اقتباس:
المشاركة الأصلية كتبت بواسطة souzy manita
سلام عليكم ان شاء الله تكونو كامل بخير
راني في حالة ياخاوتي وماعرفتش واش ندير رسبت العام لي فات فلباك وزيد السنة مع انو قرييييييييت وتعبت وحليت مواضيع وكنت متأكدة من نجاحي جاتني صدمة ماكنتش نستنى فيها
خاب املي سورتو يمى كي قلتلها رسبت صرخت صرخة مازالها لدوكا فوذني وبابا حط يدو على قلبو ودمعة طاحتلو
تمنيت نموت ومانشوفش ديك الحالة تمنيت الارض تنشق وتبلعني اسمحولي لازم نحكي لانو راح نقتل روحي
ماكانش لي كان يقلي ماجيبيهش لانهم شافوني كيفاش كنت نتعب ونسهر وحتى كي كنا نجوزو للباك كنت نجي فرحانة للدار ونقلهم الحمد لله لانو المواضيع ماكانتش صعيبة
ستنيت يوم النتيجة بفارغ الصبر كي خرجتلي راسب ما أمنتش ودوكا راني في صدمة نفسية صعيبة يمى تحلل فيا وتقلي عاوديه حرة وانا مارانيش حابة الناس كامل قالولي عاوديه مي انا نضريت ماقدرتش وكرهت حاجة اسمها باك في حياتي
مارانيش عارفة كيفاش نعاود نجبد لي كايي ونقرى كيما العام لي فات ونشوف الصفحات لي كنت كاتبة فيهم باك 2015 ان شاء الله يا انا يا هو
انصحوني كيفاش ندير وكيفاش نقرى في الدار وحتى كي نجي رايحة نجوز نروح لبلاد من غير البلاد لي راني فيها
علابالي هاد العام راح يفوت عليا كحل خصوصا انتظار النتيجة
راني خايفة بزاف اسمحولي طولت عليكم مي واحد ماراه حاس بيا
الخرجة وتحواس وماخرجتش كي ناس علابالي وين نروح يجبدولي على الباك وانا مارانيش قادرة نهدر
انصحوني خصوصا المتفوقين كيفاش كنتو تقراو في الدار واذا درتو دروس خصوصية والوقت كيفاش نضمتوه ماتبخلوش عليا راني رايحة نموت والله
بارك الله فيكم
|
السلام عليكم ، أختي الكريمة ، قبل كل شيئ ، عسى أن تكرهوا شيئا و هو خير لكم ، منذ 11 سنة عشت نفس تجربتك ، رسبت في الباكلوريا رغم كوني تلميذة مجتهدة ، و دخلت في دوامة - كرهت البك و مانزيدش نعاودو ... - كرهت نفسي و انطويت عليها ، لم أعد أرغب في فعل أي شيء ، كنت أمضي يومي كله منعزلة في غرفتي المظلمة و أنا أبكي ، لم أتقبل الأمر - كنت حشمانة باش نقابل الناس لكانوا حاطيني راه نجيبو - المهم ، أنا أنصحك فعلا بزيارة طبيب نفسي ، ليساعدك على تخطي الموضوع ، و أنصحك أكثر بالتقرب إلى الله و تقبل الأمر بصدر واسع ، لا تجعلي من الباكالوريا عائق في حياتك يمنعك من السير قدما ، ايضا ... أدرسي حالتك .. ربما أنت في شعبة غير التي يجدر بك أن تكون فيها ؟ هل فكرت في الموضوع ؟ تحلي بالصبر و الايمان و اجعلي فكرة المكتوب راسخة في ذهنك ، و أعيدي الباكالوريا مرة و اثنين و ثلاثة .... أخي نالها في المرة الثالثة ، و هو اليوم أستاذ رياضة بالثانوية ، و قريبتي في المرة السادسة و هي اليوم معلمة فرنسية في فرنسا .... أما عن نفسي ، فقد نلتها سنة 2005 شعبة آداب و علوم انسانية و درست الحقوق ، و نلتها هذه السنة أيضا شعبة لغات أجنبية ... رغم أنها أولا مرة أجتازها فيها ... ان أردت الاتصال بي ، ابحثي عن مجموعة الدراسة - طلبة اللغات الأجنبية - في الفايسبوك و لن أبخل عليك بمساعدتي ، ان شاء الله ربي يشرحلك صدرك .