[ابداع جزائرية]

الحلقة 14 :

كان يا ما كان....


و ما يحلاش الكلام إلا بذكر النبي عليه الصلاة والسلام.....عليه الصلاة و السلااااااااااام

11سنة...أمي
11 سنة و الكفار ياذيوا في سيدنا محمد ....عليه الصلاة والسلام
ويديروا كل الأفكار الشريرة باه يقلّقوا المسلمين

لكن في نفس الوقت المسلمين كانوا ثابتين واقوياء

وصابرين ومتّحمّلين كلّ الاذى نتاعهم ..
....علابالكم علاه؟
لأنه المسلمين عارفين و متأكدين بلّي هوما الصّح ...
ومهما داروا الكفار مش راح يسمعوا كلامهم
و راح يبقاو يسمعوا كلام سيدنا محمد .... و يحبوه
عليه الصلاة و السلام

وكانت ماما واحد البلاد بعييييييدة

وبااااهية فيها نخلات بزاااف...
وش اسمها حبّوباتي ؟

اسمها المدينة ...

تشفاو عليها؟

اللي راح ليها سيّدنا محمّد بكري مع أمّه باه يشوف اخواله

المدينة هاذي كانوا فيها ناس اسمهم الأوس والخزرج

وكانوا عايشين معاهم اليهود

كانوا يضالوا يتقابضوا مع بعض ...ويضالوا يقلّقوا فيهم

وكل مرة يتقابضوا فيها

كانوا اليهود يقلّقوا الاوس والخزرج ويقولولهم

رانا نستنّاو يبعث ربي سبحانه نبيّ مننا

كما جا في الكتب نتاعنا

وراح نحابوكم معاه ونغلبوكم ...
وهكّا ديما اليهود كل شوية يمكّروا في الاوس والخزرج ويهددوهم

حتّى في واحد اليوم من الأيّام

واحد النّاس من الاوس والخزرج قالوا بلّي رايحين لمكّة باه يحجّو

علابالكم ماما بلّي سيّدنا ابراهيم هو اللي علّم النّاس بكرييي خلاااص تحجّ

كانوا في ستّة .

6 رجال راحوا من المدينة لمكّة

وراحوا عند الكعبة

كي شافهم سيّدنا محمّد سقساهم ..

شكون نتوما؟

قالولوا احنا ناس من المدينة من الاوس والخزرج

سيّدنا محمّد سقساهم ،كاين يهود عايشين بحذاكم؟

قالولوا نعم ايه

قالهم بغيت نهدر معاكم

فقعدوا ...وسيّدنا محمّد صلى الله عليه وسلّم فهّمهم بلي هو النبيّ اللي ربي سبحانه بعثه باه يعلّم الناس يعبدوا ربي سبحانه

وقرالهم شوية من كلام ربي سبحانه ... القرآن

مّالا هاذوك الناس شافو مع بعضاهم

وقالولو صح....احنا علابالنا بلّي ربي سبحانه راح يختار نبيّ...

من اليهود اللي عايشين في المدينة معانا

كل ما يصرا بيننا وبينهم مشكل يقولولنا بلّي ربي سبحانه راح يبعث فيهم رسول وراح يحاربونا معاه ويغلبونا...

بصّح ضركا خلاص ..عرفنا بلّي نتا هو النبيّ اللي اليهود قالتلنا عليه وكانوا يقلّقوا فينا بيه..وراح نسمعو كلامك ونتبّعوك

وكي نرجعوا للمدينة راح نقولوا لأهلنا أنّه ربي سبحانه اختار نبيّ

وراح نعلّموهم الحوايج اللي علّمتهملنا ..

واتّفقوا مع سيّدنا محمّد صلى الله عليه وسلّم
أنّهم يتلاقاو مرّة اخرى ....وكتاه؟

بعد عاااام ....

راح يتلاقاو ثاني في الحجّ العام الجاي ..

رجع الاوس و الخزرج للمدينة وقالوا لأهلهم بلّي

ربي سبحانه اختار نبيّ خلاص وماهوش من اليهود

وعلّموا اهلهم الاسلام ...

يعني ولاّو 12 ...قدّاه من مسلم ولاّو ماما؟

12 مسلم ....مليح

بعد عام كااامل تلاقاو مرّة اخرى في وقت الحجّ

12 مسلم تلاقاو مع سيّدنا وحبيبنا محمّد ...وين؟

تلاقاو في مكان اسمه العقبة

سيّدنا محمّد دار معاهم لثمّا اتّفاق ...

سيّدنا محمّد قاللهم اوعدوني انكم :

تعبدوا ربي سبحانه وحده

وماتسرقوش

وماتقتلوش

ولا ادّيروا الشّر ...ولا تقولوا الكذب...

وتسمعوا كلام سيّدنا محمّد في كل ما يأمركم بيه

واللي راح يطبّق هاذ الاتّفاق ربي سبحانه راح يكتبلوا حسنات بزّااااف تدخّلو للجنّة...

هاذ الاتّفاق كان اسمه : بيعة العقبة الاولى

وش كان اسمه أمّي ؟

بيعة العقبة الاولى

وتفاهموا بعدها يتلاقاو ثاني بعد عام ..في وقت الحجّ

ال12 راجل هاذوك اللي من المدينة وافقوا طبعا على الاتّفاق

وروّحوا ...وسيّدنا محمّد بعث معاهم مصعب

مصعب ابن عمير ..

باه يعلّمهم كفاه يقراو القرآن صح ...ويعلّمهم الاسلام

مصعب ابن عمير رضي الله عنه سمّاوه بعدها "مقريء المدينة"

لأنّه هو اللي علّم أهل المدينة قراءة القرآن

والمسلمين كاااامل يحبّوه ...

كي عدّا العام ...جا وقت الحجّ ..وكلّ النّاس راحت تحجّ

وكان مابينهم المسلمين الطيّبين من أهل المدينة

علابالكم قدّاه عاد عددهم ماما ؟

عادوا 73 مسلم ...

جايين يحجّوا ويشوفوا حبيبنا وسيّدنا محمّد

عليه الصلاة والسلام ...

وجاو وهوما مقرّرين قرار ...

وش هو؟

جاو مقرّرين أنهم مايخلّيوش سيّدنا محمّد في مكّة للكفّار ياذيوه ويقلّقوه

فاتّفقوا انّهم يتلاقاو في السّر في نفس المكان اللي اسمه العقبة

واللي تلاقاو فيه من قبل ...

كل الحجّاج كانوا راقدين في الخيمات ...
والمسلمين ناضوا بالشويييية

وراحوا عند العقبة باه يلاقيو سيّدنا محمّد ...

قابلهم سيّدنا محمّد وكان معاه عمّه العبّاس

عمّه العبّاس كان هذاك الوقت مازال ما أسلمش ..

لكن كان يحبّ سيّدنا محمّد ويدافع عليه ضدّ الكفّار الاشرار

لكنّه من بعد راح يسمع سيّدنا محمّد ويعود مسلم طيّب

قلنا المسلمين راحوا للعقبة

وقابلوا سيّدنا محمّد وعمّه العبّاس

عمّ سيّدنا محمّد العبّاس هو أول واحد تكلّم وقاللهم

علابالي بلّي تحبّوا سيّدنا محمّد وباغيينه يروح معاكم المدينة

بصّح بغيتكم تعرفوا بلّي انا كنت نحميه من الاشرار

واذا ماكنتوش قادرين تدافعوا عليه كما أقرب النّاس ليكم

خلاص ...خلّيوه في مكّة خير...وماكان علاه يروح معاكم

وقف واحد من مسلمين المدينة وقال ...

راح ندافعوا عليه بكلّ قوّتنا وبأرواحنا ...

سيّدنا محمّد ناض وبدا يكلّمهم على الاسلام

واتّفق معاهم على اتّفاق ثاني:

انّهم يعبدوا ربّي سبحانه وحده

انّهم يعملوا بأوامر ربّي سبحانه ويطيعوه

انّهم يعونوا الفقراء المساكين ويهتمّوا بيهم

انّهم يعرّفوا النّاس الخير من الشّرّ ...باه النّاس يتعلّموا يديروا الخير

ويفهّموا النّاس الحوايج اللي مش ملاح باه يبعّدوا عليها

انهم يلبّيوا أي طلب يرضي ربّي سبحانه بلا ما يخافوا من حتّى واحد

انّهم يدافعوا على الدين ..الاسلام ويدافعوا على النبيّ اللي اختاره ربي سبحانه

فوقف واحد من المسلمين و قال

والله.... راح ندافعوا عليك بكلّ قوّتنا وراح ننفذوا اتّفاقنا ..

ووقف واحد آخر من المسلمين وقال:

يا مسلمين المدينة ...لازم تعرفوا بلّي لوكان ادّيروا هاذ الاتّفاق

وتدّيوا سيّدنا محمّد معاكم للمدينة ....وادّافعوا عليه
راح ينوضوا كل الاشرار نتاع الارض ويحاربوكم

فشوفوا رواحكم إذا ماكمش قادرينلها ولاّ راح تخافوا وماكمش راح تتحمّلوا

خلاص ...ماكان علاه...

لكن لو راح تكونوا شجعان وعندكم قوة وصبر وشجاعة

خلاص ...ادّيوه معاكم ...وتكونوا فايزين في الدّنيا والاخرة

فردّ المسلمين:

ولوكان ندافعوا على الرسول صلى الله عليه وسلّم

ومايهمّنا حتى واحد ..ولا نخافوا من حتّى حاجة ...

وشافوا عند سيّدنا محمّد وقالوله :وش راح يكون جزائنا ؟

فردّ عليهم صلى الله عليه وسلّم ....
الجنّة

فقالوله :...هات يدّك

وناضوا كااامل سلّموا عليه صلى الله عليه وسلّم

وهوما متفاهمين انّهم راح يديروا كل اللي اتّفقوا عليه

وسمّاو الاتّفاق هذا :

بيعة العقبة الثانية

لكن ...هل سيّدنا محمّد صلى الله عليه وسلّم راح يقعد في مكّة ؟

ولاّ راح يروح معاهم في المدينة ؟

وهل الكفّار الاشرار راح يخلّيوه ؟

راح نعرفوا إن شاء الله في الحلقة الجايّة

ان شاء الرحمن

اللهم صلّ وسّم وبارك على نبيّنا محمّد