مهزلة البرييد ارجو المساعدة ( كرهناااا )

[العصفورة 29]

السلام عليكم و رحمة الله

مانبداش كلامي بالتذمر و الشكاوي الي كامل كرهنا منها كل يوم واحد فينا تتمسخر بيه جهة ادا ماشي الجمارك عمال البريد الي ماعلابالناش اذا بدلو ديانتهم باليهودية مثلا

مؤخرا شريت هاتف عبر موقع تسوق و شحن عبر بريد سنغفورة الكل يعرفو يطول وماتقدرش تبعو لانو التحديث بحبس في المانيا

ولكن بعد 50 يوم شفتها طولت قلت نشوف مع مركز طرود الجزائر باش ادا كاشما حاجة نريكلامي مع البائع

نورمال هدر معايا هداك السيد راهو معروف باللباقة نوعا ما و راني شحال من مرة هدرت معاه قالي انو الهاتف دخل الجزائر منذ عشرين يوم و راه بعثناه لوهران و هما يبعثوهلك ( انا في ولاية معسكر ) قالي نمدلك رقم مركز وهران شوفي معاهم

عيطتلهم ردت عليا سيدة مديتلها رقم التتبع قاتلي سي بون رانا رسلناه لولاية مستغانم ؟؟؟؟؟؟؟؟ قلتلها لا يا سيدتي نورمالمو يجي لمعسكر

بعد ماخلتني ربع ساعة على الهاتف اون لين و بعد المشاورات مع زملائها قاتلي دوك نشوفو معاهم عاودي عيطيلي على نص ساعة

عاودت عيطت لا حياااة لمن تنادي من العشرة تاع الصباح حتى الربعة و نص تاع العشية مايردوووش

المهم الغدوة نعاود نعيط يرد عليا سيد محترم فهمتو الوضع قالي خلاص نورمالمو هدرو معاهم و رايحين يرسلوهلنا و حنا نعاودو نرسلوه لعنوانك قالي على اسبوع بالضبط شوفي في مركز البريد
فات الاسبوع و شفت و طبعا اكيد مكان والو

عاودت عيطت هدرت معايا نفس السيدة قتلها الوضع و يادرا قاتلي دوك نشوف شافت و قاتلي مازالو مارسلوهلناش على اسبوع شوفي في بريدكم انا ضربت يومين عاودت عيطت لانو فهمت بلي مكان لا اسبوع لا والو قاتلي ااه مازال مارسلوهش اعطينا 15 يوم قد مايرسلوهلنا و نعاوو نرسلوهلك على خاطر نوزنوه و فيها بزاف حوايج هاذي يوم الاربعاء الي فات قلتلها صحة مكانش مشكل ...

اليوم نعيط حسب مبدأ السامط يغلب القبيح ردت نفس السيدة و صوتها نجبدو في وسط 500 ألف صوت المهم عاودتلها نفس الهدرة كيفاش و كيفاش قاتلي ااه تاع معسكر قتلها انعم قاتلي انا ماعلاباليش ماراهيش خدمتي و l'agent concernée بيهم ماجاتش كامل اليوم قاتلي انا سمعت التليفون يصوني رفدت وماعلاباليش كيفاش قضيتك قلتلها و كيفاش عرفتي بلي انا تاع معسكر ؟؟؟ ( فبهت الذي كفر ) سكتت المخلوقة 5 دقائق بالتمام و الكمال قاتلي سمعتهم يهدرو عليه في المركز ,,, ايهيه مليح قلتلها ماعليش مديلي النميرو تاع مركز مستغانم نشوف الباكي تاعي كيفاش قصتو معاهم قاتلي مانعرفوهش عيطي ل 19 يعطولهك ,,,,, سياسة الإستحمار هادي 19 واقيلا من 97 ماكانش و نورمالمو راهم عندهم كامل الخطوط و انتوما مين ماتعرفوهش كنتو تهدرو معاهم بالطالكي والكي مثلا ؟؟


المهم كرهنا و كرهت و حلها ماعلاباليش وين

اعتذر عن الإطالة و ان كان احد عندو رأي ولا فكرة غير يعطيهالي لانو قريب نهبل من هاد الناس

شكرا امسية سعيدة

[خالد الجبلي]

كلمي مركز الطرود في العاصمة و ديري احتجاج عندهم و ثاني كلمي البائع و هو يدير احتجاج عبر البريد لأنه مسجل و ما مضيتيش على السلعة
و هم يتحملو المسؤولية
ما تكلمي لا وهران لا مستغانم

[العصفورة 29]

انعم اليوم عيطت لمركز االعاصمة و لكن الهاتف معطل غدوة ان شاء الله نشوف معاهم ,,,, شكراا على الرد

[tah306]

الله يجيب الخير والله لا عجب

[chemseddine]

السلام عليكم

اذا كانت هناك مدة لحماية الزبون أطلبي تمديدها لكي لا يضيع حقك

بالتوفيق

[الحاج انطوان]

ربي يعطيك الصبر . لكن ان شاء الله في الاخير تستلميي امانتك
القضية مطولة اكيد لانه فيه خطا ارسال لولاية ثانية

[ام هالة شهرزاد]

اختي سمطي عليهم وخلاص ما عنهم ما يديرو
ادا رسلوه لمستغانم اكيد عنوان خطا سيرجع الاغلب لوهران من بعد يعاودو يرسلوه ربي وكيلهم

[sidali1979]

والله شر البلية ما يضحك كان الله في عونك وصبرا جميل والله المستعان

[عابرة طريق]

السلام عليكم

الله يكون معاك ختي ممكن رقم الهاتف تاع وهران ؟

تكلمي مع البائع يرفع القضية من جهته وكلمي العاصمة يعطوك الحل

[faceamari]

روحي لمركز في وهران سانت شارل

[العصفورة 29]

إلى الأخت التي طلبت رقم هاتف وهران 041503117

للأسف لا جديد إلا انهم اعترفو بطريقة غير مباشرة انو تمت سرقته عندهم ,,, لانو ارسلت احد الى مركز بريد مستغانم قالولو الطرد هدا مادخلناش بتاتا

و كي هدرت مع تاع وهران قالتلي سيدة انو ارفعي شكوى لانو '' الي راهي دايرتها مابغاتش تهدر معاك '' هذا كلامها بالحرف الواحد

و للأسف مانقدرش نروح ليهم دونك خلاص

المهم حسبي الله و نعم الوكيل

[خالد الجبلي]

++++++++++++++++++++++++++

[خالد الجبلي]

++++++++++++++++++++++++++++++

[عابرة طريق]

السلام عليكم

شكرا على الرقم

في العادة استلم طرودي من وهران

و حسب خبرتي البسيطة العمال فيها ذكور باستثناء لي يسجلو اعتقد بنت معاهم

على العموم لي شهر تقريبا مرحتش للبريد و لا اعالم بالتغييرات

لكن الحقيقة تقال كل مرة استلم طرودي عادي بالرغم من التاخير و فتح الطرود بطريقة مشينة

متسمحيش في حقك كما قال الاخ

[العصفورة 29]

عابرة السبيل اختي انا يردو عليا غير النساء مرة برك هدر معايا رجل
المهم راني نحاول باش مانسمحش ولكن بديت نفقد الأمل

الله يجيب الخير