شوفولي حل تعيشو

[ASMA 19]

صباح الخير عليكم ان شاء الله راكم كامل ملاح حبيت نحكيلكم حكايتي لراهي قتلتني وكسرتني انا راجلي عندنا 9 اشهر واحنا مخطوبين وبعاد على بعضانا ب 200 كلم تخطبنا عادي خطبة تقليبدية بعدها ب 21 يوم عقدنا العقد المدني دارلي السبة ب دوسي تاع السكنة وعقدنا من بعدها بديت نشوف وجهو الحقيقي انسان معقد وكاراكتير تاعو صعيب
كل خطرة نتهاوشو يهددني ويقولي نطلقو من بعدها اليوم ل بعدو يقولي سامحيني ونبداو صفحة جديدة انا ك الدابة حاشاكم نسامحو مالقري يهيني ويجرحني هذا غير باش مانوصلش معاه للطلاق خاطاكش انا ضد الفكرة هادي وحتى على حساب راحتي

المهم وحنا هكذا ديما ساعات انا لنسمح من حقس ونسامحو جامي فرحت بلي راني وحدة مخطوبة بالعكس حتى كعقدت بكيت تصورو مافهمتش لاه من بعد قالي يا اسماء انا حاب تبعتيلي الفوطو تاعك ومنا بدا المشكل قتلو ايه كيفاش نبعتهالك ارواح عندنا لدار شوفني من بعد نعطيهالك قالي لا لا مانيش قاعد ابعتيهالي بار بوست انا قلقت بعتلو ميساج قتلو كون جيت تخاف على عرضي متقوليش هكذا من بعد جاب ربي بابا رايح لتم باش يخرج كواغطو قتلو راهو جاي بابا ثم نبعتلك فوطو تاعي معاه قالي كون تبعتيهولي نقطعو ومن قبلها تاني حاب يسيريني قالي حبسي لخدمة قتلو انا مادامني تحت جناح بابا هوليصرف فيا كنجي عندك وتحب تحبسني نحبسها

ك راح بابا لثم بابا بنيتو رايح معلابالو بوالو وانا ماقلتش لدارنا على المشاكل لصراولي معاه ك وصل بابا لثم قالو انا بنتك ماتساعدنيش من القلقة بابا عيطلي قالي واش بينك وبينو وهو كان معاه قتلو والو قالو انا وياها منتفاهموش ولازم نتفرقو بالتراضي ولا بابا كالحلوف قالو انت لروح طلقها وانا نخسرك حق مامرمدتها حاط بنات الناس لعبة

من بعد ولا هو يحاول في بابا وماما باش يرجعلي ودارنا محبوش بعث امو حكات ماما والو تاني ومن بعد مرت خالو يعني كل لا فامي تاعو باش يحاولو دارنا قالهم انا كنت مقلق وهي زادت عليا وعصاتني ياخي راهي مرتي

من بعد وليت انا رجعت تلفوني وحكيت معاه قتلو واش تحوس عندي ياخي منساعدكش قالي اسمحيلي وهدا شيطان دخل بيناتنا ودرانا كانو رافضين بكل اني نرجع ليه وجاء خطبني قداش من واحد في الفترة هاديك بصح انا حكمت فيه هو قلت مانغدرش بيه وزايد نحبو ونعرف بلي ظروفو صعيبة والله راني نكتب ودمعتي على خدي من انا نحكي معاه في التلفون ودارنا معلابالهمش يعني بالدرقو عليهم وديما يعيطلي ويقولي عندكي تسمعي هدرتهم وانا نحبهم وجامي نخليك وصلت حتى سجلت هدرتو ماصدقتش واش يحكي سجلت هدرتو عندي من بعد قاتلي ماما دبري راسك انت لخاسرا في الاخر وماتجيش تشكيلنا وكتروحي عندو ويطلقك ماتوليش انا بكيت وخفت بصح حبيتو واش ندير

قاتلي شرطي يجيبلك خاتم كاناس ويقرا المعروف من بعد قبل مايجي يقرا المعروف قتلو انا جاوبني بصراحة اذا راك حاب نكملو نكملو واذا لا لا انا نسهلها عليه انت ماتخسر وانا مانخسر قالي عيب عيب عليك هاد الهدرة انت ليا وانا ليك انا صدقت وقالي انا وحدة نبغيها ماننجمش نسمعها لكبيرة ودركا عندنا 3 اشهر ملي درنا المعروف كان معايا فهاد الشهرة ملاك وحكاياتي معاه كنت نحكيهم هنا بينلي بلي يحبني ....الخ

وقالي واحد النهار يا اسماء انا منستاهلكش انت بنت فامليا وانا كبول حاشاكم مانيش حاب نخدعك قتلو لالا متزيدش تقولي هكا انا نحبك وكون ماجيتش ولد فاميلا مانكملش معاك قالي عندك تسمحي فيا مهما يسرا قتلو انا منسمحش فيك غالا سمحت فيا انت

وجاء اليوم الموعود بعتلو ميساج قتلو كراك تحبني استعرف علاه تكابر بالعكس كنحسك هكداك انا تاني نزيد نحبك كثر وكثر عيطلي فاليل وقالي انا منحبش ونكره النسا هوما سباب مشاكلي وانا مانيش رايح نزوج نقعد هكا مانخمم ف حتا حاجا قتلو انا وانا علاه مديني قالي زوجة نديرو اسرة وخلاص قتلو مالا علاه كنت تكدب عليا وتقولي نحبك ومانسمحش فيك وووووو قالي انا قالولي لمرا لازم تكسبها بالحنانة قتلو مالا ليوم راك خسرتني كوبا عليا التلفون ومن بعد كتبلي ميساج قالي اني مانحبش سامحيني وغدوا الصباح بعتلي ميساج نحبك انا صدقوني هبلت مالقيت واش ندير مع هاد الراجل المهم من بعد العشوا عيطلي قالي واشراك سافا الحمد لله قتلو انا راك تهنيت مني قالي علاه واش درتيلي ولا تحوسي تجبدي روحك قتلو درك نبعتلك ميساج تفهم فيه كلش بعتلو هاد الميساج قتلو انت بكلامك هاداك راك خسرتني كسرت قلبي وانت كنت عارف شرطي معاك باش نكمل معاك خاطاكش حبيتك وياريتني ماحبيتك سمحت ف كل حاجة غير علاجالك عزيتك حتى كترمن والديا خيرتك من دوم الرجال صدقتك وتبعتك ف الاخر كنت تكدب عليا انا ماغضنيش ك ماحبيتنيش انت حر انا قاضتني ككدبت عليابصح كيما فراقس عندك ساهل درك يسهل عليا
بعتلي ميساج وقالي اسمحيلي ياسر باي
عيطتلو خطرتين وهو يكوبي عليا من بعد هز وقالي واش تحوسي قتلو فهمني مافهمتش قالي افهمي كيما تحبي وبركي ماخسرتي لكريدي غدوا نحكو قتلو لالا درك كوبا عليا
بعتلو ميساج قتلو اكتبلي ميساج هنيني فيه بعتلي واحد قالي فيه مالقيتش السعادة ل يقولو عليها
جاوبتو وقتلو مالا اسمحلي باي
زاد جاوبني وقالي انسايني طول لعمر أ م
رديتلو انسايني طول لعمر اكي مسرحة قتلو مادامك سرحتني درك انا نحي تلفون ماعندي علاه نخليه بقالك غير احكي مع درنا وتفاهم معاهم ودير رايك

رجعلي قالي احكي انت مع داركم وارواحو نفروها بالتراضي سامحيني

انا صدقوني هبلت مالقيت ماندير تفكرت كلامو لكخلاني نتمسك بيه نبكي حتى تحرق قلبي عييييييت وكرهت وانا دارنا مانقدرش نقولهم والله يذبحوني عيطتلو قتلو علاه درتلي هكدا وانا مانحيش مع دارنا تهنا احكي معاهم انت قالي مالا اقعدي هكا عشر سنين
والله غير تمنيت الموت على الكلام لسمعتو كيفاش تبدل عليا دربة وحدة وعلاه بقيت حايرة والله تشوفو حالتي لعدو تبكيه وقعدت الحرقة في قلبي ماقدرتش نحكي لدارنا ولا نخليها في قلبي ماني مزوجة ماني مطلقة

اسمحولي طولت عليكم بصح ربي لعالم قلبي قداش راهو معمر ومالفيت بيها وين

سااااااااااااااااااااااااااامحوني

[الجزائرية المحبوبة]

بارك الله فيك اختى
كي اصبح باباك ولا بابا كالحلوف

[سجل أنا جزائري]

كون تبعتي والديك ما صرالكش هكذا

من لول كان قبيح معك مي نتي ما حبتيش دخليها في راسك

روحي أطلبي سماح من والديك و احكيلهم وش صرى

راجل كيما هكذا نورمالمو تفرحي كي تفارقتو ربي يسهلك

[homme libre 05]

السلام عليكم
اولا ما تلومي غير نفسك لأنك كنتي ساذجة
اظن ان هاذ السيد ديما يقولك ما تستاهلينيش ، يهدر هدرة ومبعد يرجع فيها ، هاذي اثار واحد يتعاطى مخذرات او الخمر ( فرضية حتى لا نظلمه ) ، كان عليك مع لول كي شفتيه حبس معاك على جال سبب تافه انك تحبسي و تتهناي منو لانو اذا دارها مرة يقدر يعاودها 10 مرات ، و نحير فيك كيفاه ربطتي روحك بيه مرة اخرى وقبلتي تعيشي بقية حياتك معاه ....
الحل :
نتي ضرك وصلتي لطريق مسدود معاه ضرك نحيه من بالك ، حاولي تخبري والدتك لانها هيا لي قريبة منك و شوفو حل وبإذن الله خير ..
عليك بالصلاة والدعاء والاستغفار و قراءة الاذكار والتقرب من الله ، وقبل اي قرار مهم في حياتك ادي صلاة الاستخارة والباقي على ربي .

ونصيحة للبنات ، ليس الزواج هو السعادة في الحياة بل يمكن ان يكون بداية الجحيم ، لذا فلا تتعجلوه وديرولو الف حساب
ربي معك ، بالتوفيق

[اريج06]

السلام عليكم
والله يأختي أسماء راني حاسة بيك ربي يكون في عونك ويسهلك منكذبش عليك الراجل اللي اي حاجة يهدد بالطلاق والله ماتفرحيلو حكايتك تشبه لواحد نعرفها والله من نهار تخطبت وهي تبكي دايما يهددها بالطلاق يقوللها نجيبك للدار ونطلقك وهذك هي الهدرة هي حسبت كان يحبها وهو العكس
حتى انت احكي معاه وتفاهمو ضرك خير من بعد اذا سقم روحو ربي يجمعكم مع بعض واذا قعد كيما كان ربي يسهلو وانت ربي يعوضك بخير منو

[abdel02]

هذا أنا عياني...كيفاش رايحة انتي تعيشي معاه طول حياتك..
الرجل رجل بكلمتو...ماشي بالموسطاش والا السروال...
ربي بغاك خاطرش بان على حقيقتو قبل العرس...والعيب جامنو ماشي منك
لأني انا كرجل كي نجي نخطب وحدة نخطبت وبطلو عليها...نحوس على الاسباب
صلحي الوضع واحكي مع يماك...فهميها بلي راكي حابة تاخذي رايهم...
سهليها تسهال...وربي يعوض عليك براجل حنون.

[rma]

هدري مع والديك ما يفوتوكش لخاطر راكي بنتهم و إنشاء الله يعوضك خير منه

[abdel02]

المشاركة الأصلية كتبت بواسطة homme libre 05

السلام عليكم
اولا ما تلومي غير نفسك لأنك كنتي ساذجة و غبية

الله يهديك يا أخي...
أنت لا تؤمن بالقضاء والقدر...
ألم تعلم أن الله خلق الإنسان عجولا...
ومن قبل عصيان سيدنا أدم لرب العالمين...
أم أنه هو أيضا غبي وساذج...

[dahbi01]

أختي اخطيــــــــــــــــــــــــــــــــــــــــــــــ ـــــــــــــــــــــــــــــــــــــــك منو
ماعليهش الطلاق المهم الي يتقدم لك من بعد قولي ليه على حالتك

[nono hydrau]

في الحقيقة تمنيت اني نساعدك بصح للاسف انت درتيها بروحك كيفاش تسمحي في عائلتك علي جال واحد كنت عارفة انه مش مريقل واذا ما كان بينتكم والوا وهدر مع باباك بهذه الطريقة ووصلت المواصيل بينكم حتي هذا الحد ورجعت شديت في الريح وطلقت الصحيح
في الحقيقة انا عيت نلقالك عذر ما لقيتش صح الواحد كي يحب واحد يغفرله بصح كاينة حاجة اسمها كرامة ومش كرامتك راهي كرامة اماليك لي هي اكبر بكثير من كرامتك والمفروض تسمحلي لي يغلط فيه بصح لي يغلط في باباك مستحيل تسامحيه
بصح نصيحتي ليك انك تقولي لداركم وتتحملي مسؤولية اختيارك واحسن انها جاءت درك خير من كنت تتزوجي بيه وتجيبي صغار يزيدوا يعقدوا مشكلة الطلاق ويتعبوا هم ثاني في شئ ما عندهومش ذنب فيه
واكيد عائلتك راح تقف معاك في كل الاحوال وهذه المرة من مصلحتك انك تاخذي راي عائلتك ما تديري حتي شئ ضد ارادتهم لانه ما كانش واحد يعرف مصلحتك ويحبلك الخير اكثر منهم
ربي يسهلها عليك ويوفقك ويبعثلك لي خير منه
تحياتي

[ASMA 19]

نشكر كل واحد نصحني ربي يخليكم وهذا الشخص ل قالي ساذجة وغبية ربي يسامحك ماراكش تعرفني باش تقولي هاد الكلام وانا طلبت منكم النصيحة ماش الاهانة اخي

[homme libre 05]

المشاركة الأصلية كتبت بواسطة abdel02

الله يهديك يا أخي...
أنت لا تؤمن بالقضاء والقدر...
ألم تعلم أن الله خلق الإنسان عجولا...
ومن قبل عصيان سيدنا أدم لرب العالمين...
أم أنه هو أيضا غبي وساذج...

امين يا رب بارك الله فيك اخي الفاضل
صفة السذاجة تكون في الانسان وليس في الخالق وانا لم اقل هذا

الله خلقنا و خلق لنا عقول لنفكر بها حين نكون في مشكل او امر هام في ديننا ودنيانا
كلنا نؤمن بقضاء الله والحمد لله لكن ..
ماش نديرو حاجة و نحصلو رواحنا بإيدينا ونقولو قضاء الله وقدره وحنا كنا قادرين نتجنبوها ،،
نروح نطيش روحي فالنار ونقول هذا قضاء الله ؟؟ ما تصلحش يا اخي

اتمنى ان تتفهم وجهت نظري انت والاخت التي لم اقصد الاهانة لكن تلك الكلمات من اجل التنبيه و العتاب فقط
بالتوفيق اخي وبالتوفيق لصاحبة الموضوع .

[الدكتور شهاب الدين]

نســأل الله الهدايــــة والتوفيـــق....
الآن أنصحكـ أن لا تفكري بالمشكلــة بل فكري كيف تتجــــاوزي المشكـــلة ،،
حــاولي تصليـــح العلاقــات مع عــائلتكــ بذكـــاء ،
وفي الوقت الراهــن تجــاهليــ خطيبكـ تمــامــاوكــأنــه لاشيئ يذكر ،
إسترجعي عزة نفسكــ .........
بالتوفيــق لكـ.......
سلامـ....

[ASMA 19]

المشاركة الأصلية كتبت بواسطة der chiheb

نســأل الله الهدايــــة والتوفيـــق....
الآن أنصحكـ أن لا تفكري بالمشكلــة بل فكري كيف تتجــــاوزي المشكـــلة ،،
حــاولي تصليـــح العلاقــات مع عــائلتكــ بذكـــاء ،
وفي الوقت الراهــن تجــاهليــ خطيبكـ تمــامــاوكــأنــه لاشيئ يذكر ،
إسترجعي عزة نفسكــ .........
بالتوفيــق لكـ.......
سلامـ....

شكرا اخي الف شكرا هو عيطلي وقالي اسمحيلي انا راني مانسمحش فيك وانا قاعدة غير نبكي غاضتني روحي مالقيتش الحل وينو راني حرت

[الجزائرية 1995]

المشاركة الأصلية كتبت بواسطة asma 19

شكرا اخي الف شكرا هو عيطلي وقالي اسمحيلي انا راني مانسمحش فيك وانا قاعدة غير نبكي غاضتني روحي مالقيتش الحل وينو راني حرت

سامحيني اختي راهي مسح بيك الأرض قدام داركم بلا ما نهدرو على كرامتك إذا كان هو مريض نفسي إنت كوني عاقلة واحترمي نفسك وإهلك والله غاضني باباك الظاهر يحبك وإلا ميقبلش بيه مرة أخرى أفسخي عقدك معه لعن الله هذا الذي تسمينه حبا هذا إهانات اكسبي والديك وصالحيهم ماتلقايهم غير هوماوسامحيني أختي