما يرفدو عليه

ونقولك خطيبة خواف لوكان جا راجل كي يحب يحبس يهدر مع باباك ما شي يخبي راسو ويقولك انتي قوليلو و ماليا ما يحكموش فيا ما احترمك ولا احترم باباك ولا اهلو

اسمحيليي ميي راجل كيما هك بالناقص دار باباك ارحم

ربي يعوضك بسيد سيدو ان شاء الله

حفيظ حيدر · 2013-01-02, 16:39

السلام عليكم . اختي ربي يفرج عليك . لازم تعرفي بلي كاين نوع من الرجال هدا اسلوبهم في الكلام مع نساهم . تلقيه برا واع و ذكي وخدام ويحاور بصح مع زوجتو دايما يتمهبل وما يقولها حتي كلمه تاع واحد رزين . انا عندي صاحبتي زوجها هكدا بصح واصلت معاه وراها صابرة . اختي استخيري وحاولي ما تزيديش معاه وما تكونيش سبب في طلاقك لان هذي حاجة تاثر علي المراة ياسر . والي شاف فيه ربي خير يسهلو .

مريم الصابرة · 2013-01-02, 16:40

السلام عليكم اختي
راني فمهت تقريبا المشكل خليني نقولك من حقك ترفضي اسلوب كلام يحط من قيمتك او يحسسك انك ما تسوايش حاشا ولله لكن هذا راه داير دفتر عليك معناها زوجك قدام ربي ويعني مهما يوقل من كلام غزل او في نزرك إنت كلام طايح هذا راجلك يعني لو كان خطيبك ترفضيه تماما لكنو زوجك نظن ويا سيدي كنت تفهميه بالعقل بالي تحشمي وترفضي كلماو وياجلو حتى تكوني في دارو لكن سامحيني نقولك يا خديجة كلمة مانيش طفلة نتاع زنقة كلمة كبيرة بزاف بزاف صدقيني وواعرة بزاف تقوليها لراجلك على كل اختي
هو مازال زعفان وانا نقولك غلطت واطلبس السماح وهو خليه يهدر راه زعفان وكي يقولك نبطل قوليلو هدرت مع الرجال اروح تهدر مع الرجال انا ماكان ما دخلني وحاولي تليني الكلام معه
كان فكرتي من الأساي إنو ما يولامكش وخايفة من الحياة معاه هذاك امر آخر لانو نشوف راكي خايفة تخسريه معناه حافظي عليه موفقة وما تتقلقيش ممكن كلام زعاف برك وكان أصر ربي ما كتبش خليه يجي يحكي مع باباك وثم تبان وإنت تغاضي واطلبي السماح الصراحة إنت غلطت

خديجة 1010 · 2013-01-02, 16:50

اختي مريم مفهمتيش نوع الكلام لي يقولو لالا ماشي غزل لوكان جا هكاك معليش هو كلمة حلوة ميعرفش يقولها يهدجرلي غير الهدرة الباسلة تصوري يقولي كي نكون نمشي معاك فالزنقة نحشم بيك تبهدليني بلبستك وانا والله لبستي محترمة ونقية وخطرة خرجت معاه وتقطعتلي ليبة جديدة جازو يمات عايرني بيها وخطرة كنا نهدرو قالي بلاكي جيني بسباطك هداك الفايح ياختي وش نقولك وكي تشوفيني وتشوفيه فرق كبير بيناتنا انا خير منو في كل حاجة شحال من مرة يزيد معايا الهدرة ويقولي راني حاب نبطل وكي نقولو دبر راسك انا قلبي وجعني وعييت من تصرفاتك يولي يحلل ويقولي كنت نقصر معاك برك

كاميلا · 2013-01-02, 16:55

اقتباس:

المشاركة الأصلية كتبت بواسطة خديجة 1010

اختي مريم مفهمتيش نوع الكلام لي يقولو لالا ماشي غزل لوكان جا هكاك معليش هو كلمة حلوة ميعرفش يقولها يهدجرلي غير الهدرة الباسلة تصوري يقولي كي نكون نمشي معاك فالزنقة نحشم بيك تبهدليني بلبستك وانا والله لبستي محترمة ونقية وخطرة خرجت معاه وتقطعتلي ليبة جديدة جازو يمات عايرني بيها وخطرة كنا نهدرو قالي بلاكي جيني بسباطك هداك الفايح ياختي وش نقولك وكي تشوفيني وتشوفيه فرق كبير بيناتنا انا خير منو في كل حاجة شحال من مرة يزيد معايا الهدرة ويقولي راني حاب نبطل وكي نقولو دبر راسك انا قلبي وجعني وعييت من تصرفاتك يولي يحلل ويقولي كنت نقصر معاك برك

ايه اختي انا شخصيا لا القي اللوم عليك جيث انه واجب عليه يحترمك واش حاط روحه وكي عاد راجال واش
؟؟؟؟ استغفر الله حاط روحه الاه ام ماذا اي علاقة متكونش فيها الاحترام رح تنهار اؤكد لك هذا انا كيما قتلك تكلمي مع اهلك وقوللهم واش صرا هوما يتفاهمه معاه خاصة اذا كان صح رح يطلق وديري استخارة انت متدريش ربي شايفلك خير في هذه الحادثة اذا استخيري ووكلي الله ومتسمعي لهدرة حتى عبد