السلام عليكم أخي
راح نغطيك بعض الحلول الي ممكن تنصح بها هاذ الشخص (شقيق صديقك)
أولا: اكتب لنا في رسالة أخرى المنطقة لي يعيش فيها هاذ الشخص، والأعضاء ان شاء الله راح ينصحوه بأطباء موثوقين
ثانيا: يروح عند الطبيب المختص، ويحكيله كل شيء، ويقوله الأدوية لي كان يتناوهم، والتاريخ لي توقف عن تناولهم
ثالثا: هو راح يعطيه ادوية، لازم يوثق في الطبيب وياكلهم، لأنو هاذ الأدوية راح تساعده يتخلص من الآثار تاع الادوية السابقة
رابعا: يلزم يكون صريح مع الطبيب تاعه في كل شيء، يعني إذا راه يتناول أدوية من الشارع مثلا، أو يشرب أعشاب نصحوه بيها الناس
خامسا: رانا في أيام عظيمة، انصحه يدعي من الله عز وجل يشفيه ويعافيه
سادسا: دائما كي يجي يشرب الماء يقرا فيه سورة الفاتحة، سورة قصيرة والجميع حافظها
سابعا : قلت لنا شقيق صديقك في مجال الاعلام الآلي، يحاول يملا وقته بالدراسة من الانترنيت، يختار مجال (مثلا تطوير مواقع الانترنيت) ويزيد يدرسها مليح، ولما يتقنها يحاول يعمل بيها عن طريق الانترنيت (كاين عدة مواقع عربية وحتى جزائرية للعمل)
الفراغ عدو للانسان، فهو لما يملا الوقت نتاعه راح ينقصو الافكار السيئة لي تجيه
ربي يشفي هاذ الشخص، وان شاء الله يرجع لطبيعته ويعيش حياته كأي انسان عادي