السلام عليكن عدت من جديد البوراك التركي وصفة رووعة تحمر الوجه نتمنى جربوه وللاماننة خذيتها من اليوتوب راه نكتب الوصفة كما عملتها ونخليلكم ملاحظة واش تقدروا تغيروا في الاخير العجين 3 كؤوس فرينة ملعقة ملح صغيرة وكاس ماء دافئ الحشو بصل مقطع رقيق او رابي جزر رابي وكمية صغيرة لحم مرحي ملح فلفل اسود وجبن (الحشو نطيبوه كما تع البوراك) في صحن العمل نحط الفرينة والملح ونلم بالماء حتى نتحصل على عجينة طرية متلصقش باليد ونخليها ترتاح نصف ساعة نرش الفرينة على طاولة العمل نشكل حربوش ونقطع قطع صغيرة ونشكلها كرات كما المسمن نذوب كمية من مارغرين ونضيفلها نفس كمية زيت نبدا من الكرة لي شكلناها الاولى نفتحها سمك مليمتر ونحطها في صحن نكون حطينا فيه ملعقة من خليط الزيت والزبدة ونزيد نحط ملعقة فوق الكرية المفتوحة الصور ستوضح بعد ما نكمل كل الكريات نقلب لي من تحت نرجعها الفوق لانها تكون ارتاحت ويكفي نجبد العجين ونكسل من الاطراف حتى يتحل نطويه على الجوانب كما المسمن ونحط الحشو باطراف الاصابع هدا البوراك ميتعمرش بزااف مع جبن ونحط ملعقة خليط الزيت فوق العجينة ونمشيه ونرولي نتحصل على حربوش نشكلوا محنشة او شكل لي راه في الصور حطيتلكم طريقة التشكيل كي نكملوا كل الكمية ندهنوا الحبات بخليط الزيت وندخلوه فرن مسخن مسبقا على درجة 180 نشعلوا من تحت كي طيب نشعلوا من فوق ونطيبوه ذهبي متحمروهش بزااف باش مييبسش معكم ملاحظة _الحشو يكون باارد ونقدروا نغيروا الحشو سلق او بطاطا مهروسة وبصل وطماطم مصبرة _دائما نبداو بالكرية الاولى للي بعدها لانها تكون ارتاحت _العجين هدا يحب خليط الزيت متبخلوش عليه ادهنوه مليح ههه _الكريات تكون صغيرة لانه هنبعد كي نخدموها تتكسل وتخافوا طاولة العمل متكفيش ههه🤪🤪 اي سؤال انا بالخدمة وهو ساهل برك طولت الشرح للمبتدئات كنت استاذة متنساوش ولاازم نوصل المعلومة