[أم أماني أريج]

السلام عليكم حبيباتي اليوم تفكرت أكلة تقليدية عندي بزاف مادرتهاش و لي هي ......الحسوة .....و كاين لي يسميوها ......قطع و ارمي .......و هذي طريقة تحضيرها
أولا المرق :
المقادير :
حبة بصل متوسطة - زوج حبات طماطم طازجة -زوج سنينات ثوم - مغرفة أكل طماطم مصبرة-نصف مغرفة كبيرة ملح -نصف مغرفة كبيرة فلفل أحمر عكري -مغرفة صغيرة كروية .-3 مغارف كبار زيت - فلفلة صغيرة حارة .

طريقة التحضير :
اسكرفجي البصل مع الثوم و حطيهم في قدر و ضيفيلهم التوابل و الزيت و الفلفلة الحارة و حمسيهم على نار هادية و من بعد زيديلهم 1 لتر و نصف ماء و خليهم يطيبو .

ملاحظة :
تقدري تحطي في هذي الوصفة لحم كيما تقدري تستغناي عليه و هي في الأصل تجي بنينة بلا لحم عادي .
و في منتصف الطياب تاعها زيديلها الطماطم المسكرفجة و المصبرة .
ثانيا العجينة :
تجيبي حوالي مشيربة تاع شرية معمرة سميد متوسط و تضيفيلها نصف مغرفة أكل ملح و ماء و تعجينها مليح إما بيدك و إما بالعجانة .

و لازم تكون ماشي يابسة كامل كيما تاع الكسرة و ماتكونش جارية
و من بعد حليها بالحلال و قطعيها لقطع صغيرة و رشيها بالفرينة
و خرجيها في المشينة تاع البقلاوة كيما في الصورة

و رايحة تتحصلي على هذو القطع رشيهم بالفرينة في كل مرة و حطيهم في صحن كبير و عاودي العملية مع بقية العجين .
و كي تكملي غربلي القطع في غربال باش تتخلصي من الفرينة الزائدة و حطيها مع المرق تكمل طيابها .
و رايحة تتحصلي على هذا الحساء

شهية طيبة