[عماني نور]

الصابلي " وصفة السيدة بن بريم "




شكون ماتعرفش الصابلي ؟؟ تقولولي كااامل نعرفوه ،، بصح آسكو كامل يخرجلكم مليح ؟؟

انا فالعيد نخيرو غير هو باش ناكلو ،، و ساعات نلقاه مايشبه لوالو يعني ماشي كاامل الناس ينجحلها الصابلي

و حتى الي متعودات يديروه ، و ينجحلهم " كيما انا احم احم " ساعات ماينجحلهمش

و الصابلي عندو وصفات و كيفيات متنوعة بزاااااف ،، و كل واحده و لمستها الخاصة

و طريقتها الي متعودة عليها

انا اليوم جبتلكم وصفة السيدة بن بريم ،، وصفة مضمونة النجاح ان شاء الله " فقط لازم تنتبهي لبعض النقاط رايحة نذركهم بالتفصيل في أسرار الفشل "

أولا ... المقادير :

250 غ مارغرين ،، الأفضل إيليو أو فلوريال

150 غ سكر عادي " ماشي سكر ناعم "

100 غ مايزينة

3 صفار بيض

قرصة ملح

1 خميرة كيميائية

450 غ فرينة

و فانيليا ،، أنا هنا عندي سر
تحبو الصابلي ديالكم ريحتو تعبّق و يتشهاه الواحد قبل ما ياكلو استعملو فانيليا + عطر الفراولة
هذا



يسوى 80 دج ،، بصح يعطي ريحة سوووبر مميزة للصابلي ،، و تقدري ماتستعمليهش فالعجينة
تستعمليه فالمعجون ممبعد ،، تديري ملون أحمر للمعجون و قطرات من عطر الفراولة
ثاني يجي ذوقو رااااااائع

ظوكا طريقة التحضير :

السر الثاني :( قولوا ماتهلاتش ))
و هاذ الخطوة تعلمتها من ام رامي ربي يحفظها و يخليهالنا كاامل ان شاء الله ..... المارغربن اخبطيها بيدك
اخبطيها بمعنى عمري يدك بالمارغرين بعد ماتكوني حركتيها ،، و اخبطيها فالليان الي راكي تخلطي فيه

ارفدي ،، اضربي

فهمتيني ؟؟
كي تجربي تفهمي اكثر ،، تولي المارغرين طرية بزاااف و تحسيها خفييييفة ،، تزيديلها السكر و تحركي بيدك عااادي ،، أومبعد تزيدي صفار البيض ،، قرصة الملح ،، ديري الفانيليا و عطر الفراولة ،، مايزينة ..... فرينة + خميرة

حركي بلا ماتعجني

شفتي العجانة الكهربائية كيفاش تلم العجين ؟؟ ياخي تدور برك ،، ماتعركوش
هاكذاك ديري بيدك

زيدي الفرينة بشوية و دوري دوري دوري حتى تحسي العجينة بدات تتماسك ،، اجمعيها برك يعني افتحي يديك و اجمعيها فوق بعضها ،، بضغط قليييل ،، ماشي تعجني ،، ماهيش مطلوع

ديريها في صاشي عادي ولاّ كيس غذائي

و خليها ترتاح

أنتِ في هاذ الوقت روحي اشعلي الكوشة ،، ديريها تسخن على حرارة 160 درجة

وجدي الطوابع الي رايحة تخدمي بيهم ،، أنا استعملت هاذو



أدي شوية عجينة ،، و البقية خليها فالصاشي باش ماتيبسش

ذري الفرينة على طاولة العمل ،، العجينة اضغطي عليها شوية بيدك ،، و ذري شوية فرينة عليها أو مايزينة و بداي تحلي بالحلال

تشوفيها ماهيش مسطحة ،، يعني شكلها غير متجانس ذري المايزينة و حلّي غير بلعقل

السمك تاعها يكون تقريبا 1 سم ،، يعني ماشي شفافة ماشي عريضة بزااااف

شوفوا شكل العجينة كي حليتها مافيهاش حتى شقوق

و راهي تتحل بسهولة غييير ماتخافيهاش ،، بصح بلعقل عليها




الطوابع تاعك حطيهم فالفرينة أومبعد اخدمي بيهم ،، و كي تحطيهم فالعجينة ماتبقايش تجيبي فيهم شمااااال يمييييين

حطي الطابع ،، اضغطي عليه شوية ،، اضربيه بيدك مليييح بلا ما تحركيه ، ولاّ مرري فوقو الحلال (( تلقاي الحبة خرجت بلا ما يتغير شكلها

شوفوا الصورة



أرفديهم غير بلعقل و حطيهم في سنيوة مرشوشة بالفرينة

و دخليها للفرن الي يكون مسخن ديجا على حرارة 160 درجة

عسييييييييييييييييييييييييييييييييييييييها ،، لأنها حلوى حساسة بزاااااف و بين دقيقة و أخرى ممكن تنجح أو تفسد

في الغالب يقولك الصابلي يطيب بيض ،، بصح انا نحبو احمر

" خرجوه ابيض اذا حبيتو " ^^ المهم يكون طاب ،، يعني مسي الحبة برفق اذا لقيتيها نشفت نحيها

و مباشرة نحيها من السنيوة بررررفق ،، بلالالالاعقل ،، فيييييييي غرضك باش ماتتكسرش

خليها تبرد تماما ،، و لصقي بالمعجون

كاين الي يحب يزينها بالسكر الناعم ،، و كاين الي يزينها بخطوط الشوكولاطة ،، و كاين الي يذري عليها مكسرات مرحية ،، ظوكا تبقى مسألة أذواق " مايهمش "

المهم الذوق الراااااااااااااااااااااااااااااائع بشهادة كل من ذاقو

ريحتو تشهيك قبل ما تاكليه صدقيني ،، و جااي هش و خفيييييييييف ،، و بنيييييييييييييييين

بصحة كل واحدة رايحة تاكلو

~ ْ ~

أسرار فشل الصابلي :
1 - المارغرين تكون باردة ،، أو تستعملي لابال .. صدقيني تخرجلك وصفة اخرى
2- تكثري الفرينة حتى تيبس العجينة ،، تخرجلك عجب ،، تجي تحليها تتكسر ،، كي تطيب تجي يابسة و ماشي مليحة .
3 - الكوشة ماتكونش مسخنة مليح ،، أو تكون أعلى من 180 درجة ،، قلنا الصابلي بالرغم من أنو قاطو معروووف جدا و سهل يتعمل إلاّ أنو أكيييييد مارايحش يخرج صابلي و عليه الكلام اذا جا محروق ^^ ولاّ يابس

4 - تخليه فالسنيوة بعد ما طاب مدة طويلة أومبعد تنحيه ،، تلقايه بقدرة قادر " لصق " ،، و تجي تمسيه يتفتت .

نوغمالمو هذا ماكان ،، إذا تفكرت حاجة اخرى راني نزيدهالكم

~

يالله نتمنى تجربوه و تقولولي رايكم ^^

~

ترقبوا وصفات اخرى