بالنسبة للحريرة مافيهاش الثوم....
بالنسبة للتوابل عندك راس الحانوت ،ثفاوح،كركم ،عود قرفة فالاول عندما تقلي الخضر و عندك سكنجبير ،كروية ،وشويا كبابة بعد ما تطحني
بالنسبة للطريقة تقلي اللحم مع البصل مليح ثم تزيدي الجزر و الطماطم و ديري التوابل و خليهم يتقلاو 15 دقيقة مع ربطة قصبر مزرع ( انتبهي مليح قلت ربطة كاملة من القصبر لي فيه الازهار هذا سر من اسرار حريرتنا التلمسانية)
ثم ديري الحمص و تمرقي و كي طيب الخضرا ترحيها و تنحي عود القرفة و ربطة القصبر
تكوني موجدة في غرفية مغرف نشا مع زوج مغارف فرينة و حليتيهم مليح بالما البارد و فغرفية اخرى ديري طماطم مصبرة ،كروية ، كبابة ، سكنجبير و قصبر مقطع رقيق
دوكا بعد ما طحنتي الخضرا ارمي مغرف تشيشة و خلطي كي تغلي اضيفي خليط الطماطم و التوابل و خلطي ثم اضيفي خليط الفرينة و خلطي
ارمي نجمة الارض قيس ما تهز الغلية و نحيها
و في الاخير قرن حار
ملاحظة مهمة:
كاينة واحدة فسميرة تي في شهرزاد
دارت فيها السميد
الحريرة لا علاقة لها بالسميد و الارجح انو لي حكاولها قالولها ديري تشيشة و هي غلطت و دارت غرفية سميد و نورمالمو ما تمدش وصفة تقليدية بلا ما تتاكد و بلا ما تكون تعرفها اكيد انو نساء عديدات فالقطر الجزايري ينفذوا الوصفة بالغلطة الفضيعة لي دارتها شهرزاد و من خلال هذا المنبر في منتدانا الغالي لي علمنا وصفات الشرق و الغرب من ايادي حراير الجلفة نقول مالازمش نثيقوا فكل مايقولوه فالتلفاز احيانا يمدو وصفات ليست قابلة للتصديق ولا للتطبيق ...و كلامي بدون تعميم ...لكن لا للاستغباء
تشيشة تشبه للفريك و هي بيضا