السلام عليكم ورحمة الله وبركاته
الحلقة 13:
كان يا ماكان...
و ما يحلاش كلام غير بذكر النبي ....
و حبّوباتي يقولوا دايما..... 
عليه الصلاة و السلام ...
شكون يقولّي ماما ؟
سيدنا محمد لما آذوه الأشرار في الطائف وش دار ؟؟
دعا ربّي سبحانه
مليح...
قال لربّي سبحانه ... يا ربي مهما آذوني ..المهمّ يا ربي ما تكونش غضبان عليا و تكون راضي عليّ..
ربّي سبحانه ما خلاّش سيدنا محمد ...
وطمّن قلبه ... أنّه راضي عليه و يحبّه
و راح يخلّيه يشوف حوايج واحد لا شافهم باه ي يعود ثابت و قويّ
و يعرف مليح بلّي ربّي سبحانه اختاره وميّزه
و ماييأسش خلااااص مهما آذوه أو قلّقوه أو حاربوه ....
و يبقي دايما متأكّد بلّي ربّي سبحانه معاه وراح ينصره
وش راح يصرا ماما؟
.... راح يدّيه في رحلة ... الإسراء و المعراج ...
اسمها القدس...
وفي الطريق...
سيدنا محمد شاف الناس اللي كانت مسافرة جايّة لمكة
و راكبين الجمال.... وماشيين بالشوية
و قدّامهم جمل لونه قريب من الأسود
و على راسه شرائط سوداء وملونة
و شاف ثاني جمل واحد آخر تودّرلهم و قاعدين يحوّسوا عليه ...
قالهم على بلاصته....
هوما ما شافوش سيدنا محمد ...بصّح سمعوا صوته
ومبعد سيدنا محمد زاد لقا ناس راقدين ...
وقدّامهم ماء في الاناء مغطّي ...
فسيدنا محمد وقف و شرب من هذاك الما ورجع غطّاه
وكمّل طريقه حتّى وصلوا للقدس
ووقفوا عند المسجد الأقصي ............
يااااااإلهي ....
المسجد الأقصي هذا ماما المسلمين كامل يحبّوه بزّااااف
ضرك آأمي الاسرائليين حاربونا زمان وادّاوه بالسّيف علينا...
وكما ادّات فرنسا بكري بلادنا ورجّعناها ...راح نرجعوا نحاربوهم إن شاء الله ونرجّعوه لينا لأنّه نتاعنا احنا المسلمين مش نتاعهم
سيدنا محمد نزل من البراق ...
وربطه عند صخرة ... اسمها صخرة البراق 
و دخل بعدها مع جبريل عليه السلام المسجد
مسجد الاقصى
....وش لقا أمّي ؟؟؟
لقا الأنبياء اللي ربّي سبحانه اختارهم ...فصَلّى بيهم سيّدنا محمّد
و كي خلّصوا الصّلاة ...
حطّ جبريل عليه السلام قدّام سيدنا محمد 3 كيسان
وحدة فيها حليب ... ووحدة فيها خمر مش مليح... ووحدة فيها الماء
سيدنا محمد فهم قصد جبريل عليه السلام ....
عرف بلّي لازم يختار الصح
مد يدّه وهزّ كاس الحليب ...
سيدنا جبريل قالّه بلّي خيّر الصّح والخمر حرام على أمة محمّد...
هكّا ماما المسلمين لازم يتعلموا يختاروا في حياتهم اللي ينفعهم
ويقوّيهم مش اللي يضرّهم وماينفعهمش ...
ومبعد خرج سيدنا محمد و جبريل
سيدنا محمد عرف بلّي راح يروح في رحلة المعراج .... 
يعني ربّي سبحانه راح يطلّعهم
من المسجد الاقصى إلى السّماء ...وهي رحلة المعراج
ربّي سبحانه خلق سبع سماوات
وكل النجوم والكواكب والشمس في السماء نتاع الدنيا
و سيدنا محمد صلى الله عليه قالنا بليّ مهما تخيّلنا...
ماناش راح نعرفوا نتخيّلوا وش فيها
لأنها أجممممل من كل وش تخيّلنا ...
وأنّه أي حاجة نتمنّاوها في الجنّة تجينا
ويجينا خير منها ثاني
(لهم مايشاؤون فيها ولدينا مزيد)
واجمل من كللل الصور اللي شفنا ...
ياربي ارزقنا الجنّة ...
ومن بعد حبّوباتي
خرجوا من الجنّة
و شافوا ملاك مايتبسّمش خلااااص ...
سيدنا محمد عرف بلّي هذا ... اسمه مالك ... ملاك النار
و شاف النّار.. 
(ياربي باعد وجوهنا واجسامنا على النار في الدنيا والاخرة )
.....
وشاف الاشراريتعذّبوا فيها
الاشرار اللي كانوا يعذّبوا بكري في النّاس المومنين الطيبين
ويقتلوهم ويقتلوا أولادهم...
ومايعبدوش ربي سبحانه...ويديروا الشرّ والمناكر ويظلموا ...
(اللهم قنا عذاب النّار )
ومبعد خلاص وصلوا لمكان اسمه سدرة المنتهى
مكان يشبه للشجرة .... بصّح أوراقها كبييييرة بزاف بزاف .....
و ثمّة عند سدرة المنتهى ....
سيدنا محمد سجد لربّي سبحانه لأنّه اختاره
أنّه يكون الأول اللي يوصل لهاذ البلايص
و شكر ربّي سبحانه و حمده
(وهكذا ماما حتى احنا كي تصرالنا حاجة مليحة ..نهبطو نسجدوا شكرا لله
ولأننا في كلش في حياتنا لازم نتبّعوا سيّدنا محمّد في وش علّمنا )
فربّي سبحانه قال لسيدنا محمد يبلّغ المسلمين يصلّيوا 50 صلاة
(ممكن يسقسيك ...إذا سيدنا محمد شاف ربي سبحانه؟؟ ... لالا سيدنا محمد ما شافش ربّي سبحانه بعينيه
ربّي سبحانه قال ... لا تدركه الأبصار وهو يدرك الأبصار وهو اللطيف الخبير)
و مبعد سيدنا محمد رجع ...فشافه سيدنا موسى ... سقساه
قالّوا بواش أمركم ربّي سبحانه؟
قالّوا سيدنا محمد : 50 صلاة
مّالا سيدنا موسي قالّه : ارجع ... و اسأل ربّي سبحانه ... باه ينقّصلكم من الصّلوات ..الأمّة نتاعك (يعني النّاس اللي راح يتبعوك)
مايقدروش على 50 صلاة في اليوم
فرجع سيدنا محمد و طلب من ربّي سبحانه ينقّص فيها
فربّي سبحانه نقّص منها 5 صلوات ...ولاّت 45 صلاة
فرجع سيدنا محمد لسيدنا موسى ...
فسيدنا موسي قاله يزيد يرجع لربّي سبحانه باه يزيد ينقّصلو منها....
زاد رجع لربّي سبحانه و ربّي سبحانه برحمته زاد نقّص فيها
حتّى كي ربّي سبحانه خلاّها 5 صلوات ... وبقاو هكذا...
سيدنا موسى قال لسيدنا محمد ...زيد ارجع لربّي سبحانه باه يزيد ينقّصلكم فيها
لكن سيّدنا محمد قالوا بلّي ما يقدرش يزيد يطلب من ربّي سبحانه يزيد ينقّصله اكثر من هكذا ...
لأن سيدنا محمد استحى (يعني حشم) من ربّي سبحانه
صلى الله عليه وسلّم
لكن سيّدنا محمّد قال لنا أنّه اللي يصلّي 5 صلوات قدقد ...
ربّي سبحانه برحمته يحسبهملو بأجر 50 صلاة
لأنّه سبحانه رحيم بينا ...باه ان شاء الله يرضى علينا ..
ياربي ندخلوا الجنّة
وبعد هاذا كااامل..رجع سيّدنا محمّد لمكّة ...
وكان مازال مظلّم الحال ..مازال ماطلعش النّهار ....
بعدما سيّدنا محمّد صلى الله عليه وسلّم رجع لداره
صلّى الصّبح ...خرج باه يحكي لأهل مكّة على اللي صراله
طبعا بقاو حايرين ...
الكفّار قالوله ...كيفاه؟ احنا باه نروحو لبلاصة
نركبوا الجمل ونبقاو مسافرين شهر رايحين وشهر راجعين...
وانت تروح وترجع في ليلة؟؟؟
هاتلنا أسيدي دليل؟؟؟
فسيّدنا محمّد قالّهم ...
في الطريق شفت النّاس اللي مسافرين لمكّة وراكبين الجمال
راهم في الطريق ...وكاين جمل تودّرلهم ...وأنا قلتلهم وين راهو...
وراهم قريب يدخلوا لمكّة
ومعاهم جمل لونه قريب للأسود وعلى راسه شرايط سوداء ملوّنة
وثاني كانوا ناس اخرين ...كانوا راقدين ...
كنت عطشان وتوقفت عندهم شربت من الماء اللي بحذاهم ورجعت غطّيته
....
فراحوا أهل مكّة يجريو يستنّاو في النّاس اللي مسافرين على الجمال
راح يدخلوا لمكّة..باه يسقسيوهم..
ومع وصلوا المسافرين ...اهل مكّة دهشوا ...
لقاو كلام سيّدنا رسول الله
صلى الله عليه وسلّم كامل صحيح
بالفعل كاين جمل لونه قريب من الاسود يمشي قدّامهم وفوق راسه شرائط ملوّنة
فسقساوهم قالولهم انتوما تودّرلكم جمل؟
فالمسافرين قالولهم انعم ايه...
وسمعنا صوت يقوللنا على بلاصته ولقيناه بصّح ماعرفناش شكون..
ولمّا جاو ناس اخرين مسافرين ثاني سقساوهم أهل مكّة
فقالولهم صحّ..كنّا راقدين وكي نضنا لقينا الماء اللي كان بحذانا خلص وهو متغطّي....
رجعوا الكفّار لسيّدنا محمّد ومازالوا يحاجّو فيه بعد هذا كامل..
قالوله احنا كاين منّا ناس اللي راحت من قبل للمسجد الاقصى
قوللنا كفاه مداير باه نعرفو لكان صحّ رحت ولاّ لالا ...
فسيّدنا محمّد بقا يوصفلهم في شكله بالتفصيل
وربي سبحانه حطله صورة المسجد قدّامه
باه يعرف يردّ على كل أسئلتهم ...
وبقا صلى الله عليه وسلّم يوصف في بيبانه
وشكلهم وكل بلاصة فيه ....
ورجع سيّدنا محمّد صلى الله عليه وسلّم لداره
وجاه جبريل عليه السّلام...
وعلّمه الوضوء والصّلوات الخمسة...
والكفّار رجعوا ديارهم وهوما رايحين يهبلوا...
منين عرف سيّدنا محمّد هاذ الشي كامل ؟؟؟؟
وحايرين ...
علابالكم ماما علاش حايرين؟
لأنّ الكفّار ماحبّوش يامنوا
بلّي ربّي سبحانه قااادر يدير كل شي وأي شي
وأنّه ربي سبحانه اللي خلقهم وخلق عقولهم...
مهما فكّروا بيها ...تفكيرهم ماكانش قدّام قدرة ربي سبحانه
مايعرفوش بلّي مع يقول للشيء كن ...راح يكون
وضركا بعد ما شافوا الكفّار دلائل من عند ربي سبحانه
في رحلتي الاسراء والمعراج...وش تتوقّعوا
راح يحبّسو أذاهم للرسول صلى الله عليه وسلّم والمومنين
....
نشوفو مع بعض في الحلقة الجايّة ان شاء الرحمن
اللهم صلّ وسلّم على سيدنا ورسولنا وحبيبنا محمّد