غريبية الكوكاو من مطبخي سهلة وبنينة وتذوب في الفم

[*زهرة اللوتس*]

السلام عليكم
الجميع يعرف الغريببة ويعرف يخدمها، حبيت نشارك بطريقتي السهلة بلا باتور وبلا تعب، وتجي بنينة وهشة تذوب في الفم وكانها قطن هههه

المقادير:
* كيلة سمن بحرارة الغرفة ماتذوبيهش
* كيلة سكر رطب
* كيلة كاوكاو محمص مليح في الفور ومرحي رطب (حتى ولو تعجنلك في الروبو معليش )
* نصف كيلة زيت
* الفرينة تحبي ديريها كيما راهي او تحمصيها في الفور، انا حمصت زوج كيلات
لافاني اختياري مش ضروري

التحضير:
حطي السمن والزيت في وعاء وخلطي شوية حتى يتجانسو مع بعضاهم ، زيديلهم السكر الرطب مغربل وحركي بالمغرف فقط تاع الحطب بلا ما تستعملي الباتور، فقط تتجانس المكونات ويدخل السكر في السمن والزيت



ثم الكاوكاو المرحي رقيق ( انا رحيتو حتى ولى عجين) هنا تقدري تستعملي فوي (fouet manuel) فقط باش يتحلو جزيئات الكاوكاو المرحي مليح في الخليط
ثم اضيفي لافاني والفرينة حتى تتحصلي على عجينة متماسكة كيما تاع الصابلي



شكلي الغريبية تاعك كيما تحبي وطيبيها على 160 درجة حتى تشوفيها تنفخت وتشقت راهي طابت زيديلها تحميرة خفييييفة من فوق ونحيها من الفور، ماتغفليش عليها راهي ساهلة في الطياب (انا شكلتها هلالات وزينتها بكريات صغار تاع عجينة الكاوكاو اللي بقاتلي)




خليها في البلاطو حتى تبرد تماما واذا البلاطو تاعك يدخل الفريجيدار دخليها وخليها حتى تبرد مليح ونحيها من البلاطو بالإستعانة بسكين او coupe pâte
انا زينتها بالسكر قلاسي والشكولا غبرة





ان شاء الله تكون عجبتكم بنينة بزاااااف وهشة بزااف حتى اللي مايحبش الغريبية يولي يحبها
سلامي للجمييييييييع

[سوسو المغتربة]

ماشاء الله تبان بنييييييييية وسهلة يعطيك الصحة نجربها أن شاء الله اصلا مهما نجربو وصفات جديدة تاع قاطو مرجوعنا للغريبية والصابلي ههههه
في ميزان حسناتك اختي

[Oum Aness Bba]

السلام عليكم ورحمة الله وبركاته
هاااايلة يعطيك الصحة .. انا ثاني نديرها بنفس الطريقة وصح تجي هشوووشة هائلة والأهم بنينة
بارك الله فيك.

[*زهرة اللوتس*]

شكرا حبيباتي على الردود المشجعة، ربي ينورلكم طريقكم

[حياة نور الدين]

بارك الله فيك رووووعة خاصة من تحت يديك حنونة

[fati13]

باااارك الله فيك ختي تهبل يعطيك الصحة

[كوثر التائبة]

ماشاء الله خرجت تحفة راح نجربها يعطيك الصحة

[*سندوسة*]

وعليكم السلام ورحمة الله وبركاته
ماشاء الله جاتك تحفة بارك الله فيك

[شمس الملوك]

يعطيك الصحة

[paloma.laila]

mashallah a3lik ukhti njarabha inchallah basah bnesf lmaqadir

[princesse18]

ï؛‘ï؛ژï؛*ï»™ ï؛چï»ںï»*ï»ھ ﻓﻴï»ڑ ï؛*ï»*ï»*ï»*ï»*ﻋï؛”

[دنيا الامل 18]

روعة شكرا جزيلا

[nanoua7]

هايلة يعطيك الصحة

[انا هي رزيقة]

واو ربي يباركلك في دوك اليدين يا الفحلة و الله تبان تحفة مشاء الله عليك

[edelweiss_dz]

ماشالله:هايلة