[نعمة القدوس]

1- اليوم الأول في الكلية .. كيف تعاملتُ معه

نشفى قبل ذلك بيوم طلبت من أمي تروح تسأل جارتنا اللي كانت سنة رابعة والعام هادا عامها الخامس
أنا ماحبيتش نروح نسألها لأني نحشم (علابالي لازم الحشمة هادي تتنحى عن قريب ههههه)
المهم، راحت لعندها ماما وحكاتلها كيفاه يكون أول يوم
وسبحان الله ... كان يومي الأول مماثل لما حكاتهولي، ههههههه ماكانش التغيير خلاص على مايبدو

المهم، رايحة نحكيلكم يومي كيفاه عدا وكل شخص يكيّف الأمور على حساب ظروفه
أنا نشفى استيقظت على السادسة، وجهزت نفسي
واتجهت نحو الحافلة (قالولي باللي الحافلة تنطلق عند حوالي السابعة صباحا، وتلك هي الحاقلة الوحيدة اللي عندنا للأسف ههههههه، معناتها دايما مستيقظين باكرا)
نحب ننبه إلى أن السفر في حافلة الطلبة أحسن وأحسسسن بكثير من السفر في الحافلات الخاصة
وياويلكم من الحافلات الخاصة، تمريميدة كحلة وزيد الحشر والوساخة وزيد من فوقها خسارة الدراهم
أنا متلا باه نركب من مكان انطلاق الحافلة إلى غاية الوصول إلى مايسمى بالشالي
نخسر ما يعادل 70 دج !!!
هادوك نشريهم كاسكروت فريت الذي سنتحدث عنه لاحقا هههههههههه (صديقكم الوفي هههه)
إذن الحافلة تاع الطلبة هي صديقتكم .. نضيفة وباطل هههههههههه
طبعا في الأيام الأولى يقولولكم جيبو صورة و 130 دج باه يديرولكم بطاقة النقل
ولا ربما درتوها في التسجيلات ؟ والله نسيت لأنو أنا درتها متأخرة واقيلا (نسييت)
المهم .. نرجع لموضوعنا
قلت وصلت للحافلة وأنا لابسة فستاني البرتقالي اللي ربما شفتوه إذا كنتوا من متتبعي مدونتي (طبعا عددكم رايح يكون واحد أو صفر ههههه) والطالون الله الله .. والصاك .. ولابسة الخلعة هههههه
نمشي ونشوف مع جنابي ونحس الناس كامل تعس فيا
المهم وصلت .. شفت الحافلة .. الحمد لله كانت محلولة (كانت أكبر مخاوفي أني نلقاها مغلقة ونضطر نبقى واقفة وحدي)
ركبت .. لقيت زميلة ليا .. فرحت ههههههه
سلمت عليها وبقينا نحكيو .. كل واحدة تحكي واش قالولها على أول يوم كيفاه يكون
ماشاء الله .. تلك الفتاة أسلوبها جد مطمئن فبمجرد ماحكيت معاها تنحاتلي شويا خلعة
انطلقنا في شويا برك .. وسبحان الله، وجود صديقاتي لينا وخولة اختفى في الفترة هاديك، واقيلا ماجاوش
بالاك جاوا فالبريفي .. والله غير نسيت
المهم، انطلقنا في عدد قليل ثم أصبح الحشر في الحافلة .. والواقف أكتر من القاعد
وطبعا لأني ركبت من مكان انطلاق الحافلة فقد كنت قاعدة هههههههه
مشات الحافلة لمدة 45 دقيقة على ما أتذكر (فهذا هو الزمن الذي نستغرقه في الطريق)
وأنا نتفرج في المناظر ونستغفر ونشهد كي نتفكر باللي رايحة للكلية لأول يوم ههههههههههه
حتى وصلنا
المهم أنا وزميلتي هاديك رحنا نحوسوا على وين يحطونا وكيفاه ؟
المهم لقينا شخص قادنا للمدرج وين لمونا
نتذكر باللي هو المدرج تاعنا بعد اللي نقراو فيه طول العام
المدرج 4
المدرج هاداك جاي فالطلعة .. وحد الطلعة الله لايشوفكم فيها هههههههههههههه
وأنا الله يبارك بالطالون .. واقيلا ثالث يوم تقطعتلي الصاندالة هههههههههههههههههههه
المهم وصلنا .. ولقينا ديجا غاشي حمر
بقينا واقفين .. ماكانش البلاصة ..
درك وين تفكرت .. لينا وخولة جاو وحدهم .. ونشفى عيطولي باه ننعتلهم وينا جيهة جاي المدرج أربعة هههههه
مالا هو المدرج 4 ماهوش وحدو
جاي معاه المدرج 5 و6 كذلك .. وفي البوابة قبل مانلقاو المدرجات كاينة لافتة مكتوبة فيها
Amphi 4-6
أنا كي سقساوني واينة جيهة .. قلتلهم في المدرج رقم 46 (ستة واربعين) بانتلي البلاصة كبيرة
وفيها بالاك حتى 50 مدرج هههههههههههه وأنا وين نعرف ؟؟ جديدة الله غالب
المهم البنات يحوسوا ويسقسيوا واينة جيهة المدرج 46 ههههههه قالولهم ماكانش مدرج 46
المهم مانعرف كيفاه لقاو البلاصة
داروا بيا السرك هاداك النهار على المدرج 46 هههههههههههه
المهم .. حكمتنا الاستاذة تاع الكيميا بن ماشيش وهدرت على الدراسة، ورحبت بينا
أكم تعرفوا .. حصة تعارف !
نشفى سجلت واش هدرت
ولكن أظنني محيت التسجيلات
وهذا خطأ درتو للأسف .. كون راني حطيتهولكم كشما سمعتوا نصائح
المهم .. الاساتذة او يحبوا يعاودوا الهدرة ههههههههههههه
ومبعد نسيت واش صرا
بالاك بالاك بالاك قالت الأستاذة بن ماشيش باللي رايحة تقدم أول درس
نشفى درس سهل تاع الذرات والعدد الذري والشحني وهادوك الخلايطات
وقالتلنا اتقسموا .. نص يقرا درك ونص نقريه في المساء
وبما أنو اللقب تاعي بالآس .. كنت في "لا سيكسيون بي"
section B
المهم .. نسيت مجريات الأحداث في هذاك النهار

2- اليوم الدراسي في كلية الطب بقسنطينة

خلينا من الحكايات ونحكيلكم على اليوم الدراسي

- اليوم الدراسي يبدأ من الساعة الثامنة والنصف صباحا (08:30) وينتهي الساعة الرابعة والنصف مساء (16:30)

- الحصة الواحدة سواء كانت محاضرة، عمل توجيهي (TD) أو عمل تطبيقي (TP) تدوم ساعة ونصف (معناتها حصتين صباحا من 08:30 إلى 11:30 وفي المساء من 13:30 إلى غاية 16:30)

* نحب ننبهكم فقط إلى الحصة المسائية... قد تضطرون للخروج أبكر من الوقت لأنو الحافلات تصل إلى الكلية باكرا
وقد تفوتونها .. كيما حنايا تاع السمارة كون تروح عليك الحافلة تطفّر فيك هههههه
(مرة راحت عليا بسبب العمل التوجيهي تاع السيتولوجي، اضطريت نروح نبات عند خالي المزية يسكن قريب، وفي الغد أمطرت وكنت لابسة ملابس خفيفة .. تمرمدت تمرميدة كبيييييرة هههههه)
قد تلاحظوا باللي الحصة شويا أطول مما تعودنا .. ساعة ونص
بزافف .. رايحين صح تتعبوا في البداية ولكن الحمد لله الانسان يتكيف وإلا كون خلات
لذا مع دخول الثلاثي الثاني تكونوا تكيفتوا مع الوضع
تاني الشالي قاعد كي الجبل .. طلعات برك ههههههه رايحين تتعبوا الأيام الأولى ولكن توالفوا
ومانعرف لكان ذكرتها الفوق ولا لالا (من كتر ماخليت مجال زمني بين الكتابة والكتابة هههههه نسيت واش قلت وواش ماقلتش، لذا إذا عاودت حاجة ماتلومونيش هههههه)
المهم، كاين فالشالي حاشاكم كلاب وقطط .. ماتخافوا ماتهربوا منهم كي يجيوا يجريوا في جيهتكم لأنهم متربيين الله يبارك
مرة كلب -أعزكم الله- كان يمشي فوق الطروطوار وأنا كنت وراه والطروطوار هادا على قدما تمشي وهو يضياق يعني في النهاية تضطر تمشي فوق الطريق
مالا كيما وصل الكلب للطريق وشافني جاية حبسلي حتى عديت
ياااو ladies first ياااجدك !!!
أيضا .. بالنسبة للبنات، فالشالي الذكور متربيين ومستبعد جدا الفتاة تتعرض لمعاكسة، ولكن بمجرد تخرجي من باب الكلية
(الغار) هههههه غير حضري نفسك لوابل من العبارات .. لذا من الأفضل ماتوقفيش تستناي الحافلة وحدك
الروسوفور تاع الحافلات البريفي ويقوللك هاتيلي النومرو ههههههه
وبلاش ليزاقريسيون والسرقات تاع التيليفونات من طرف هادوك تاع حي بن تليس
وحاجة بلا مانوصيك عليها، عندك عندك عندك تجبدي التيليفون تاعك ولا أي حاجة خارج الكلية
ماتلومي غير نفسك




دركا أظن أني لازم نبدا نتكلم على المرافق تاع الكلية

3- شرح مبسط لأهم مرافق الكلية (التي أعلم بوجودها):

تفضلوا هاد الخريطة (زعما برك)
درتها باه تساعدكم تفهموا واش راني نقول
لأني كي عاودت قريت واش هدرت
مافهمت فيها والو ههه

نتمنى تعجبكم الشكشوكة اللي فيها هههههه

https://www.mediafire.com/view/3939s7i5b1nzf40/1.jpg

نبداو من المدخل التحتاني (الغار)
كي تدخلوا من الغار وكيما قلت ربما سابقا (من الجهة اليسرى)
وتمشيو تلقاو باب أظن من تما يدخلوا العمال تاع المطعم
كما أني شفتهم لتما يحطوا الملف تاع المنحة كيما يجددوه
ومبعدا كاين باب صغير فيه قضبان حديدية .. أزرق اللون
كي تولي الحداش تاع النهار الباب تعودوا ماتشوفوهش من كثرة التجمع
وخاصة كيما يتحل الباب .. الدحس هداك الله لايشوف فيه مومن !
من تما ندخلوا للمطعم ..
تدخلوا من الباب وتتبعوا القضبان الحديدية ..
(سبحان الله كي نشوفهم نحس روحي بقرة مديينها للمقصف يذبحوها
كيما نشوفوا في الأفلام المزارع الكبرى تاع الأبقار في أمريكا هههههههه)
المهم كاين قضبان على اليمين تفصل هاديك الغرفة عن صالة الإطعام من جهة وعن غرفة نغسلوا فيها أيدينا من جهة أخرى
لتما يوقفوا ويسألوا الطلبة الآخرين واش داروا للغدا
طبعا بعد مايكونوا فتحوا الباب وبداوا يقدموا الطعام، إذا عجبك الغدا أكملت الرحلة والتي تطول عادة ..
تصل إلى أنك توقف ساعة في الطابور أحيانا خاصة إذا حبيت تتغدا بكري
وتقدر تصبر حتى تولي 12:30 ولا 12:45 ينقص الغاشي
وإن شئت رحت للcafète والتي سنحكي عنها فيما بعد
المهم، تجد قبالتك باب كي تدخل منو تحس روحك وكأنك خرجت ماش دخلت هههههه
لأنو المكان اللي رايح –ان صح القول- تدخل ليه عريان مافيهش سقف
إلا من المكان المخصص للطابور والمكان المخصصة لبيع التذاكر (حسيت روحي في حفلة ماش مطعم ههههه)
المهم اللي يبيع التذاكر يجي على يمينك كيما تدخل
تروح عندو وتعطيه 5 دج يعطيك أربع تذاكر لأنو التذكرة الواحدة ب 1.20 دج
(نسيت واش مكتوب فيه .. ربما وجبة كاملة ولا وجبة عادية هههههه والله نسيت، كون نلقى واحد نصورهولكم)
وتقدر تشري ب20 دج ولا بالقدر اللي تحب .. يعطيك carnet
بعد ماتشري تروح تدير الطابور
كاين زوج طوابير واحد على اليمين وواحد على اليسار
الأسطورة تقول باللي اللي على اليمين يمشي أسرع من اللي على اليسار، وفعلا هادا هو الواقع ومثبتة علميا ههههههه
مانقدرش نشرحهالكم كيفاه أثبتتها أنا بالصح كي تشوفوا ربما تفهموا
ولا نقوللكم .. درك نحاول نشرح ومبعد نتوما قولولي لكان أنا على حق ولا لازمني نعمل على فرضية جديدة هههههه
الشرح: (تحبوا تفوتوه فوتوه هههههه)
شوفوا الطابورين عندهم نفس الطول ونفس الانحناءات وبالرغم من أنو عدد اللي يكونوا في الطابور الأيمن أكبر بكثير من اللي يكونوا في الطابور الأيسر إلا أنو الأيمن أسرع
والسبب كالتالي
عند نهاية الطابور كاين الباب، والباب جاي في الحيط تاع الطابور الأيسر ولكن كي يدخلوا منو الطابورين يندمجوا في طابور واحد، مبدئيا نورمالمون يكون الطابور الأيسر أسرع
ولكن لا
لماذا ؟
لأنوا الطلبة في الطابور الأيمن يلعبوا دور الحاجز لبعضهم البعض،
لكونهم يديروا انحناءة صغيرة باه يوصولوا للباب على عكس الطلبة في الطابور الأيسر اللي يبقاوا عند الحافة تاع الباب،
بينما تاع الطابور الايمن يستمروا بالمرور دون توقف
حتى يضطر الطلبة من الطابور الأيسر أن يوقفوا التدفق ليتمكن واحد أو اثنين من المرور فقط لأنو التدفق راح يزيد يستمر
وهكذا، يدخل عدد أكبر من اليمين مقارنة باليسار وهذا مايفسر سرعة الأيمن عن الأيسر
هاه كيفاه جاتكم الفكرة ؟؟ ماعلياش ؟ نخدم دماغي شويا هههههههه
تاني لازمني نحذركم من الطابور breakers وأغلبهم ذكور (نورمالمون مانحلبكمش في حوايج كيما هادو تديروا علينا النش هههههه)
بحيث واش يديروا ؟؟
يروحوا من الطابور الأيسر اللي عادة يكون فارغ أو مناصف،
ومبعدا يقفزوا للطابور الأيمن تحت عقلية "اسمحولي نعدي من فضلكم"
وأنت تضطر تسمحلوا باه ماتبانش مشطوف على صحن لوبيا ولا عدس هههههه
نفترض أنكم دخلتم من الباب ههههههه
أخرجوا التيكي تاعكم لأنو الموظف يجي ويديه من عندكم ..
أنا شخصيا نحب نعتني بالتيكي تاعي ونمدوا كما عطاوهولي .. ماش كيما بعض الناس يردوه نشافة مسكين
نحير كيفاه يقدروا يديرولوا هكااك ههههههههه
ومبعدا تكملوا التكوفير حتى توصلوا وين يسربيولكم البلاطو تاع الحديد كيما تاع الحباس ههههه
للأسف الموظفين مايكوفروش مع الطلبة .. يدخلوا من المخرج ويجيوا يحبسوا الطابور باه يديوا البلاطو تاعهم
وبالملاحة والابتسامة يخليوك تتخلى على دورك ليهم حتى يخلصوا وتستأنف أنت
أيضا إذا متلا دارو لوبيا .. هوما في الأغلب مايديروهاش وحدها
ديما يحسبوا حساب لواحد ماياكلش اللوبيا دونك يديرو معاها حاجة أخرى .. كاشير متلا ولا فرماج ولا طون
لذا إذا ماكش رايح تاكل اللوبيا ..
مد يدك داخل النافذة اللي يخرجولك منها البلاطو وقوللهم باصبعك السبابة ماتحطوليش
ولكن اسبقهم قبل مايحطولك فالبلاطو هههههه
هادي فكرة باه ماتطايشش الماكلة فالباطل
من الأفضل وخاصة للبنات ماتكوني هازة والو في يدك كي تجي هازة البلاطو
لأنو شويا تقيل وكاين دروج تطلعيهم
وأنا قداه من مرة نزلق ويستر ربي مانطيحش
"اتخيلوا برك نطيح بيا بالبلاطو .. نجيبها شهر ماندخلش للمطعم يزيدوا يشفاو عليا ولا ههههههه"
وكذلك تأكدي تهزي طرف فستانك بيدك كي تطلعي الدروج ..
تخافي تعفسي عليه وتاكلي ضروسك
علابالكم .. 7 سنوات في الشالي ... احتمال كبير تاخذ على الأقل طيحة قبل ماتتخرج ههههههههههههه
خاصة للناس اللي maladroit كيما أنا

تطلع هادو 3-4 درجات
يقابلك طابور صغير وين يكملولك الوجبة بنص خبزة وباط ياوورت ولا باطة طون ولا علبة عصير ولا تفاحة ولا بانانة ولا مندرينة ولا فرماج
ومبعد تدور على يسارك بغية إيجاد طاولة تقعد فيها
يا إما تقعد تحت ولا تطلع الفوق ..
في الأغلب، العمال يقعدوا لتحت سما لفوق هو اختيارك
وبالرغم من أن المطعم مختلط إلا أنك تلقاه مقسم وحدو ههههه
على اليمين كان الذكور وعلى اليسار كاين البنات
وطبعا ساعة ساعة تلقى طفرات هنا وهناك (على الأغلب في جانب البنات ههههه)
"مرة جابتني طفلة منين يقعدوا الذكور وقعدنا قدام واحد نعرفوه من بكري
ومبعد ناضت وخلاتني وحدي .. تشوكييييت .. حشمت ننوض في وجهو نبدل البلاصة
بقيت قاعدة .. المزية ياخي الذكور ياكلوا أسرع من البنات .. ناض قبلي هههههه"

نسيت .. قبل ماتطلعوا الفوق كاينة طاولة فيها الملح اللي يحب يزيد الملح يدي معاه

في المطعم كاين القطط اللي يجيوا يتطفلوا وياكلوا
أنا نحبهم ونوكلهم ساعات .. لأني أكولة ومانخلي والوا فالصحن .. خاصة اللحم
سما القطط كي يجيوا لعندي وكأنهم جا لعند قطة كيفهم .. مافيهاش معايا هههههههههههه
البنات يتخلعوا من القطط ويبداو يزعقوا ويهربو ههههههههههه
المهم .. كي تدبروا طابلة تقدروا تروحو تغسلوا يديكم والمغرفة تاعكم والتفاحة إذا كان فيه تفاح
وين ؟ شفتوا منين جيتوا بعد ؟
ترجعوا على نفس الطريق
قصدي على الدروج ثم الطابلة تاع الملح والراجل اللي يعطيك التفاحة وتكملوا
معناتها على يمين الطابور
تلقاو مغسل صغير .. كاين الما والصابون السائل والمرايات تاني هههههه اغسلوا وارجعوا تاكلوا
وشهية طيبة !

المخرج .. تخرجوا من باب آخر
درك نشرحلكم واش من باب
كي تكونوا لتحت تلقاوا الدروج اللي أقرب للمدخل
وفي آخر الصالة كاين دروج آخرين في الأغلب ينزلوا منهم
(ماتطلعوش منهم خاصة كي يكونوا الناس هابطين لأنو وجودكم قد يخلط عليهم المرور
وهوما مساكن هازين البلاطوات التقال، تخافوا يتكركبوا لتم)
المهم هادوك الدروج كي تهبطوا منهم يقابلكم المخرج وقبل الخروج لازمكم القيام ببعض الأمور النظامية
أول حاجة الخبز واللبابة اللي بقات من الوجبة تاعكم تحطوها في السلة اللي على يمين الدروج اللي يأديوا للمخرج
ثم تنزلوا من الدروج إلى واحد البار (عذرا على التعبير، ماعنديش مصطلح غيره)
فيه موظف تعطيه البلاطو بعد ماتكون أخذت الملعقة وحطيتها في القرطلّة (السلة) اللي على اليسار
هذاك العامل زهواني ساعات يغني ساعات يقرا قرآن .. وساعات ماعلاباليش واش يدير هههههه
ومبعدا تخرجوا وهناك عين تغسلوا فيها يديكم
(ماننصحكمش فالشتا .. تجمدوا برك هههههه وتحيرلكم كيفاه تسخنوا)
وتتجهوا للدروج اللي على يساركم (الدعوة غير دروج هههههه)
وتكملوا الطريق حتى توصلوا للكافتيريا اللي درك نشرحوها هي والطاكسيوفون
وتخرجوا من باب آخر جاي فوق الباب اللي دخلتوا عليه من قبل

إيييه نعم، تذكرت.
عندكم الحق تعاودوا الوجبة مرتين آخريين على ما أظن،
وتقدروا إذا حبيتوا متلا تزيدوا غير العصير ولا الطون ولا الياوورت لكان عندكم الزهر،
ترجعوا مارش آريار برك دون أن تعاودوا تديروا الطابور
وتروحو للراجل اللي ياخذ التيكيات وتعطيه واحد وتقوللوا رايح نجيب عصير برك
وإذا حالفك الحظ وكان الراجل الآخر اللي يسربي العصير في مزاج جيد لربما يعطيك وماتضطرش تعاود تضرب دورة.

آظن أني قدمتلكم كل المعلومات على واش لازم تعرفوا على المطعم
أو كما يسميه الجامعيون "الريسطو" اختصارا لكلمة restaurant
(نعم، لازملك تعرف واش هي الكلمة اللي تهدرها ومنين جات وتستعملها استعمال جيد هههههه)



دركا نروحوا للكفتيريا
قلنا الكفتيريا جاية في الباب الموالي للباب اللي دخلنالو باه رحنا للمطعم
والباب هذاك فيه كافتيريا وهاتف عمومي (دركا تحول إلى مكتبة وفليكسي، بالاك نحاو الطاكسيفون والله أعلم)
الهاتف العمومي يقابلك كيما تدخل، جاي على اليسار
وباب الكفتيريا جاي على اليمين شويا فالدورة،
وكان كاين باب مشترك تدخل منو للكافتيريا من الطاكسيفون والعكس ولكن سدوه .. لا أدري لا ردوه هاد العام أم لا لأني مازلت مارحتش للشالي
فالكافتيريا يتباعوا تقريبا كل المشروبات،
الطلبة يضلوا فيها،
وقت الفطور كاين غاشي حمر، ووقت الغدا ماتحكيش،
فالمساء اللي تفرغ شوي وفي وقت الحصص تلقاها روعة
ولكن ماش مليحة للمراجعة فيها
لأنو ساعات تتأزم الأمور في المكتبة وتضطر تلقى بلاصة تقرا فيها خاصة في وقت البرد
والحسوسات فالكافتيريا،
حط حاجة في ودنيك موسيقى ولا قرآن ولا أي حاجة واقرا
(لازم توالفوا تقراو بحاجة في ودنيكم أحسن من الحسوسات تاع الغاشي)
أنا في الأغلب نحط قرآن .. الموسيقى تلهيني ..
القرآن أحسن خاصة سورة يس.. يقوللك مليحة للتركيز
المشروبات اللي علابالي عندهم :
القهوة، الحليب فالصباح، التاي، الكابوتشينو ولا مانعرف واشيا،
الما، الكوكا، البيبسي، سبرايت، العصير تاع الكراطن رامي، ودايلي بالاك ورويبة،
وتاع القرع تاع إيفري... ومشروبات أخرى
(راني ندير فالpub يامحاينك)
يجيبوا:
الكرواسون، والميلفاي، والمادلان، وقاطو باتيسري، فالصباح...
يبقى المادلان في الأغلب (ساعات يجيبوا قلب اللوز)
فالغدا كاين بيتزا، وكاين كاسكروت باطاطا بالعضام (فريت أوملات) ولا بلا العضام ولا بالعضام وزيدلهم الفراماج،
وكاين كاسكروت مارقاز بالاك ولا كفتة ..
والله نسيت (من كتر التقشف ناكل أنا غير الفريت أوملات هههههه)،
وكان كاين السوفلي بالصح عادو يديروا واحد ماش مليح .. ماش كيما بداية العام
وكاين اشياء أخرى مانعرفش حتى نسميها
بالنسبة للأسعاار نااااار .. كلش زايد ب 5 دج .. كلش كلش !!
أنا بما أنو نسكن قريب .. نشري الكرواسون والعصير باه نفطر في الأغلب وقرعة ما من الحوانت قدام دارنا
وفي الشالي نزيد نشري قرعة ما كي تخلصلي الأولى .. ونتغدا في المطعم وساعات كي نحب نقلّش روحي نروح للكافات
بزافف عليا وعلى ماما –أنا مانيش نجيب فالدراهم- نشريهم لبسة خير ههههههههههههههه
في وقت الغدا خاصة .. يقوم التكوفير، ويبقاو الغاشي واقفين،
ونضطروا نتصيّدوا الناس اللي قربو يخلصو ورايحين ينوضوا باه نحكموا بلايصهم هههههههه
تجيبها ساعة وأنت واقف تحوس على بلاصة
وساعة وأنت مكوفر على الكاسكروت تاعك على جالة ربع ساعة ترهج فيها هههههههههههه
على ما آظن هادا واش كاين



بالنسبة للطاكسيفون اللي قلتلكم أصبح مكتبة أكتر منه طاكسيفون يبيع تاني كلش
- يدير الفليكسي
- يدير الفوطوكوبي
- يحطو عندو الأساتذة ليكور ولا لي تيدي ساعات
- يبيع الكرارس، الأقلام، الأدوات... وأهمها أقلام التسطير (highlighters) هادوك هوما أصدقائكم الصدوقين
- يبيع الريحة، يبيع الشيكولة، الشيبس، الحلوى، الشوينغوم .. الهموم كامل عندوا
بالصح هو تاني كلشي زايد 5 دج
أنا نحب نشري من عندو الشيبس تاع لايز مايبيعوش زايد سومة "الله يبارك" هههههه
خلصنا الطاكسيفون والكافيتيريا
(نورمالمون نسلك .. راني نديرلهم فالبيبليسيتي بااطل !!)



درك نكملوا طريقنا
كي نتبعو الطريق نلقاو على يميننا "دار الراعي الصالح" Le bon pasteur
وهي كنيسة .. أنا جامي دخلتلها بالصح دخلولها بنات ههههههه
لا تحبو تديرو كاش مغامرة ولا حاجة
وعلى يساركم كاينة البوابة تاع الكلية
تدخلوا منها وتمشيوا .. وانتبهوا الطريق لتما أي شويا تزلّق تزيدوا تاكلوها طريحة
(شفت في بداية العام طفلة مسكينة زلقت لتم،
الحمد لله ماصرالها والو .. كلاتها تبهديلة برك هههه،
مازالت حية ههههه، سامحيني لاكان راكي قاعدة تقراي في واش راني نقول هههه)
المهم كي توصلوا تلقاو على يمينكم باب كبير
وكي تدخلوا منو تلقاو لافتة فيها "وحدة البحث العلمي" ولا حاجة كيما هكا
ادخلوا من الباب الصغير هاداك وكملوا امشيوا .. تلقاو على اليسار باب
لتما يحطولنا الدروس والأعمال الموجهة .. يسميوه le tirrage
بما أنكم سنة أولى وفي بزاف .. درك يمنع عليكم تهزوا أكتر من مطبوعة واحدة ههههههه
ممنوع تهزوا لصحابكم .. لأنو الغاشي يهز بلا حساب
ومبعد كي تجي متأخرة تلقايها صحرا
أنا متلا اضطررت باه ندير فوطوكوبي على بزاف أوراق واحد النهار غير مناه طاحوا عليهم كي العميان وخلصوهم
المشكل .. متلا وحدة تجيب لصحاباتها .. ومبعدا تلقاهم هوما تاني جابوا
ومبعد ؟ يطيشوهم !!!
واللي تطفر فيه هو هاداك اللي يلحق على الفضالة تاع الناس
واش من فضالة ؟ ياااو مايلقى والو ههههههه
المهم .. الغرفة جاية مستطيلة ومقسمة بحيث جزء منها مستطيل والجزء الآخر مربع
في المستطيل حاطين الطابعات والأوراق .. ويقعدوا فيه الموظفين
والجزء المربع فيه طاولات في شكل مربع (مستفين كيما يديرولهم زعما كيما كنا نديروا الحفلات في المدرسة ههههههه)
ويحطولنا فيهم الدروس .. يحطلك ورقة فيها اسم المادة وكذلك ورقة فيها السنة الخاصة بيها
مثلا وحدة anatomie والتانية 1ere année
تروحوا تجبدوا المطبوعات في طابور (على فكرة في الجامعة .. تشبعوا طوابيييير ههههه)
تدوروا فيه بنفس حركة عقارب الساعة
نصيحة ! انتبهوا من الأوراق كي تهزوهم لأنو ساعات كي يطبعوا يغلطور يطبعو غير recto وماكانش الverso
وكي تجي تقرا الدرس تلقى ورقة ناقصة
انتبهوا .. كي تجيو تهزوها قلبوها واتأكدوا منها
وبرك
درك نعاودوا نخرجوا من التيراج
ممكن تكونوا لاحظتوا هادوك الدروج اللي منين الساحة اللي في الدخلة تاع الباب الأول وين تلقاوا اللافتة
هادوك كاين مخابر لتما .. Mme Bouzid دارتلنا فيهم des TP على l’optique
على فكرة .. هاديك المراة .. روووعة خلاصصص
Bonjr mes chers etudients !! comment allez vous ?
ههههههههههههه
وكي نقولولها ماراناش ملاح تقوللنا مالا راكم تهبلوا ههههههههه
المهم هادوك المخابر مهجورين .. شفتوا هادوك البلايص المسكونين اللي يديروهم في الأفلام ؟
والله غير يشبهولهم
مام لقينا واحد الباب .. جاي كيما السرداب
أنا خفت منو والله .. هبطت ليه خولة تتصور وقالت نطبطب
خفت يردولنا التطبطيبة هههههههههههههه
ماطبطبناش .. خفنا ههههه



مازال الشالي كبير وأنا غلبت من الحكايات ههههههه .. سبحان الله ! والله غير درت بزاف مغامات
بانتلي مادرت والو ههههههههه
المهم كي نخرجوا خلاص ونرجعوا للطريق كاين دروج وبوابة
كي نطلعوا منهم نلقاوا ساحة .. قصدي parking على اليمين وعلى اليسار كاين البنايات
كون تكملوا على اليمين في طريق .. تلقاوا دروج تروحوا منهم للمكتبة
وكون تكملوا من أمام هاديك البوابة تلقاو:
1- طريق فوقانية تدي للمدرجات 1 و2 و3
2- وطريق تحتانية تدي حاشاكم للمرحاض
وتدي للصالات وين يديروا الأعمال الموجهة (الصالات من 1 إلى 10)
ولتما يعلقولنا الaffichage تاع وين نعقبو les controles
المهم
كاينة طريق فوقانية .. فوق الفوقانية الأولى ههههههههه (مانعرف لافهمتوني)
المهم فالخريطة هاديك .. قصدي ال"زعما-خريطة" بينتلكم الطرق بالأصفر
3- الطريق فوق-الفوقانية تدي (وهي أكبر طلعة فالشالي.. أنا نعرق كي نطلعها ههههه) للملحقة تاع المكتبة
المسماة بالAnnex وتاني المدرج 7
المهم .. لانكس هادي بناية من زوج طوابق وفيها 3 أهم مرافق
(ماعلاباليش واش فيها تاني .. المهم هذا واش شفت)
أظن لتما رحتوا سجلتوا
المهم في الباب مع الدخلة كاينة على اليمين la salle d’internet
فيها حواسيب وتقدروا تروحوا تكونيكتيوا فيها .. بالبطاقة تاع التعريف
رحت أنا واقيلا مرة مع الطفلة .. هي اللي حلبتني فيها هههههه
وعلى اليسار كاين ياسين هههههه .. هدا يبيع الدروس ويبيع الامتحانات السابقة والما والحلاوي والعصير
لحد الآن مازلت مادخصتش عليه وعيطتلو باسمو ههههههه
هيه .. كاين ياسين ومريم هههههه لتما تاني يقلاصيولكم ليكارت تاعكم هادوك وتاع المكتبة
وكي تطلعوا فالدروج هادوك اللي شويا هاه ويطيحوا كاينة المكتبة
بالصح ماهيش هادئة مثل المكتبة الأصلية هههههه .. هادي فيها الحسوساات قرااافف
وكاين الجزء الهادئ تاعها بالصح جامي لادخلتلو ههههه
يسميوه le coté silence ولا باختصار e silence



بقاتلنا المكتبة
باه نرجعوا ليها عندنا زوج طرق
الطريق الظاهرة وهي أننا نرجعوا مارش آريار كيما جينا
والهبطة تاع لانكس هاديك أسوأ من الطلعة ..
خاصة إذا كنتي بالطالون زميلتي الطالبة ههههههه
والطريق الآخرى والتي مابينتهاش في الزعما-خريطة هي من المدرج 7 وتكملي بين أشجار الغابة
وتنزلي منحدر بسيط وتكملي في وحد الطريق "تحسي روحك كلّي خرجتي من الكلية"
ولكن كملي برك حتى توصلي
(ماعلاباليش علاه راني نخاطب بالمؤنث هههههه)
دركا المكتبة
اففف غلبت .. نحبس شوي من الكتيبة ونولي هههههههه
المكتبة أو la bibliothèque أو باختصار La bib
هي المكان وين يجتمع الخباشون من كل قطر (السنوات)
أين يمارسون هوايتهم المفضلة والدف من وجودهم
الخبيش والحفير والعض أحيانا على حسب صعوبة المادة وأهميتها في السنة
المكتبة كاين زوج أقسام فيها .. لا تقل أهمية الأول عن الثاني واللي هوما
المكتبة كما نعرفها : المكان الذي نتحصّل منه على الكتب
والمكتبة : المكان الذي نقرأ فيه الكتب ..
ففي الشالي هاذان القسمان منفصلان بحائط
المهم إذا جينا من الطريق العادية سنجد أين نستلف الكتب ثم يليه المكان الذي نقرؤها فيه
ننزل في الدرج ويقابلنا باب إطاره أزرق وفيه مرايا وفوقه لافتة فيها كلمة مكتبة
تدخلوا من الباب (في الأيام الأولى تكون مغلقة لأنهم مازال مايفتحوش التسليف ؟؟ نقولوا التسليف ؟ السلفة ربما لا علينا)
المهم، نهار يقولولكم روحو باه تجيبو الكتاب تاع الستات stat/statistique
خذوا معكم البطاقة تاع المكتبة باه يحطوها عندهم للأبد ولا لا أدري إلى متى هههههه
باه تعودو تسلفو .. لأنها بمثابة الملف تاعكم عندهم
(أني نسيت إذا حتى رحنا سلفنا الكتاب باه عطيناهم البطاقة ولا قبل !)
نشرحلكم الدخلة وكيفاه تديروا كي تروحوا تسلفوا ههههه
كي تدخلوا من الباب يقابلكم باب .. ماعلاباليش واش فيه
المهم وعلى يساركم دروج .. تنزلوا فيهم
شويا يخوفوا تحسوا رواحكم رايحين للمهلك تاعكم ههههههههههه .. مضلمين !
المهم تلقاو بابين
واحد في الحيط اللي ينتهيو عنده الدروج،
والثاني على يساركم وأنتوما عند آخر درجة
تدخلوا في الأول لأنو الثاني يدخلوا منو عمال المكتبة
كي تدخلو .. تلقاو غرفة طويييلة وعالية ..
على يمينكم كاينة رسومات تاع العضلات تاع جسم الانسان وربما الهيكل العظمي تاني
وعلى اليسار كاين بار كبيييير
(مازلت نستعمل في الكلمة ههههههه مالقيتش اسم بالعربية، عارضة ؟ لا غالطة)
تمشيوا تمشيوا حتى توصلوا للبلاصة اللي يسلفوا فيها تاع السنة الأولى والثانية
اوقفوا لتم ومن الافضل تكونوا جبتوا معاكم:
- قلم للكتابة
- البطاقة تاع الطالب تاعكم
يجيكم الموظف .. ماتتخلعوش منو وإلا أو يفيق بيكم بوجاديين هههههه
Play it cool
قولولو على الأقل السلام عليكم وسميولوا الكتاب اللي حابينوا إذا كنتوا تعرفوه أو سميولوا اسم الموديل (المادة) اللي حابين الكتاب فيها
(رايحة نتحدث على الكتب في الجزء الثاني أو الثالث ان شاء الله .. لا مانسيتش)
في الوقت اللي يروح يجيبلكم الكتاب أنتوما تهزوا وريقة من الوريقات المحطوطة على اليمين
ونسيت .. قبل ذلك .. قصدي كيما تسميولوا الكتاب قدمولوا البطاقة تاعكم
أو ربما تقدموهالوا مع الوريقة بعد ماتعمروها ؟؟ والله نسيت ههههههههه (تقول جامي لاسلفت كتاب ههه)
المهم قدموهالوا أولا وخلاص
عمروا الوريقة هاديك وإذا واجهتوا صعوبة ماتخافوش واسألوه
درك ننعتلكم كيفاه على حساب مانتذكر
كاين وين تكتبوا اسمكم واللقب تاعكم
وكاين وين تكتبوا الرقم تاع البطاقة تاعكم M15/000
وكاين وين تكتبو اسم الكتاب
وكاين وين اسم الكاتب (أنا جربت نخلط في الأسماء تاع الكتاب لأنو ساعات تضيع الوقت وأنت تكتب فيه)
وتاني التاريخ اللي سلفتو فيه الكتاب
والتاريخ اللي تردوه فيه لاداعي تحسبوا 20 يوم (اللي هو على فكرة مدة السلفة)
الموظف عندو طابع جاهز هههههه (أنا كنت نحسب ونحط التاريخ هههههه)
وأخيرا واحد الحاجة هكدا .. المهم أي تقريبا الحاجة الوحيدة اللي ماتفهموش واش هي
ولكنها رقم تلقاوه في الكتاب .. في الأغلب في البداية (الصفحة الأولى)
أظن هو رقم التاريخ اللي شروه فيه ولا حاجة
وبرك .. يعطيكم الكتاب وتعطيوه البطاقة ... ويردلكم البطاقة وتروحو تروحوا !!!
(أني تفكرت .. تعطيوه البطاقة أولا ثم تسميولوا الكتاب، يروح يجيبلكم الكتاب، تعمروا الورقة، تعطيوه الورقة، يعطيكم البطاقة، تروحوا فرحانين هههههه)
دركا نخرجوا زعما رايحين نقراوا الكتاب تاعنا في المكتبة ..
هي كيما نجيوا جايين من أي مكان .. ماننزلوش فالدروج وين نروحو للمكتبة اللي نسلفوا منها
ولكن نكملو بضع خطوات (زوج خطوات) وننزلوا من الدروج التانيين وين نلقاو المكتبة ندخلوا ..
بالصح مادامكم لتحت
عديو في المدخل هاداك اللي على يساركم
بلا ماتطلعوا الدروج وتعاودو تهبطو الدروج لخرين (ماتديروش البهادل)
يقابلنا باب ودروج على اليسار، هاد المرة ندخلوا من الباب (ماعلاباليش واش كاين فالدروج ههههه)
كي تدخلوا تلقاوا مكتب على اليسار فيه موظف أو اثنين هوما اللي يحافظوا على الهدوء داخل المكتبة
(يسكتوا الغاشي، ومايخليوكش تدخل بكاس قهوة ولا تاي ولا حاجة تقدر تسيح غير الما والعصير مسموحين بالاك)
وكاين باب على اليسار
يدخلك لقاعة تاع le coté silence تاع المكتبة
فيه كل واحد يقعد وحدو وماكانش الحس خلاص ..
لتم الخباشين الحقيقيين ! (أنا قعدت فيه مرة بالاك لأنو أصلا ماتطيرلكش البلاصة فيه هههههه)
وفي القاعة اللي كنت فيها من قبيل .. القاعة العادية وين تقدر تهدر ولكن بصوت منخفض
كاين طاولات تاع زوج وكاين تاع 4
بالصح درك مع الازدحام رجعوهم كامل تاع 4
ومع الازدحام تاع هاد السنة نظن مام السيلونس كون غير ينحيوه !
لأنو مازال ماشفتوش كي يكونو les controles تاع زوج سنوات في نفس النهار ..
ياو تطيح الروح على البلايص ههههههههههه
الغاشي يعود يقرا برا .. خاصة فالبرد والله ماتقدر !
ساعات بالصح يحلولنا صالات تاع الأعمال الموجهة يخليونا نقراو فيهم
يكتر خيرهم
في المكتبة كاين قانون !
إذا لقيت ولو ورقة وستيلو فوق الكرسي ولا الطابلة .. فتلك البلاصة محكومة
إذا قادر على المشاكل اقعد اقرا فيها وكي يجيك اللي حكمها اتفاهم معاه ههههههههه
ولا اقعد اقرا مابين زمان ينوض واحد وتدبر أنت بلاصة (بما أنها شاغرة)
لأنو ساعات الانسان هاداك اللي حاكمها أو في المحاضرة ولا أو في التيدي يقرا .. ولا بالاك أو فالسبيطار
والناس أي واقفة تستنى كشما تفرغ بلاصة ههههههههههه
وآخر حاجة .. انتبهوا من كراسي المكسرة .. مهما خذلتك الحياة، ماتقعدش فوق كرسي مكسّر !!!!
أنا قعدت وطحت ههههههههههههههههههههه
نشفى بالاك كي راجعنا للكونترول تاع الامبغيولوجي ههههههههه
الحمد لله جات سالامات .. ماصرا والو
أيضا ..
في المكتبة في بداية العام يجيبوا يديروا معرض للكتب
ننصحكم .. ماتشريوا ماوالو .. مازال الحال باه تشريو الكتب
أنا طلبت النصيحة من الشخص اللي حاكم المكتبة ونصحني وقاللي ماتشريش
أو عايب من رجلو ويبان ناس ملاح
اسألوه وهو ينصحكم !
وكذلك ساعة على ساعة يجيبوا يديروا احتفالات لتما في المكتبة فالكوطي سيلونس
أنا جامي حضرت حفلة هههههه .. اختكم منا تاع قراية وبس ههههه (ياو فاقو)


كاين مرفق نسيت ماهدرتش عليه
هو l’auditorium جاي منين المكتبة وين نسلفو الكتب..
يديروا فيه المحاضرات تاع النيفو الطالع ماش تاعنا حنايا ههههه حتى نكبروا شويا
وساعات يديروا حوايج مام حنا ندخلوا ونستفيدوا ..
ولكن أنا كنت نحشم وتاني كانوا في وقت القراية وأنا قريب ماخرجتش العام
دونك كنت نروح نقرا خير ياربي كشما نفرجها على عمري
ماقلتلكمش قداه جبت فالعام ؟
أوكي جبت 11.44 ههههههه والله ماقريت كيما يلزم
كنت نجيب العشرة والحداش غير باه ننجح .. ماحطيتش فكرة أخرى في بالي
قلت ننجح وماندخلش راطراباج .. والحمد لله حققتها هههههههههههه



نظن خلصنا أهم المرافق، بقات برك ننعتلكم وين جاييين بقية المدرجات 4 و5 و6
وكذلك الصالات تاع les td من 10 إلى 20
كيما قلنا .. كاينة دخلة بالدروج وكون نكملوا الطريق نلقاو دخلة للسيارات بما أنو كاين باركينغ (ماعرفتش كيفاه اسمو بالعربية، مرصف ؟)
نروحو من تما باه ننقصوا شويا التعب تاع الطلعة هاديك كون نمشيوا من الطريق
حتى نوصلو لباركينغ صغير شويا
على يمينو تلقاو المدرجات والصالات
وكاين مرحاض آخر حاشاكم لتما تاني
كون تزيدو تكملو الطريق .. تخرجو للمدخل التاني للكلية
يروحوا عليه اللي يقراو في المدرسة تاع الاقتصاد ولا ماعلاباليش كيفاه اسمها



علابالكم راني غلبت من الكتابة ههههههههههه
وليت نشرح باختصار لكان لاحظتوا ..
المهم أنهينا والفضل لله في ذلك الحلقة الأولى من الموضوع اللي مازلت ماعلاباليش حتى كيفاه نسميه
والحلقة الثانية رايحة تكون فيها كيما قلنا
"شرح لأهم الأمور الخاصة بالدراسة والنظام والاختبارات كيف تتم وغيرها"
والحلقة الأخيرة رايحة نتحدث عن كيفاه قريت عامي ..
صحيح ماحققتش نتائج ممتازة ولا جيدة مع الأسف
والمشكل أنها ليست حتى قريبة من الجيد هههههههههههه
(يااه نندب على هاديك التبهديلة)
ولكن أنا قاعدة نحكيلكم تجربتي لذلك سأرفقها بالأخطاء اللي درتها وبإذن الله تجنبوها ورايحين تجيبوا خير مني


وصلنا للنهاية
إذن .. إذا كتّب ربي ورديتو على الموضوع، نحبكم ترفقوا أسئلتكم على الحلقتين القادمتين
باه تساعدوني نلم بجميع التساؤلات تاعكم وأنا نحاول نجاوب عليها في الحلقتين .. أو على الأقل على أغلبها
نخليكم على خير ونتمنى تجربتكم في هاد الأسبوع اللي مر أفضل من تجربتي
ونتمنى نصائحي ماهيش متأخرة بالنسبة للي دخلوا ديجا ..
ونتمنى تبقى نصائحي مفيدة للمقبلين على الطب في الأعوام القادمة
وأيضا نتمنى النصائح هادوا يساعدوا حتى الطلبة اللي في الكليات المختلفة عبر التراب الوطني
نخليكم على خير وان شاء الله استمتعتوا بالقراءة .. وسامحوني هدرت بزززاااففففف ههههههههههههه
أنا قلقت من روحي.
سلام

كانت معاكم نعمة .. طالبة طب بجامعة قسنطينة مقبلة على السنة الثانية ان شاء الله

ملاحظة: الحلقة الثانية رايحة نطوّل باه نزيد نحطها لأني اليوم رايحة نستغل بقية الوقت اللي بقى من النهار في تحضير نفسي للدخول غدا، والحلقة أصلا مازلت مابديتش في كتابتها/ حلقة ؟؟ تقول عليه مسلسل يااخااه ههههههههه.