يوم أمس كان حااافل و ممتلئ بالأشغال
الصراحة ما حسيتش الوقت فيه
بديته كالعادة بالواجبات الدينية و العناية الشخصية
و فتح النوافذ لتهوية البيت و انعاش القلب و الروح و الرئتين
ثم فطور الصباح
بعدها حضرت العشاء لأني كنت مخططة أقضي اليوم كله في بيت أهلي لذا حضرته و تهنيت منه😏
حضرت طاجين لوبيا خضراء مع الفريت و السلطة
(للأسف زوجي ما يحبش البطاطا فالمرق لكن ياكل المرق اذا أضفت عليه البطاطا فريت هههه)
المهم جمعت البيت جمع سريع كالعادة ما ياخذش مني وقت كبير
نظفت الحمام و المطبخ و غسلت الأواني
كنست و مسحت الأرضيات تاع الكولواغ و المطبح و الحمام
غرفتي لم اقترب منها لأن مول الدار كان مازاااله راقد
و الصالة جمعت منها الملابس و رتبت السداريات و الصالون فقط لأن بين غرفة النوم و الصالة فاتحين باب من الزجاج يعني أي حركة فالصالة ممكن توقظ زوجي و ماكنتش حابة اني ازعجه.
المهم رحت لدارنا درت الغذاء بطاطا مرقة و دجاج مع كفتة الدجاج مقلية شبحت بيها المرقة و قليت الفلفلة و الطماطم
و كان هذا غذائنا تحت طلب من أمي
نظفت المطبخ و غسلت الأواني بمساعدة أمي،
و كنست و مسحت ارضية المدخل و الكولواغ و ارضية المطبخ
و اختي تكفلت بالميناج تاع باقي الغرف و الحمامات، الصراحة دارت ميناج عميق للبلاكارات خرجت كامل الملابس و فرزتها و رمات اللي يترمى و حطت اللي راح تعطيه في سبيل الله في أكياس، و مسحت البلاكارات و رتبت ملابس الصيف و خرجت ملابس الشتاء و رتبتها في الخزانات، ملابسها يعني و ملابس أمي و اخوتي.
انا مادرتش تنظيفات عميقة أسبوعية لا في بيتي ولا في بيتنا
الصراحة راني شوية تعبانة و زيد لاقريب.. يعني راني نخدم غيير بالعقل.
بعد الغذاء ارتحت قليلا مع أمي، و نضت حضرت كروكي لقهوة المساء
بوصفة جديدة أخذتها من اليوتوب
و خرجت أكثر من راااائعة الحمد لله
ها هي الوصفة جبتهالكم
4 بيض
1 فانيلا
(انا استبدلت الفانيلا بقشور الليمون لأني احب كثيرا رااائحتها و طعمها في الحلويات)
كاس سكر
نخلط حيدا بالضراب الكهربائي أو اليدوي
كاس و ربع زيت نضيفه تدريجيا مع الخلط
2 م ك حليب بودرة
3 م ك مايزينة
2 خمارة حلويات
نضيف الفرينة تدريجيا حتى تلتم العجينة
حبيبات الشكلاطة اختياري
تدهن بصفار بيضة مخلط بقطرة قهوة
بالنسبة لي حسيت انه كان مخصوص القليل من السكر
لأني انا اتناول قهوتي من دون سكر و لما تناولته أضفت ملعقة سكر لفنجان القهوة حتى أستطعمها مع الكروكي
يعني المرة الجاية راح نحضره بكاس و ربع سكر باذن الله،
بعد قهوة المساء رجعت لبيتي جلست مع عجوزتي قليلا
و طلعت لبيتي ارتحت و تفرجت لقناة سميرة تيفي
و انتظرت لما دخل زوجي و طلب العشاء قمت حضرت الطاولة
و تعشينا، و جمعت المطبخ و الأواني و مسحت الفرن،
و اديت واجباتي الدينية و الشخصية و الى النووووم.
كان هذا روتيني ليوم أمس
و اليوم روتين جديد باذن الله و أعمال جديدة بقوة و ارادة و حب..
اذا أدينا مسؤولياتنا وواجباتنا و أعمالنا بحب
فسنتحصل على نتائج ترضي نفوسنا و تريح عيوننا
و تسر قلوبنا و سنعيش روتينات و يوميات تسعدنا