راح نرحل للباطيمة عاونوني

نهلةن · 2013-08-28, 12:59

السلام عليكم اخواتي راح نرحل للباطيمة مكونة من ثلاث غرف وصالة وفي الدخلة هول صغير المهم حابتكم تعاونوني في كيفية تعمار هذا السكن الجديد مع العلم انا راح نشري كل شئ جديد يعني القديم نتخلص منو الا الثلاجة جديدة وزوج و3تلففازات و تابي تاع السبور من فضلكم دبرو عليا المطبخ راني معولة نجيبو جاهز واناه الي مليح ووين نلقاه وغرف النو تاعي وتاع اطفالي انا عندي بنتين وولد راح نشري غسالة جديدة وتاني حبيت لافيسال دبرو عليا في اقرب وقت من فضلكم وجزاكم الله الفردوس الاعلى

~عبق الجنة ~ · 2013-08-29, 11:37

بخصوص المطبخ الواجد راهم يتباعو في كل بلاصة عند حوانيت متخصصين غير فيهم
في الهول ديري مراية و حطي les cadres لي يجو صغار وحدة تحت وحدة

و ديري كشما كاين فاز كبير حطيه ثم

و ربي يوفقك

ام نسمة · 2013-08-29, 12:24

موفق اختي
شوفي نعطيك نصيحة الشقة ما تغميهاش بكثرة الاثاث ماعندو حتى فايدة غير خردة شوفي اشتري ماقل ودل
يعني اشتري اغراض ؤقليلة لكن فاخرة تعطي ذوق شيك لشقتك الصالون اشتري صالون فوتاي وخطيك من الصالون ماروكان غير تكسار راس وكثر ة مخايد
المطبخ اعطيك نصيحة اخدميه ماتشريهش ماراهمش صادقين والمبلغ اللي تدفعيه فيه ممكن يخدملك مطبخ روعة وشيك وتقدري مام تعملي مطبخ امريكي يعني مفتوح بالكونتوار واذا حابة مطبخ عادي بباب اخدمي وحدك بوتاجي بالرخام الاسود الفاخر اسمو غالاكسي
شوفي موضوعي تاع صور مطبخي كما وعدتكم
غرفة النوم اشتري الاسود والابيض راه على الموضة راح احط غرفتي هاد الايام باش تدي فكرة اسعارهم حتى 25 مليون حسب الحجم والموديل
وديري فيها اكسسوارات راقية وقليلة لا تملئيها باغراض ليس لها لزوم ممكن تحطي كادر تاع لاتوريفال ابيض واسود راه على المودة وساعة وثرية فاخرة وابجورات والريدو اكتفي بالسامبل انا غلطت وحطيت كاش ريدو لكن ماعليش
غرفة الاطفال اشتري جاهزة احسن مع بعض الاكسسوارات الخفيفة
لا تنسي التابيات اشتري الفاخرة فقط
الماشينة لافي اشتري 2 وحدة اتوماتكية والاخرى العادية تاع البلاستيك راها جد مفيدة للغسيل المفاجئ او الضروري وللافرشة جد مثالية
الهول اكتفي بمرايا كبيرة جميلة وبعض الكوادر وساعة جميلة فقط
ربي يوفقك اختي

ندى2 · 2013-08-29, 20:08

بصراحة أنصحكي بالا تكثري من المابل فسكن الباطيمات كما نعلم جميعا ضيق و ستعم الفوضى مع كثرة المابل
ضعي الضروريات فقط

اية الرحمن1988 · 2013-08-29, 22:33

السلام عليكم
أختي حبيت نعطيك اقتراحات فقط عن طبيعة السكن في الباطيمات
متكثريش من الخزائن والطاولات لأنو مباعد تندمي والباطيمة مهما كانت واسعة
مع الوقت ويكبرو ولادك تحسي بضيق عظيم عن تجربة
الصالون اشري bibliotheque مليحة وفوتاي وخليه واسع
لانو كل مكانو الحوايج قلال يكون منظرو منظم وكلما كثرتي يصبح فوضوي حتى ولو كانو حوايح ملاح
أوربي يباركلك في سكنك ويهنيك فيه

kamel76 · 2013-08-29, 22:56

مبروك عليك

aberkanehanane · 2013-08-31, 13:16

كيما قالتلك الاخت اية الرحمن1988

نهلةن · 2013-08-31, 14:10

السلام عليكم جزاكم الله كل خير افكار رائعة لكن اتمنى لو تفيدوني اكثر خاصة الي عندها تجارب سابقة خاصة مع البالكونات وا
واش راح ندير فيهم والريزارفوار ث قداش السعة الكبيرة الي تكفيني خاتر الماء يجي كل 3 ايام

اية الرحمن1988 · 2013-08-31, 20:16

اقتباس:

المشاركة الأصلية كتبت بواسطة نهلةن

السلام عليكم جزاكم الله كل خير افكار رائعة لكن اتمنى لو تفيدوني اكثر خاصة الي عندها تجارب سابقة خاصة مع البالكونات وا
واش راح ندير فيهم والريزارفوار ث قداش السعة الكبيرة الي تكفيني خاتر الماء يجي كل 3 ايام

السلام عليكم
بالنسبة للبالكون شوفي الريزرفوار اللي جاي في الطول باش يكون واقف ويخليلك الوسع للغسيل فقط
أما الشرب أحنا متعودين نشريو لأنو الماء ميش مليح نتاع العيون خاصة الباطيمات
أما السعة منعرفش شحال ويكون حديد أختي لأنو نتاع النيلون كي تكون فيه العين مع الوقت تفسد العين نتاعو
ميش كيما الحديد لاصقة مليحة ومتعبكش
وكاشما ديري ليتاجار ولا خزانة تحكي فيهم الحوايج الزايدين كأحذية أولادك اللي ميستخدموهاش وما إلى ذلك
ثاني فيما يخص الكوزينة ننصحك ديري الخزاين اللي يتعلقو " ليتاجار" باش تجيك واسعة
لأنو مع الثلاجة والطابلة نظن متبقاش مساحة كبيرة لاولادك باش يدورو في الكوزينة يشوفو ماماهم واش طيبلهم
أي سؤال راني هنا

نهلةن · 2013-09-01, 19:38

يعطيك الصحة اختي اية الرحمن انتي قلتي على الريزارفوار انا حابة ندير انستالاسيون كاملة للكوزينة والدوش وحاشاك التوالات يعني ماشي محتم ندير العين في الريزارف ونثقل عليك ونسال واناه الي مليح تاع البلاستيك ولا الحديد والكوزينة راني راح ندير كيما قلتي وجزاك الله الفردوس الاعلى وادعيولي ربي يسهلي

اية الرحمن1988 · 2013-09-01, 19:59

اقتباس:

المشاركة الأصلية كتبت بواسطة نهلةن

يعطيك الصحة اختي اية الرحمن انتي قلتي على الريزارفوار انا حابة ندير انستالاسيون كاملة للكوزينة والدوش وحاشاك التوالات يعني ماشي محتم ندير العين في الريزارف ونثقل عليك ونسال واناه الي مليح تاع البلاستيك ولا الحديد والكوزينة راني راح ندير كيما قلتي وجزاك الله الفردوس الاعلى وادعيولي ربي يسهلي

الريزرفوار المليح نتاع الحديد أحسن لأنو البلاستيك مع الوقت يفسد ممكن طيح عليه حاجة
يتعوج وثاني كي ديري منو انستالاسيون ممكن جهة الأنابيب تتوسع مع الوقت ويولي يقطر الماء
اما الحديد يبقى مليح وجديد وكذلك البلاستيك كي تضرب فيه الشمس ميش مليح مرحبا بيك بأي سؤال اللي نعرفو نفيدك بيه
ربي يجعلها عتبة خير عليك وعلى ولادك وزوجك

نهلةن · 2013-09-02, 20:53

اقتباس:

المشاركة الأصلية كتبت بواسطة اية الرحمن1988

الريزرفوار المليح نتاع الحديد أحسن لأنو البلاستيك مع الوقت يفسد ممكن طيح عليه حاجة
يتعوج وثاني كي ديري منو انستالاسيون ممكن جهة الأنابيب تتوسع مع الوقت ويولي يقطر الماء
اما الحديد يبقى مليح وجديد وكذلك البلاستيك كي تضرب فيه الشمس ميش مليح مرحبا بيك بأي سؤال اللي نعرفو نفيدك بيه
ربي يجعلها عتبة خير عليك وعلى ولادك وزوجك

اللهم امين يارب وربي ينولك الي في بالك بغيت نزيد نسالك على شمبرا كوشي نطلع وحدة عند النجار ولا نشري الواجد خويا شرا هادوك الي خرجو ضركا خاتر قالولي ماشي صحاح اذا عندك خلفية في الموضوع ممكن تفيديني وجزاك الله الجنة

اية الرحمن1988 · 2013-09-02, 21:14

اقتباس:

المشاركة الأصلية كتبت بواسطة نهلةن

اللهم امين يارب وربي ينولك الي في بالك بغيت نزيد نسالك على شمبرا كوشي نطلع وحدة عند النجار ولا نشري الواجد خويا شرا هادوك الي خرجو ضركا خاتر قالولي ماشي صحاح اذا عندك خلفية في الموضوع ممكن تفيديني وجزاك الله الجنة

شوفي أختي بالنسبة للشمبرة كوشي صدقيني شوفي حاجة importationt وتكون قيمتها معقولة
خاطر صراحة الصناعة المحلية مكان منها والو متفوتش 3 سنين يا أختي يبدا اللوح يفسد
أحنا شرينا خزانة نتاع قش محلية الصنع الله لا يشوفك فيها
وجارتنا كيف كيف طلعت وحدة عند النجار كيف كيف الله لا يشوفك
انتي خممي مليح ومتتسرعيش تقولي نعمر داري كامل في دقيقة غير بشوي
وحاجة دوم ونوع جيد احسن وصح الثمن مرتفع لكن صدقيني والله ما تندمي عليها
الصناعة المحلية كي الكنابيات كي الخزاين كي الطاولات اشري وارمي
هذا واش نعرف عن تجربة وبالصحة ليك

sayahzohra · 2013-09-05, 00:34

ربي يكون في عونك و ديري كيما قالولك الاخوات