السلام عليكم البارح درت كيكتين و زينتهم بعجينة السكر لعيد ميلاد ابن أختي نشالله يعجبوكم. لطلباتكم سأضع خطوات كيكة سبايدر مان و الكيكة الأخرى أعتذر لم أصور خطواتها بالنسبة للجينواز و عجينة السكر الوصفة من هنا https://www.djelfa.info/vb/showthread.php?t=1771856 أنا حبيت ندير الكيكة عالية و لهذا درت 3 جينوازات بالمقادير لي راهم فالوصفة و جينواز وحدة للرأس تاع سبايدر مان، أما عجينة السكر درت 3 بالمقادير لي درتهم 2 لونتهم بالأزرق و 1 بالأحمر، ونحتاجو أيضا ملون أسود. كريمة الزبدة أنا ما درتش الكريمة العادية درت كريمة الزبدة لي جي بالشاربات و مقاديرها: 500غ زبدة من الأحسن ماني 125مل ماء 500غ سكر 5 بيضات الطريقة : نضع السكر والماء فوق النار و نخليه حتى يعقد و يدير النبابل يشبهو لعقاش نضرب شويا البيض تاعي و كي يطيب السكر نبدا نضيف فيه بشويا على البيض و نخلط بالباتور و نكمل نخلط حتى يبرد الخليط، كي يبرد نبدا نضيف الزبدة بشوية حتى نكمل كامل الكمية و في الأخير ديرولها الذوق لي تحبوه انا درتلها 2 ملاغق صغار فاني. كي يطيبولنا الجينوازات كامل نحضرو شاربات ب كيلة سكر و 2 كيلاات ماء أنا كيلت ب طبسي تاع الشربة لأنو حبيتها تكون مشمخا مليح ماشي ناشفة، نشربو الجينوازات و ندهنوهم بكريمة الزبدة مليح و نغلفوهم و نحطوهم فالثلاجة يبردو عالأقل ساعتين أو ليلة كاملة، وبالنسبة لرأس سبايدر مان أنا شفت الصورة تاع الرأس تاعو فالأنترنت و رسمتها و حطيتها فوق الكيكة و قطعتها و شربتها و غلفتها بكريمة الزبدة. نغلفو الكيكة الكبيرة بالعجينة الزرقاء و نليسيوها مليح ونفس العملية للكيكة الصغيرة، بعد ما نغلفها نحكم بانسو صغير و نرسم الشبكة تاع سبايدر مان على الرأس تاعو بالملون الأسود، ونسيت ماقلتلكمش خليو شويا عجينة بيضاء باه تعملو بيها العينين و في الأخير حطيت الرأس فوق الكيكة الزرقاء و زدت عملت بالعجينة الحمراء دوائر و رسمت عليهم شبكة سبايدر مان و نلصقوهم بشويا ماء ونشالله تجربوها.