بسم الله الرحمان الرحيم الصلاة والسلام على رسول الله صلى الله عليه وسلم البارح كان عيد ميلاد بنوتي نور حياتي و أميرتي لميس قفلت 7سنين يا رب العمر كلو و ياربي تعيشلي و نعيشلها و نشوفها طبيبة كيما راها متمنية قولو آمين و ربي يحفظلكم كل غالي غاليتي طلبت مني هيلو كيتي بصح كاملة من الرأس للقدم و قتلها ميكون غير خاطرك هي عجبتها و فرحت بيها إن شاء الله نتوما تعجبكم و تمدولي رايكم بكل صراحة إليكم الصور باقي صور الحفلة محبوش يطلعو نوعدكم نسايي حتى نحطهم قاع ياريت تعجبكم أختكم في الله أم لميس و لجين نقول شكرا لكل من يزور موضوعي حتى و ميحطش رد نقولو شكرا رايحة نحط المقادير مكاش عندي باش نوزن أيا طلعت من النت كيكة مكيلا بالملعقة 5حبات بيض 5ملاعق كبار ميش معمرين بزاف سكر عادي 5ملاعق كبار معمرين فرينة نصف باكي خمارة القاطو فانيلا الطريقة كالعادة ضربت البيض و السكر حتى تضاعف الحجم ثم كبيت الفرينة و الخمارة و الفانيلا ثم طيبتها الكريمة درت 500غ زبدة ماني و ضربتها مع كاس كبير سكر رطب مليح حتى بياضت و تضاعف الحجم تاعها ثم ضفتلها صفار حبة بيض و الفانيلا و زدت ضربتها مليح ثم ضربت كاس غبرة الشانتي مع كاس حليب بارد و ضفتهالها خرجت بنتها روعة بصح الكمية تاع الكريمة ياسرة أنا كثرت باش نخبي منها قطعت شكل القطة بالكرتون ثم جبت الكيكة وحطيت عليها الشكل ثم لسقت بالكريمة ودرت عجينة السكر اللي تتباع و غلفت بيها باقي المراحل مصورتهمش و الله لهيت غير فالتزيين الصور الجايين من الحفلة و هذي صورة الكاب كيك اللي ثان درتو و زينتو بالشانتي