يقول صاحب المحل :
▪️ البارح دخل عندي واحد نعرفو عايش على حساب الحال.. نهار كاين ونهار مكانش قالي خصني ب 5 الاف عدس ،وباطة طماطم صغيرة كي ينوب ربي نخلصك قتلو صحا معليش
في نفس الوقت لي خرج فيه دخل واحد مانعرفوش ومشو موالف يجي عندي جامي شفتو باين عايش لاباس عليه ماديا.
ايا بدا يشري في القضيات.. أعطيني هذي زيدلي هذي لوبيا روز حمص طماطم زيت سكر قهوة.............. ماخلا مابقى قضى كل شي الله يبارك .
بقيت حاط الماشينة ونحسب و بيني وبين نفسي قلت سبحان الله واحد خاصاتو خمسة لاف عدس بالكريدي وواحد قاضي كامل هاذ القضيات قلت ماعليش ربي هو قسام الارزاق.
حتى نطق هذا السيد قالي: لي كان هنا تعرفو! قتلو: إيه نعرفو؟ قالي خليلو هذا القضيات كامل وكي يجي عندك اعطيهولو.
خرج ركب في السيارة وعاود نزل جا عندي قالي: شوف قداه عندو كريدي، زاد خلص الكريدي لي عليه وراح في أمان الله.
📌قال رسول الله صلى الله عليه وسلم :لا ينقطع الخير من أمتي إلى يوم القيامة.