الحلقة 10
كان ياما كان...
و ما يحلي الكلام غير بذكر النبي ...
عليه الصلاة و السلااااااااام .
المسلمين كما قلنا ماما خلاّو مكّة ...البلد الجميييلة اللي فيها الكعبة
رغم انهم كانوا يحبّوها بزّاااف ...لكن خلاّوها وراحوا سافروا ...
لأنه كما قلنا الكفار الاشرار ماخلوهمش في حالهم ...وعذّبوهم وآذوهم
وعاش المسلمين في الحبشة عند الملك الطيب اللي مايظلمش
وش كان اسمه فكّروني؟ ...النجاشي
لكن الكفار ماحملوش ...وراحوا بعثوا اثنين منهم ...ومعاهم هدايا غااالية للملك
هذا كامل باه يحاوز من عنده المسلمين ...
ادّاولوا كما قلنا الهدايا وقالولو :
راهو كاين ناس اشرار جاو عندك الحبشة ...حاوزهم يرجعوا معانا
الملك كان طيّب وعادل ...ردّ عليهم وقالهم:
لالا انا مانيش راح نحاوز حتى واحد ولا راح يرجعوا معاكم
لأنهم دخلوا بلادي خايفين ...وانا لازم نحميهم ...
وضرك نجيبهم هنا ونسقسيهم على كل حاجة
فالملك جاب المسلمين وسقساهم:
علاه جيتوا هنا عندي وخلّيتو دياركم واهلكم في مكة ؟
مّالا قام جعفر ابن ابي طالب ...اللي هو يكون ابن عمّ الرسول صلى الله عليه وسلّم وقال :
يا ملك...احنا في مكّة كنّا عايشين مع اهلنا نعبدوا الاصنام
وماكنّاش عارفين الصّح من الغالط ...
كنّا نظلموا بعضانا ونتقابضوا ...واحد لا كان يهتمّ بأهله ...
وكنا ناذيوا الجار ...والقوي فينا يضرب الضعيف
حتى كي جا سيّدنا محمّد ..الصّادق الامين
وبعثه لينا ربي سبحانه باه يبصّرنا للخير ويعلّمنا كلام ربّي
علّمنا نبعدوا على عبادة الاصنام اللي ماتنفعناش...ونعبدو ربي سبحانه وحده
علّمنا نقولوا الصدق ...علّمنا نحافظوا على حوايج الناس والامانة
علّمنا نحبّو اقربائنا ونسقسو عليهم
علّمنا ماناذوش الضعيف ولا اليتيم ...ومانجرحوش مشاعرهم ...ونحبوهم ونعاونوهم
لكن الكفار اللي مازالوا يعبدوا الاصنام
آذونا بزّاف وعذّبوا منّا بزاف ...باه يرجعونا نعبدوا الاصنام كما هوما
فجينا عندك للحبشة كي عرفنا بلّي انت ماشاء الله ملك عادل
وتحكم بالحق ماتظلمش
فالملك شاف عند جعفر ...وقال له: قولّي تراه كلام من اللي علّمهولكم محمّد
قال له جعفر نعم...وبدا يتلو عليه ايات من سورة مريم
والملك يسمع ...حتى بداو الدموع يسيلو من عينيه لمّا تأثر بكلام ربي سبحانه
ماتخافوش ..مستحيل نسلّمكم للكفار يديوكم
وراح تبقاو عايشين عندي في الحبشة في امان
ولا واحد راح يقدر يقيسكم ....
فرجعوا الكفّار لمكّة وهوما راح يطرطقوا من الغيظ
ونشوفوا ان شاء الله في الحلقة الجايّة وشمن خطط شريرة راح يزيدوا يديروا
ووش راح يكون رد سيّدنا حبيبنا محمّد والمسلمين؟
اللهم صل وسلّم وبارك على نبيّنا محمّد