[كمال سعد]

ألكحلوشة الصايدة في أرض كْنان
صحّيتو لَطْفال جيتو وجبتوها

معتاها ايّامات في اَعْقاب جوان
نهارات الحُمّان زادوا صهدوها

ثعلوب الصحرا موالف بالحمّان
والهوارب قاع راهم سرجوها

هارامبي والتايفا ضوّ النجمان
خرجو ليهم باه بكري يطفوها

ما خلّاو الفيل ولا فيل اوطان
حتّى خُضر نْسور راهم ريشوها

السبوعة في الشاو خلّاو الطُّرقان
التيرانقا ولّاو باه يصيدوها

سلكوا من قرطاج فاتوا في لامان
خرجتنا لَيْمان والله ندّوها

سْماعيل وبغداد في ضربة فنّان
عبدُ اللاي وراه الشبكة نفضوها

آليو سيسي ها اقْنع في هاذ الكان
في الحراك الهايجة ما تشدّوها

كحلوشة فالليل بالماضي ومدّان
وصيادين الليل برك يشوفوها

يكفينا الكويس في ذ البرّ يبان
الأهرامات لهيه قلنا خلّوها

واحلفنا بالله مازيغ وعربان
الكاميرون لهيه ما نتركوها

في باريس نقول لجْماعة لوبان
ذيك الحبة السامّة نقبتوها

بصحّتكم، لهيه ما ادّيتو كيسان
بن زيمة زيدان هم لي جابوها

الا مزّلتو طالب عليكم نُقبان
نَرْهجكم في الجايّة ذي تنسوها

ثعاليب الليل معيشتها ثعبان
واللفعى والهايشة ما يهابوها

محرز بالك قالّك رايس زفّان
بن ناصر بغداد، بالعمري بوها

يوسف رامي ماندي زادك عدلان
سفيان وإسلام راحوا خطفوها

عندك لا تنساو لاعب مولى شان
عطّال يشافيه دعوة ندعوها

مبروك بْكلمات نايل للأوطان
اولاد عامر أبيات راهم بعثوها

تسعطاعش والفين اسمع بلْمْعان
تبقى في التاريخ راهم كتبوها