[ابداع جزائرية]

الحلقة 19
كان ياما كان ....



و ما تحلا قعدة غيييير بذكر النبي عليه الصلاة و السلام ....
و نقولو مع بعض بأجججمل صوت ...

عليه الصلاة و السلام ...


سيدنا محمد و المسلمين ربحوا الكفار في معركة بدر ...

لأن المسلمين دعاو ربي سبحانه
و دارو خطة و حاربوا بكل قوتهم
المسلمين كانوا في قليل كما قلنا
و الكفار كانوا في بزّااااف
ورغم هذا ربّي سبحانه وفّق المسلمين يغلبوهم

الكفار روّحوا يجريوا لمكّة و هوما متغاظين و ماعلابالهمش وش يديروا

كفاه يغلبونا المسلمين واحنا كنّا اكثر منهم ؟؟؟؟؟
كفاه تصرا؟؟؟؟؟؟

ماعلابالهمش بقدرة ربي سبحانه...

وبلّي اللي يتبّع وش قال ديما ينصره

وزيد يدخّله من بعد للجنّة اللي فيها كل وش نتمنّاو

الكفّار كانوا راح يهبلوا ...وقالوا ماناش راح نسكتوا

جمعوا بعضاهم ...وداروا جيش كبيييير

فيه 3000 كافر ...وجابوا سيوف وسهام

وجمال واحصنة

وقالوا نروحوا للمدينة...نعاودوا نحاربوا المسلمين

ونغلبوهم...

مافيهمش فايدة

الشّر اللي فيهم مايحبسش


سيدنا محمد عرف ...
عرف بلّي الكفار زادوا اتجمعوا
و جايين ياذيوا المسلمين و يقتلوهم
سيدنا محمد جمع أصحابه المسلمين الشجعان بسرعة
و قالهم بلّي الكفار الأشرار جايين بجيش كبير للمدينة
و سقساهم وش رايكم؟

نخرجوا نحاربوهم قبل ما يوصلوا المدينة ؟؟

ولا نستنّاو حتى كي يجيوا عندنا؟؟
المسلمين الشجعان الأقوياء ...

قالوا : لالا احنا نخرجوا نحاربوهم و مانستنّاوش يوصلونا
المسلمين الشجعان مايخافوش...
لأنهم عارفين بلّي راهم على حقّ
و عارفين بلّي اللي يتبّع كلام ربّي سبحانه عمره مايخيب

اتجمعوا المسلمين و داروا جيش فيه 700 واحد مسلم

و خرجوا برّا المدينة مع سيدنا محمد باه يقابلوا جيش الكفار
ووصلوا حتّى لجبل .... اسمه جبل أحد

وحبسوا عند الجبل
سيدنا محمد بدا ينظّم في المسلمين
يعني يقول لكل واحد وش لازم يدير...
وكل واحد وين لازم يوقف...

سيدنا محمد قال لجماعة من المسلمين يطلعوا فوق الجبل
و معاهم سهااااام بزّاف ....

باه يرموها على الكفار الأشرار من فوق الجبل

لكن سيدنا محمد قالهم على حاجة مهمة بزّاف
قال للمسلمين اللي فوق الجبل ...

عندكم ..عندكم تنزلوا من على الجبل مهما كان

إلا إذا قلتلكم...

و باقي المسلمين الشجعان معاهم السيوف ...

يستنّاو في الكفار الأشرار و مستعدين تحت


وصل جيش الكفار الأشرار

و هجموا على المسلمين.....

المسلمين الشجعان حاربوا بكل قوتهم


وبقاوا يحاربوا في بعضاهم...
والمسلمين اللي فوق الجبل يرموا السهام على الكفار الأشرار ...
... الكفار مالقاوش وش يديروا ...

و السهام نازلة عليهم كما المطر
و الكفار ماعلابالهمش منين جايّة؟؟؟؟
بزّاف كفار أشرار اتقتلوا

و الباقي خافوا من قوة المسلمين
و خرجوا من المعركة يجريوا

علابالكم وش صرا ؟؟؟؟ ...

المسلمين اللي فوق الجبل
فرحوا كي شافوا الكفار يجريوا و خايفين
راحوا نزلوا من الجبل باه يجمعوا أسلحة الكفار
وخلاّو الجبل فرغان...

كيفاه داروا هكذا....
و سيدنا محمد وش وصّاهم؟؟؟
قالهم أهم حاجة ...مهما صرا....عندكم ...عندكم تنزلوا من الجبل

إلا إذا قلتلكم....

علابالكم وش صرا ؟؟

أول ما الكفار شافوا المسلمين نزلوا من الجبل
رجعوا بسرعة
وهجموا على المسلمين مرّة اخرى


و طبعا ماكان حتى واحد فوق الجبل يحمي المسلمين اللي تحت

اتجمعوا المسلمين الشجعان حول سيدنا محمد ...
و بقاو يحاربوا الكفار بالسيوف
... و سيدنا محمد يحارب معاهم
كل المسلمين اللي داروا بسيّدنا محمد كانوا خايفين ..
يعودوا الكفار ياذيوه

و كانوا يحاربوا كلهم بأقصى قوتهم
ورغم هذا تقاس حبيبنا وسيدنا محمد في وجهه سال منه الدم

وتكسرت رباعيته ...يعني اسنانه
صلى الله عليه وسلم


و الكفار الأشرار المرة هاذي قتلوا بزّاف مسلمين
منهم عمّ سيّدنا محمّد :حمزة ابن عبد المطّلب



فسيدنا محمد أخد المسلمين اللي معاه و جراو بسرعة بالأحصنة ....

و راحوا ورا الجبل
قائد الكفار الأشرار طلع فوق جبل أحد و هو فرحان....
و قاعد يقول : ربحناكم...

غلبناكم في معركة جبل أحد كما ما غلبتونا في معركة بدر


لكن واحد من المسلمين الشجعان رد عليه
عمركم ما راح تغلبونا
لأنّه اللي يموت مننا في الحرب احنا المسلمين راح يدخل الجنة
لكن اللي يموت منكم يا كفار راح يدخل النااااار
عمركوا ما راح تربحونا
رجعوا الكفار لمكّة ..

و رجعوا المسلمين للمدينة بصّح المرّة هاذي كانوا خسرانين
كان غايضهم الحال علاه ما سمعوش كلام سيدنا محمد



لكنّهم اتعلموا أهم حاجة في حياتهم

أنّهم إذا حابّين يربحوا في الدنيا وفي الاخرة ...لازم يطيعوا سيّدنا محمّد

ويسمعوا كلامه في كل وش يقول عليه

حتى احنا اذا حبّينا نربحوا في حياتنا
لازم نسمعوا كلام سيدنا محمد في كل حاجة علّمهالنا
وإذا بغينا صح ندخلوا الجنة اللي فيها كل حاجة نتمنّاوها
لازم نسمعوا كلام سيدنا محمد ونطيعوه في كل امورنا

اللهم صل على نبيّنا و سيّدنا و قائدنا وحبيبنا محمد