واش رايكم في تصرفي ؟

[imane1]

السلام عليكم ورحمة الله وبركاته


صحا رمضانكم وكل عام وانتوما بخير

تقبل الله منا ومنكم واعاننا واياكم على صيامه وقيامه



من أين أبدأ ,,, من أين أبدأ ..

حسنٌ


نجحت بفضل الله في شهادة البكالوريا , فكافئني خطيبي بهدية (غالية شوية )

جابلي gورمات (سوار ) تع ذهب .. كان بعثلي الهدية مع خويا

تسلمتها من اخي وشكرته وفرحت بيه و درتو في يدي ورقدت بيه ..



غدوه من داك وانا قاعدة وشاداتو (السوار) في يدي جا في بالي تسائل خطير

هل يكون خطيبي المصون أعلم والدته بالهدية أم لا ؟

يعني بطريقة اخرى

حماتي رأت السوار أم لم تره ؟


الناس العاقلين اللي كيما انا يفكرو في أسوأ احتمال

اللي هو " لا " >>>>>>>>>>>>>وكاين اللي أسوأ احتمال بالنسبه ليهم " نعم "




المهم كل واحد وكيفاش يخمم وكل واحد حر في تخمامو




انا قلت لوكان يكون ما قاللهاش , غدوه ان شاء الله نتزوجو ويشوفوها في يدي

تعجبهم مثلا ويسقسوني واذا دارهالك باباك(كيما النا كامل)ولا شحال شريتيها ولا منين شريتيها

واش راح نقوللهم ؟

نديروها مثلا سقساتني يماه واش نقوللها ؟ نقولها لالا هادي جابهالي السبع تع وليدك كي كنا مخطوبين ؟

تفرح بيا وبيه



ولا نكدب ونقوللها لالا هادي شراهالي بابا ,, يسمعني السي راجلي يولي يقول حق الخير , انا نشرى وباباها اللي جاب


ايتسما كيما ندير حصلة





روحت لماما , اللي عقلها كبير ما شاء الله وفاهمة الدنيا خيرمني وجربت الامومة


قولتلها ماما راح نديرك في وحد الوضعية , اتخيلي روحك فيها وجاوبيني >>>>>>>>> انا تع مشاكل

قاتلي روحي ..

قولتلها اتخيلي محمد خويا غدوه ان شاء الله يخطب

قاتلي ان شاء الله

قولتلها ويشري عفسة تع ذهب لخطيبتو بمناسبة او بغير ما مناسبه

قاتلي ايه

قولتلها وما يوريهالكش .. يديهالها وما يوريهالكش حتى تشوفيها في يدها وبالاك هي اللي تقولك وليدك جابهالي

قاتلي والله غير نقتللللللللللللللو

يوريهالي ويديهالها معليش .. ياك انا يماه ؟





قولت في قلبي واش ادانا للقتيله ثاني ؟ وعلاجال سوار برك ...

والراجل مازالو صغير وانا محتاجاتو و راكم تعرفو كيفاش..





اتصلت بخطيبي وسألته " هل أريت السوار والدَتَك ؟ "

فأجابني بكل ثقة " لا "

قتلو ماقلتلها عليها ما شافتو ما والو ؟

قال مؤكداً " لا "



قتلو امالا اجي امبعد ان شاء الله كي يكون عندك شوية فراغ

نبعثلك السوار تديه ليما اتشوفو وتقوللها بلي راك شريتهولي بمناسبة نجاحي في البكالوريا

وهي اللي تجيبهولي بعد ذلك ان ارادت ...




قالي لالا ومافيها والو ويما لوكان تعرف راح تفرح وانتي راكي مكبرتها بزاف و و و

المهم هكذا ولا هكذا انا ثبت على رأي وهو ان أردها له كي يُريها والدته , هاذي يماه ماشي وحده من برا

ومقالش اختو , ماشي شرط يوريهالها

وتاني الحاجة اللي جابها غالية شوية

ماراهيش علبة شوكولاطة ولا كتاب ولا برفان ...




وحتى اذا كان متؤكد بلي يماه ما تزعفش معليش يوريهالها كيما يقولو ناس زمان " مخضة خاطر " برك



قالي اوكي كيما تحبي ,,

وبما انه من نفس حومتي فاننا اتفقنا ان ياتي عند البيت ونبعثهالو مع خويا الصغير

كي لا اسبب له احراجا مع احد ..

جا وكي وصل اتصل بي مجددا قالي يا ايمان الله يهديك خلي الغورمات هاذيك وبركاي ماتعقدي فيها

انا مارانيش نخبي على يما انا قلت حاجة بيني وبينك

قتلو بيني وبينك هاذي ماشي واحنا مخطوبين , هاذي راح تكون بعد الزواج ان شاء الله

اما الان فحديث اخر ..



ومافيها والو اذا جات من عند يما , هي راح تفرح كي تشوف وليدها مازالو داير فيها ثقة

واحنا نتجنبو مشكلة (ممكنة الوقوع مستقبلا )و نتجنبو مغايضة الاهل

وبعثتهالو ..










لما حكيت الموقف لوحده صاحبتي قاتلي أخطأتِ

لانك هكذا راكي تقوليلو بلي يماك لازم تعرف كل حاجة تكون بيناتنا

وقاتلي بلي اعطيت للموضوع حجم كبير مايستهاهلوش


تعددت الاراء يعني حول الموضوع



انتوما يا نسا .. واش رايكم , لوكان انتوما في بلاصتي بأمانه وصراحة كيفاش اديرو ؟

وانتوما يا رجال .. واش رايكم ؟ لوكان انتوما في مكان خطيبي واش يجي في بالكم كي اديرلكم الفيونصي تاعكم هاك؟




وشكراً

[farid1982]

وضعية ادماجية صعبة الحل.اتمنى ان ترضى عليك عجوزك

[(الانسان الوفي)]

السلام عليكم.....................خرفلك رمضان هههههههههههه

شيء عادي ان لا يوقل لامه ...وشيء عادي ان يقول لها ...الأمر راجع لشخصيته فقط ....

[كمال الاسلام]

وعليكم السلام ورحمة الله وبركاته





تصرفك جميل وعين العقل .



وسوف تكبريني في عين خطيبك وعين امه واهله





وفقك الله لكل خير

[عبدالرحيم75]

لوكان أمه هي التي أحضر ت الهدية ستقولين لخطيبك هذه هدية أمك وهديتك انت أين هي ؟؟؟؟؟ آه ...هههههههههههه
أختي راكي اعطيتي للموضوع أكثر مما يستحق ،خطيبك أدرى بأمه ،خليه يتمتع بأولى مراحل الإستقلالية في حياته الخاصة معك ،ويسروا ولا تعسروا

[ناصرالدين الجزائري]

هذا يسموه " الوسواس "

و هو أول مصدر للمشاكل الزوجية ...

ردي بالك

[أحـمـد]

أريد أن أسألكي بعض الأسئلة
1- عندما أحضر لك الهدية وتساءلتي ان كان أخبر أمه - هل أخبرتي أنت أمك بها؟
أنتي لم تخبريها حسب ما ذكرتي بل لمحتي لها
2-عندما أخبرتي صديقتي هل تذكرتي أنك لم تخبري أمك والتي هي الأولى والأقرب منك؟
3- عندما كنتي تريدين ارجاع الهدية له ليخبر أمه هل أخبرتي أمك بذلك؟
فكيف تريدينه أن لا يتصرف دون علم والدته وأنتي ...؟
على العموم أرجو أن تسامحيني على كثرة أسئلتي وعلى ثقل دمي
وأرجو من الله تعالى أن يكمل لكي ولناعلى خير ان شاء الله
كما أريد أن أخبركي أنني لم أقدم أي هدية لخطيبتي لحد الآن لذلك لم يحدث معي أي مشكل من هذا القبيل وعندما سمعت قصتكي فأنا لا أفكر في أن أهديها أي هدية لكي... (أنا أمزح فقط)

[* زهرة البنفسج *]

أختي أرى أنك حملت المسألة أكثر مما تستحق

جوابي عبارة عن سؤال : لو أنه أهداك كتابا أو بارفان هل كنت ستفكرين بنفس الطريقة

هل ستلومينه إن لم تر أمه كتابا هدية مثلا

أم الأمر يختلف بحسب قيمة الهدية

صح سحوركم

[وئام الروح42]

والله يا اختي انا خطيبي يحضر لي الهدايا دون علم والدته بها مادام شراهملي من حر مالوا ما نسيفش عليه يماه تعرف
الزواج هو استقلالية وشعور بالمسؤولية
حتي انا عندما اهدي زوجي شيئا ما يكون بدون علم والدتي
للوالدين علينا حق نقيموهم ونحظروهم في مراحل حياتنا
لكن الزواج استقلالية
ل اخ في البيت عندما يحكي لامي اي شيئ اقوم بتنبيهه بان حياته قد اختلفت يجب ان يعطي لامي حقه ولزوجته حقها
وان يضح بين الاثنتين حطا فاصل

[مشكاة الهدى]

الموضوع لا يستحق كنت قادرة تشديها وخلاص انا يظهرلي راكي حابة توري ليماه اي حماتك ولدها واش جابلك هدا مكان

[imane1]

المشاركة الأصلية كتبت بواسطة farid1982

وضعية ادماجية صعبة الحل.اتمنى ان ترضى عليك عجوزك

آمين

شكراً على المشاركة

[imane1]

المشاركة الأصلية كتبت بواسطة عبد الحميد؟

السلام عليكم.....................خرفلك رمضان هههههههههههه

شيء عادي ان لا يوقل لامه ...وشيء عادي ان يقول لها ...الأمر راجع لشخصيته فقط ....

وعليكم السلام ورحمة الله وبركاته

رأي جميل , لوكان قاللها مافيها والو

كي ما قاللهاش (عند الناس مافيها والو ) لكن عندها (الله أعلم )

دفع الضرر مقدم على جلب المصلحة

يعني في كل الاحوال الواحد يتجنب المشاكل


شكراً على المداخله

[imane1]

المشاركة الأصلية كتبت بواسطة كمال المشتاق للجنان

وعليكم السلام ورحمة الله وبركاته





تصرفك جميل وعين العقل .



وسوف تكبريني في عين خطيبك وعين امه واهله





وفقك الله لكل خير

على الأقل وجدت شخصا رأى من نفس المنظار الذي رأيت منه

العقل مليح

شكراً على حضورك

[imane1]

المشاركة الأصلية كتبت بواسطة عبدالرحيم75

لوكان أمه هي التي أحضر ت الهدية ستقولين لخطيبك هذه هدية أمك وهديتك انت أين هي ؟؟؟؟؟ آه ...هههههههههههه
أختي راكي اعطيتي للموضوع أكثر مما يستحق ،خطيبك أدرى بأمه ،خليه يتمتع بأولى مراحل الإستقلالية في حياته الخاصة معك ،ويسروا ولا تعسروا

أولاً / لست من ذلك النوع الذي يُطالب علناً بالهدايا

لوكان ماجاب والو , لا هو لا أمو , ماراحش نقولو جيبلي

ثانيا / هو كي جاب الهدية هاذي كانت جات يماه قبلو وهناتلي باللي قدرت عليه

وما قتلوش وين راهي هديتك ..

هو ولا يماه عندي انا كيفكيف , عمري ماجابو حاجه وبقيت نتسائل ياترى من اشتراها

هو أو أمه ؟

اذا كان هو اللي خلصها فهو ناس ملاح , ويماه كي رضات وجابتها , فهي ناس ملاح ثاني

كاين اللي كي ولادهم كاش مايحبو يشرو لخطيباتهم هوما اللي يوقفولهم ويعارضوا تحت مسمى " بزاف"


ثالثا /

عندما طلبت منه أن يُري الهدية لأمه لا أحسبني ضيقت عليه أو سلبت منه شيئا من استقلاليته

هو ابتاع الهدية دون علمها ,

ومن حر ماله ,

كفى بهذا استقلالا ..

أما أن يُري الهدية أمه

فتلك لباقة -فيما أحسب-

وتطييب للخاطر

وأمرٌ لازم عندي مادام لم يربطنا عقد شرعي بعد

نصبح بمقتضاه زوجاً وزوجة ..




أشكرك على تواجدك وتفاعلك

[imane1]

المشاركة الأصلية كتبت بواسطة big_hammer

هذا يسموه " الوسواس "

و هو أول مصدر للمشاكل الزوجية ...

ردي بالك

معليش اديني على قد عقلي وفهمني أكثر في مداخلتك

أجدها دسمة >>> بحاجة الى بعض التوضيح


في انتظارك أخي الفاضل

مع خالص شكري