اختي اذا المليون غير للماكلة يكفي بصح وليدك اذا كان صغير بزاف المشكل في لحليب و لي كوش يمصو دم الواحد
شوفي غير تحكمي الدراهم سمي و قولي ربي باركلي فيهم و صدقي الف فراك تكفي و قسمي المليون على 4 يعني 250 الف و خبيهم في ضرف او تحت الملابس متفرقين و كل اسبوع اجبدي واحدة فقط و دبري راسك بيها بالاكي تمدي يدك للاخرى و حاولي تشري غير اللازم لحليب اشري تع الشكاير و شكارة تشدلك نهار صباح و عشية و اشري القهوة حب و حمصيها و ارحيها توفري بواف و حاولي الماكلة اللي تبقالك اليوم غدوة منذاك ديريها شكشوكة او عليها بيشاميل و تولي قراتان على حساب واش بقالك و المرقة تع الطعام ارحيها وتولي عندك سوب تع خضار و هكذا ,,,, و الماء ما تشليش بالعين لالا شلي لماعن في باسينة يعني بافكار بسيطة رايحة توفري و حاولي تقضي من الاسواق الشعبية الخضار تما نص سومة على الخضار تع الحومة و ما تكثريش الخضار يعني نهار خضار و يومين بقول و يومين عجين ديري الشخشوخة في الدار و مرة مطلوع الشحمة و شلاظة و انت درتي عشا و هكذا ,,,,,
ربي يقدرك اختي راه الشيء صعيب بصح كلو الا الدين ونقولك حاجة كل ما تتقلقي او تقولي علاش هكذا او علاش انا ؟ قولي الحمد لله انا جاتني غير في هاذي و غيري عندهم لاموال الطائلة و ماشي مهنيين و انا اكبر مثال قدامك
الصبر على الابتلاء الصبر كانت جدتي تقولي ربي سبحانو ما يمدلناش كلش قلتلها علاش ؟ قالتلي لوكان يمدلنا كلش نكفرو
وسعي خاطرك و رانا هنا خواتاتك و نتعاونو