[ابداع جزائرية]

السلام عليكم ورحمة الله وبركاته
وش احوالهم الامهات العزيزات
والابطال الصغاار ؟
نتمنى تكونو بخير
ونشكركم على الكلام الطيب والدعوات الجمييييلة
راح نحط الحلقة ان شاء الله الليلة
لأني غدوة غائبة
وممكن نتأخر الاثنين ان شاء الله
ماتنسونيش من دعائكم
ربي يبارك فيكم

الحلقة 8

كان يا ما كان و ما تحلا القعدة ..... غير ...... بذكر النبي .... عليه الصلاة و السلام ...
عليه الصلاة والسلااااااااام ......


سيدنا محمد و السيدة خديجة ....
بعد ما رجعوا من عند ورقة ابن نوفل اطمّنوا ...
و عرفوا بلّي النبي اللي ربّي سبحانه اختاره هو سيدنا محمد .

فالسيدة خديجة آمنت بسيدنا محمد ....وش معناه آأمّي؟
يعني قالت أنا راح نسمع كلام سيدنا محمد في كل حاجة راح يقولي عليها ...
لأنه هو النبي اللي راح يعلمني كلام ربي سبحانه


إذن... شكون أول وحدة آمنت بسيدنا محمد و سمعت كلامه ؟؟
السيدة خديجة .... ممتازيييييين


سيدنا محمد بعدها اطّمن و رجع الغار ..... فوق في الجبل ....
و قعد لثمّة يعبد ربي سبحانه ..... و يدعيه .....و مرت الأيام في غار حراء
و سيدنا محمد باقي يستنّى في جبريل "عليه السلام " يرجع .... ...


لكن جبريل "عليه السلام " مجاش ....
و سيدنا محمد باااقي يعبد ربي سبحانه ....و يدعيه
حتّى واحد اليوم ... خلّص سيّدنا محمّد وجاي نازل من الجبل باه يروّح لداره....


كي وصل لآخر الجبل .... سمع صوت يعيّطله...
شاف وراه ...شاف قدّامه ....ومبعد شاف في السما ....

فشاف الملاك جبريل عليه السلام...هذاك اللي جاه في الغار
فزاد خاف بزّاااف ... لأنه مازال ماتعوّدش أنّه يشوفه ...
و رجع لداره بالزّرب.. ...
كي رجع لداره كان خايف ويتّرعد ...
و السيدة خديجة زادت غطّاته ...
بصّح المرّة هاذي سيدنا محمد سمع صوت جبريل عليه السلام ...
و هو يقوله كلام ربي سبحانه .... القرآن ..
سمعه يقول:



" يا أيها المدثر ..... قم فأنذر ...."
المدّثّر يعني المتغطّي

معناه ... يا اللي راك متغطّي


يا محمد ...راك تتغطّى وخايف؟ ...متخافش... ونوض من فراشك
علّم الناس يعبدوا ربي سبحانه وحده...

باه يدخلوا الجنّة ...
و حذّر الناس اللي تعبد الأصنام من عذاب ربي سبحانه ....



فسيدنا محمد اطمّن وماعادش خايف
و تأكّد بلّي هو النبي اللي ربي سبحانه اختاره
و أنه جبريل هو الملاك اللي راح يبلّغه كلام ربّي سبحانه
باه يعلّم بيه الناس كاااامل

سيدنا محمد بدا يقول للناس .... بصّح في السر
يقولهم بلّي هو النبي ... و أنهم لازم يعبدوا ربّي سبحانه وحده...
وانهم لازم يديروا الخير واخلاقهم تعود طيّبة

كان يقول هكّا للنّاس في السّر... لأنّه الكفار ...أشرار
و لوكان يعرفوا راح ياذيوه و ياذيو كل المؤمنين الطيبين اللي تبّعوه

أول راجل آمن بسيدنا محمد ... يعني سمع كلامه و صدّقه ...
كان سيدنا أبو بكر الصديق ...
صاحب سيدنا محمد ...
و أبو بكر علاباله من بككككري خلااااص أنّه سيدنا محمد صادق أمين ...

و عمره ما قال غير الصدق ...
فآمن بيه هو الاول ...

وأول ولد صغير آمن بسيدنا محمد ... اسمه علي .... سيدنا علي
( راح نحكيو عليه ان شاء الله من بعد لأنّه ولاّ بطل كي كبر )
وكان عنده 10 سنين لما آمن بسيدنا محمد ..


و كل يوم كان يفوت ...الناس تزيد تعرف اكثر على سيدنا محمد ....
و يولّيو مؤمنين طيبين ... بصّح في السر
و كانوا حتى كي يبغيو يصلّيو يدّرقو ورا الجبل باه الكفّارالاشرار مايشوفوهمش

و كانوا يتجمعوا في السر في دار اسمها ....... دار ابن الأرقم ...

يقعدو المؤمنين الطيبين مع بعض و معاهم سيدنا محمد صلي الله عليه و سلم

يعلمهم كلام ربي سبحانه...يعلّمهم القرآن .... ...

وينعّتلهم بلّي ربّي سبحانه اللي خلقهم و خلق كل شيء في الدنيا ...
وأنهم لازم يعبدوه وحده...
و يعلمهم الأخلاق المليحة ...
الصدق و الأمانة و العطف على المساكين و كيفاه يديروا الخير

وبقى سيدنا محمد .....3 سنين ....
ثلاث سنين يدعو الناس في السّر ...
و يعلمهم في السر ....

حتّى نهار وين جاه جبريل " عليه السلام " وقاله ضركا لازم تعلنها

و تقول لكلّ الناس
كلّ الناس لازم تعرف ....

بصّح وش تبانلكم أمّي ؟ الكفار الأشرار ...كي يعرفو...وش راح يصرا؟

نشوفوها ان شاء الله في الحلقة اللي جايّة


اللهم صلّ وسلّم وبارك على نبيّنا وسيّدنا وحبيبنا محمّد