اتبدلت لحوال وعنا ضاق الحال**** وعصرتنا لمحان واذنوب اتقوات
هاذ الوقت اشيان كي كوكس مال**** اظهر فيه العيب وناسو اتخلات
ع العفة و النيف و معيشة لحلال**** ماطاقت للصبرولمحاين والشدات
ما تهنات خلاص ولا راحة للبال**** فرطنا في دينا وغمسنا فالشهوات
من بعد الشيبات يجينا ريح هبال ****والعبد منين يكبر توقع لو فتنات
توسوس لو نفسو و تزينلو لفعال**** يطاوع روحوآن يلقى عمرو فات
هاذ الفتن اللي مفسد طبع ارجال**** حنكها الشيطان و انساه اتعرات
ماقعدت حشمة ولا زين اخصال**** تستعجب كيفاش اندثرت و فنات
ليك النسوة جلها لبست سروال**** واتمسخت في لونها دارت طليات
قالوا ذي لامود مافهمتوا جهال**** تبقوا ديمة اللور ماتزيدوا هيهات
ردفت بالمكشوف وكسبت نقال**** دارت ليكوتور ذي آخر صيحات
هاعندك شبابنا ناض فيه الحال****اتحلحل في همتوا و دار ازقيبات
عجب فالمشطة وملحهم بلجال**** وخط ازيقة كي اصحاب الكورات
بدلنا عاداتنا وسقطنا فالحال****و من ينصحنا انديرو لو ضحكات
وقت الحشمة والحيا عنهم سال**** لا خدعة لا تيه لا كثرت شغلات
ودعنا ذالخصايل لارجعة موحال****وغشانا ذالليل و الشمس اتمسات
مانعمش قاع الخلايق يا علال****ماني قاصد في الحراير و السادات
ياحصراه على وقت أبوي والخال****بالعيش البسيط اعيالات اتربات
راني ننده فيك يارب المتعال****تصلح ذالأمة و تغفر اللي فات
بجاه الحبيب السيد في الأقوال****حتى اليوم الدين ما زالت خيرات
اتبارك في الأمة و تحفظها مازال****مادامت تنهي على شر لمحدثات
أشفي لي يا رب أميمت لعيال****انت شافي ياالله أمسحها مسحات
يا عظيم الشان زين لي ذالفال****و تزيان لعقوبة في آخر ليامات
تقبل ذ الطلبة و تنور لحوال****و نجيبو عمرة و معها حجات
بجاه الرسول ومن بذكرو نال****انطوف بالكعبة وانبات ألويلات
يا أهل الرضى قلبي ليكم مال****توصل ذالدعوة و تقبل في لحظات
اللهم آمين يارب العالمين
تمت بقلمي medcherif03