[اربعاء]

المشاركة الأصلية كتبت بواسطة n.alger

السلام عليكم ورحمة الله وبركاته....كذب من قال أن عقود ما قبل التشغيل تكسبنا الخبرة...في الحقيقة تعلمنا التخلف خاصة اللي يخدمو في قطاع التربية ابتدائيات او متوسطات او ثانويات أنا عن نفسي نخدم في مفتشية ابتدائية لكن واش تعلمنا؟ سجل الوارد وسجل الصادر وكاشيهم وبالاك تنسى الرقم وخدملي جدول ارسال...وزع البريد...اكتبي الندوة في الوورد وفي power point ....ابحثي لي عبر النت عن هذه الكتب...الفوتوكوبي...والفوتوكوبي بالزوم للكتب القديمة والمكتوبة بخط صغير (حتى يتمكن من قراءتها بخط واضح ميعييش روحو)...والمشكل الكبير واللي قاللهم ارقدو يجي ساعة في اليومين ويخليني مباصيا مع أولياء التلاميذ وخصوصا عند الدخول المدرسي نجوز نهاري كامل ندارب معاهم كاين اللي يحب يحول وليدو وكان اللي يحوس رخصة تخفيض السن وخلي وخلي وكل شي يحصل في راسي...ولست الوحيدة فكل أصحاب عقود ما قبل التشغيل يعانيو الأمرين...والله كاين بنات نعرفهم يخدمو في الإدارة ويغسلو في المطعم...وكاين رجال يخدمو عقود ما قبل التشغيل ورغم الشهرية القليلة يطمعو فيهم المدراء والمفتشيين -اللي عندهم السيارات الفخمة- يديو ويجيبو البريد من الأكاديمية ومصاريف التنقل من جيوبهم لا حول ولا قوة إلا بالله....وين راكم يا مسؤولين؟؟؟؟ -علابالي متسمعوش قاع بيا- والله تتحاسبو من جهة ربي حساب عسير معلابالكمش واش راهو صاري قاع....أنت يا مسؤول تخبط صدرك وتقول انا مسؤول ههههه بالاك شهادة كي الناس متسعاهاش...على واش مسؤول؟ على عايلتك وأهلك وأقاربك ومعارفك....بارك الله فيك كفيت ووفيت...وفي الختام صدق من قال عقود ما قبل التشغيل علمتنا التخلف حتى واش قرينا قضاونا عليه صح خاوتي؟ وحسبيا الله ونعم الوكيل

السلام عليكم اخوتي الكرام.
حابة برك باش ننصحكم. ماتخلهمش يفرضو اعليكم خدمتهم. . ولازم تفهمو النو خدمتكم داخل المؤسسة وليس خارج المؤسسة. لانك لست مأمن عليك في الطريق. اولوكان كاش مايصرالك في اطريق بعيد الشر شكون اللي يخزر فيك.
وديرو حاجة في بالكم النو القانون مايسمحلهمش باش تخدملهم خدمتهم افهمتو انتو اللي راكو تحقرو اروحتيكم بيديكم. شوف واش مكتوب في العقد لديك ليسانس . واش الداكم اتسيقولهم. استغفر الله. .... دافع عن نفسك بلقانون ومكاش اللي يعفس اعليك صدقني . شكرا