مقارنة نفسي بالاخرين

[مشكلتي]

عندي مشكل و هو مقارنة نفسي بالاخرين ارجو مساعدة منكم
مثلا صديقتي اللتي كنا نتشابه في نفس السن 29 سنة ،،،، تزوجت تعرفت على شخص من المسنجر ثم التقت به ثم تزوجت به ...و انا مازلت عازبة و لا املك حتى صديق
الشيطان او لا اعرف من داءما يذكرني بها في كل دقيقة 24 ساعة يقول لي هي تزوجت بزوج صالح و قاري و مليح و انت مزلت متزوجتيش و مش حيجيك شخص اخر كيفها .....ثم اصاب بحزن و اكتءاب شديد .....لا اعرف كيف اخرج منه .......اريد ان انساها و ان لا اقارن نفسي بها لكن لم لا استطيع
خاصة ان عندها اهل مدلينها و انا عندي اهل يضالو يضلمو فيا

و كذلك دخلت لخدمة جديدة لقيت زوج بنات ثم عندهم الجمال و يضالو يضحكو ....و انا عكسهم تماما داءما في حزن .....كي نقارن نفسي بيهم نحير نقول لاه ربي دارهم هكذا وانا دارني هكذا ....و مبعد نقول هوما ثاني عندهم ابتلاءات و احزان ميبينوش برك ....

.و ارجع الى نفس السؤال و هو ....هل الارزاق و الابتلاءات مقسمة على الناس بالتساوي ؟؟؟؟ اعلم ان الله عادل في تقسيمه
لكن لاه كاينة وحدة متزوجة و ووحدة عانس ...و لاه كاينة وحدة جميلة و وحدة مهيش جميلة ...و لاه كتبن وحدة تخدم خدمة مليحة و وحدة ملقاتش خدمة او تخدم في خدمة سيءة ؟؟؟؟ لاه وحدة عندها اهل ملاح ويدعموها و وحدة عندها اهل يضالو عقابها يدمرو فيها ؟ اريد اجابة مقنعة رجاءا

[ع.عيسى]

اظن أن حزنك سببه قلة الثقة بالنفس لا اكثر ...تلك التي ترينهم اجمل منك ربما في الواقع انت اجمل وافضل منهم ولكن اتعدام الثقة بالنفس جعلك ترين عكس ذلك

[متفائلة في زمن الياس]

المشاركة الأصلية كتبت بواسطة مشكلتي

عندي مشكل و هو مقارنة نفسي بالاخرين ارجو مساعدة منكم
مثلا صديقتي اللتي كنا نتشابه في نفس السن 29 سنة ،،،، تزوجت تعرفت على شخص من المسنجر ثم التقت به ثم تزوجت به ...و انا مازلت عازبة و لا املك حتى صديق
الشيطان او لا اعرف من داءما يذكرني بها في كل دقيقة 24 ساعة يقول لي هي تزوجت بزوج صالح و قاري و مليح و انت مزلت متزوجتيش و مش حيجيك شخص اخر كيفها .....ثم اصاب بحزن و اكتءاب شديد .....لا اعرف كيف اخرج منه .......اريد ان انساها و ان لا اقارن نفسي بها لكن لم لا استطيع
خاصة ان عندها اهل مدلينها و انا عندي اهل يضالو يضلمو فيا
قضية المقارنة في رايي اهلك هوما لي ورثوهالك كانو ديما يحطوك في المقارنة بين ناس حتى وليتي تقارني وانتبهي راح تدخلي للحسد وتحسديي ناس على واش عندهم ونتي معندكش
و كذلك دخلت لخدمة جديدة لقيت زوج بنات ثم عندهم الجمال و يضالو يضحكو ....و انا عكسهم تماما داءما في حزن .....كي نقارن نفسي بيهم نحير نقول لاه ربي دارهم هكذا وانا دارني هكذا ....و مبعد نقول هوما ثاني عندهم ابتلاءات و احزان ميبينوش برك ....
هدوك لي تلقايهم يضحكو و..... لوكان تدخلي لخصوصياتهم تحمدي ربي ماراكيش في نفس وضعيتهم
ناس تع هد الوقت صاريلهم كما مؤثري مواقع التواصل الاجتماعي يورووولك غير هوما لي عايشين في جنة دنيا ونتي مسكينة وهوما متعرفيش البلاء لي راه مركبلهم سكر ولاطونسيو

.و ارجع الى نفس السؤال و هو ....هل الارزاق و الابتلاءات مقسمة على الناس بالتساوي ؟؟؟؟ اعلم ان الله عادل في تقسيمه
لكن لاه كاينة وحدة متزوجة و ووحدة عانس ...و لاه كاينة وحدة جميلة و وحدة مهيش جميلة ...و لاه كتبن وحدة تخدم خدمة مليحة و وحدة ملقاتش خدمة او تخدم في خدمة سيءة ؟؟؟؟ لاه وحدة عندها اهل ملاح ويدعموها و وحدة عندها اهل يضالو عقابها يدمرو فيها ؟ اريد اجابة مقنعة رجاءا

شوفي الله لا يظلمم احدا (ان الله ليس بظلام للعبيد)
رزقك عند ربي (وفي السماء رزقكم وماتوعدون) واحد ماراح ينحيهولك
الابتلاءات موجودة للمسلم وللكافر وبما انو حنا ايمان تعنا ضعيف ابتلاء تاعنا يكون بسبب ذنوبنا وكل واحد في هد دنيا ابتلاؤه له شكل كاين لي مريض مرض عضوي وكاين لي مريض روحي زكاين لي زواجه متاخر وكاين لي بلا خدمة وكاين لي عايش بلا والدين وكاين لي مشلول نصفيا وكاين لي مشلول كامل وكاين الاعمى وكاين الاصم
الواحد يحمد ربي على نعم تاعو ابسط نعمة هي البصر ياك كون ربي ينزعها عليك تولي تشوفيها اعظم نعمة وهكذا حنا لبشر منعرفوش عظمة الله منين ربي يمنع علينا رزق لحكمة يعلمها هو نتذمر ونسخط ربي يهدينا
من رضي فله الرضا ومن سخط فله السخط ويبقى على حاله ولايتغير
اذا يا اختي الغالية لدي بعض النقاط سريعا ان غيرتها في نفسك يتغير حالك لان الله لايغير مابقوم حتى يغيروا ما بانفسهم
ابدئي صفحة جديدة مع نفسك تقربي من الله بالصلاة في وقتها
احرصي على وردك اليومي
اكثري من الدعاء بان يبدل الله حالك ويصلحك وادعي بالزوج الصالح وادعي لاهلك بان يكفيك شرهم وصدقيني راح تشوفي تغيير
اكثري من الاستغفار
الصلاة على النبي
تفقهي في دينك بسماع محاضرات ديننية
اقضي على وقت فراغك بهوايات تحبينهم حاولي تحسين الجانب الذاتي لديك بحضور دورات او قراءة كتب الخ
وكان تعملي كل هالامور صدقيني ميوليش عندك وقت تخممي هد تتخمام لانو الفراغ هو لي يخلي الانسان يفكر بسلبية
وكل شي ياتي بالتدرج والصبر والجهاد
وصدقيني انت جميلة ورائعة هكذذا يجب ان تنظري لنفسك واذا خممتي العكس ناس يولو يشوفك كما راكي تشوفي روحك
وسامحني اذا كانت هدرتي شديدة الا انه كما احب الخير لنفسي احبه لغيري
والسلام عليكم

[مراد سابقا10]

يا اختي الزواج والجمال ارزاق من ارزاق الله عزو وجل وارزاق الله عز وجل يقسمها بين العباد

وليس كل الناس متساوون في الرزق بل هم متفاضلون في الرزق فلو كان كل الناس لديهم ارزاق


وسعداء وجميلون وحياة بدون اي نقائص فهنا انتفت فكرة الحياة ذاتها القائم على ألإختبار ، فالله جعل

ألأرض دار اختبار ولم يجعل الأرزاق متشابهة في كلش ليختبر الإنسان هل يصبر ام لا ؟؟؟؟؟؟

فانت لربما خلقك مقبولة الوجه وصديقاتك جميلة الوجه ليختبر ايمانك ، ولكن لا تنظري الى ألأمور

بهذه الزواية فلربما لو تتطلعين على حياة صديقتك التي تقارني نفسك بها لربما عندها من الكروب

والإبتلاءات ما ليس عندك ، اضف هذا الباب الذي يدخل منه الشيطان ويجعلك تقعين في

الحسد وهو باب المقارنة فاحذري خاصة هي صديقتك لا قدر الله ويصدر منك اي سيء اتجاهها

ولتعرفي شيء مهما اختي كما قيل الله يعطي الدنيا لمن يحب ولم لا يحب ولكن يعطي الاخرة فقط لمن يحب

فاجعلي نفسك مرضاة الله والفوز بالجنة وهناك السعادة الدائمة واللذة الكاملة .

[أم رقية نسرين]

عجبتني تاع لا زلت عازبة ولا أملك حتى صديق!!!!!!!! منيش راح ناقشك في هاد الكلام
المهم نتي حاولي تعمري وقتك شوفي والله كون نخمو شوية برك نعرفو قداه رانا مقصرين في أمور ديننا هادا الشيء لي يهمنا صح نتولهو بيه لانو هو لي ينفعنا غدوا.....الشيطان يا ختي رايح لجهنم و خدمتو يدي أكثر الناس معاه ...دائما اتعوذي من الشيطان و شوفي مدرسة قرآنية اقراي فيها صدقيني راح ترتاحي بزاف بزاف ....إما أمر الزواج هو مكتوب ربي إذا جاك نصيبك واحد ميقدر يحكمو التجئي لله سبحانه وتعالى
الناس مشي كيما تشوفيهم من الخارج كل واحد عندو همو وكل واحد بتمنى نفسو في بلاصة الآخر ..هدي دنيا رانا غير مسافرين فيها ..ومعلاباناش وقتاش الرحيل لازم نوجدو الزاد لي ينور علينا قبورنا
عيشي حياتك بما يرضى الله سبحانه و ادعي ربي و كل حاجة يكتبها ربي سبحانه وتعالى فيها خير لينا شفناه و لا مشفناهش
الحمد لله على نعمة الإسلام وكفى بها نعمة

[حورية تو]

أنصحك بنصيحة قيمة طالعي الكتب يقدر ما تستطعين وستتغير طريقة تفكيرك جدريا

[sohaibdz]

اولا : مع احترامي لك هذا حسد ليس مقارة
ثانيا : عليك الرضاء بقدرك
ثالثا : العمر فان و لو طال اما الفوز هو الفوز بالجنة

[zahozo]

تقريبا نفس المشكل اني انقارن نفسي بغيري ولكن عندي مشكل اخر هو لي سببلي المقارنة
قبل ماكنتش مهتمة بالمقارنة بزاف نقارن نفسي بغيري غير في حاجة وحدة وهي القراية والخدمة وممبعد تخليت على الفكرة وكلشي
من عام التخرج بالسيف لا لقيت مكان عمل مستقر نهار لي لقيت قلت رتحت حتى الصدمة صاحبت وحداات من الخدمة وحدة قريبة لي فالعمر و النمامة بنفس سني والمنافقة اكبر مني ب 4سنين وكامل متزوجات من 7 سنين (بالنسبة ليا عادي وما يهمنيش) المشكل ولاو يقارنو في رواحهم بيا تالمو مانيش من النوع لي عايش غي على لبستو وماكلتو بالعكس كل مصاريفي وتخمامي رايح للدار تامنوا كل مرة يقولولي ياسعدك ماعندكش اختك وعايشة غي مع خوتك الذراري وماكاش لي يحكم فيكم -_- والله تصدمت وقريب مرضت نفسيا
ماحسوش وماجربوش شعور تروح للدار لا ام لا اب لا اخت تحكي معاها ما غير رجال يروحو نص الليل وقليل وين تصحلك تحكي معاهم
ما حسوش واش معناها تتربط في االخدمة من 08 صباح ل 5 عشية وتروح للدار تقضي وتفرس كل يوم ما عدا الجمعة لي تخمم تريح فيها تظهر خدمات اخرى

وصلت بيهم حتى دارو النميمة بيني وبين الخدامة لي معايا وصاحبة العمل من ثم قررت نعتزل الناس ونخدم خدمتي ونروح للدار ومانزيد نحوس على حتى واحد ومازالني نخمم نحبس الخدمة رغم انها باب الرزق الوحيد بالرغم نخدم في خدمة اقل من مستوايا بكثير .
ومانكذبش كي كانو يقولولي هكذاك دايما نبكي ونقارن نفسي بيهم وبغيرهم ونقول يا ربي علاه هوما عندهم والديهم وخياتاهم وسند وانا طفلة ماكاش نحكي معاها في الدار مي كي جبدت روحي عليهم ارتحت نفسيا والمقارنة قلت

فهمت بلي الانسان يلزمو يقتنع بنفسو ويحب ذاتو ويرضى بمكتوبو مهما كان الحال ويحاول يسعى للاحسن

[Rofrof]

علاه لي تزوجت دايما رح تكون مهنية؟ ولي يتزوج رح يضمن يدوم زواجو؟ ولي يبانلك عندو دراهم* وعندو شهادة وناجح ومتفوق دايما تصيبيه فرحان!! حنا فدزاير تصيبيه مديون وساكن فبراكة المزيرية كالياتو ومايجيه لا اكتئاب ولا يخمم فالانتحار ، لي عايش فالغرب تطور وتكنولوجيا وحقوق الكلاب ماشي غير الانسان ومعدلات الانتحار والضغط النفسي وزيارات الطبيب النفسي المرتفعة ،* علاش! لانو هادي دنيا وليست جنة ، الكمال والعدل الكامل والسعادة الكاملة كاينة فالجنة برك، وهاد الدنيا هي مجرد اختبار ، مارحش تكون كل الاسئلة ساهلة..*
لازم تتعلمي حاجة ، بلي ماكاش سعادة ولا هناء مطلق*
ميغان ميركل دات الأمير هاري دوقة في لونجلوتاغ وقالت بلي كانت تخمم فالانتحار!!
بش تعيشي مهنية لازم تغيري طريقة تفكيرك*
واحد راح للنبي ص قالوا تصدق عليّ ، الرسول ص اعطالو تمرة ، امالا ماعجبوش الحال قالوا كيفاش انت نبي تتصدق بتمرة ) ! جاه وحداخر النبي كيفكيف اعطالو تمرة قالو ياااااه تمرة من رسول الله! وفرح بيها فرحا عظيما.* كوني مثل الثاني احمدي ربي ع الصحة اولا كاين لي راهم مرميين فالمستشفيات ومارهمش يقارنو بينهم وبينك، وكاين لي عاشوا كثر مما عشتي تحرش واغتصاب وخلي وخلي .. احمدي ربي هانت ايدا جات ع الجمال اتعلمي تتهلاي فروحك وتتجملي (بدون مبالغة) ولا عليك من جماعة كل شي لا يجوز ، المكياج راهو يرجع جعفر نانسي ، اصبغي شعرك اتهلاي في بشرتك الخ .. ديري سبوغ .. الجمال مكلف ومتعب مكاش حاجة جي بالساهل* وكي نقول هكا ماشي قصدي كي تخرجي حتى فالدار اتهلاي فروحك هادا* رح يبني ثقتك في نفسك تجملي لنفسك اولا ، حنا اللله غالب تعلمنا امور خاطئة المراة ماديرش مكياج حتى نهار عرسها ماتصبغش حتى قريب عرسها ماتديرش هادي حتى تتزوج ربطولنا حياتنا بالزواج لي ماتتزوجش ماتعيش علابيها البنت تشوف الزواج هو مفتاح للحريو وبش تعيش انوثتها ! المهم
كوْني نفسك اقراي كتب وتثقفي في وقت فراغك هادي هي الحاجة لي تفيدك اما الهم والغم والحسد والغيرة راكي تضري في روحك قبل ماتضري لخرين.
كي تشوفي حاجة تعجبك في لوخرين قولي ماشاء الله* وادعي في قلبك ربي يباركلهم ويديم عليهم النعمة* وقولي الدعاء )فعسى ربي ان يؤتين خيرا مما اتاهم ) جاهدي نفسك* تؤجري ع هذا.

وبالنسبة لداركم ماتسمعيش لاي شيء محبِط منهم كاين ناس هكا مايخرج منهم غير السلبي، لا عليك منهم واحسني اليهم بالمدح بالاك بالاك يتحسنو، " اللسان الحلو يرضع اللبؤة "
ديري سبوغ رح تخرجي* الطاقة السلبية لي فيك وتحسني مزاجك،وتشوفي نتائج ع جسمك
تحوسي تضحكي اتعلمي تضحكي وخليكي من النكد العلم بالتعلم والحلم بالتحلم كما جاء في الحديث. يعني تدرّبي ع انك تكوني متفائلة وبشوشة

الزبدة:*
كلما يجيك في بالك فلانة ولا مقارنة قاطعي هاداك الوسواس لانه قد يكون من الشيطان* ادعي للانسانة هاديك وادعي لنفسك واشغلي نفسك حتى لا يطول* . صدقيني هادا حل مليح لانو انا تان نقارن كي نشوف كوبل هههه ومايفيد معايا غير هادا*

ان شاء الله تستفادي ماكتبتش جورنال باطل 🙄

[أمة العزيز]

من رضي فله الرضا ومن سخط فله السخط

[katiya]

راك غالطة زواج وجمال لايجعلان الانسان سعيد سعادة ترضي بنفسك وتحاولي تقارني نفسك بنفسك ماشي بناس كل انسان عندو مشاكل في حياتو وكون يبقى انسان يشوف لاحسن منو لاتنتهي لازم اطوري من نفسك وتحاولي تتعلمي حرفة مع العمل تاعك او لغة وتخطي لحياتك باش تكوني سعيدة اكثر راح تولي تشوفي دنيا بنظرة اخرى وربي يفرج