الحلقة 5:
كان يا ما كان ...
ومايحلا كلام ولا قعدة ...غير؟
بذكر النبي عليه الصلاة والسلام ...
وغير القفّوزين اللي يقولو ....عليه الصلاة والسلام ....
عليه الصلاة والسلام ....
ضركا سيّدنا محمّد مات جدّه اللي كان يربّيه ويحبّه
كان قدّاه في عمره ماما ؟
جيّيّد ...8 سنين
بصّح قبل مايموت قال لعمّه أبو طالب ينتهلاّ فيه
فعمّه ابو طالب ادّاه يعيش معاه ومع اولاده ...
عمّه ثاني عاد يحبّه اكثر من اولاده... وكان عنده عمّه خرفان بزّاااااااف
وكان يقول لولاده يدّوهم يرعاو في مكان فيه الحشيش بزّاف
سيّدنا محمّد كان يرعى الغنم حتى هو ويردّهم...
وكبر صلى الله عليه وسلّم مع ولاد عمّه وعاد عنده 12 سنة
وفي يوم من الايام عمّه قال: انا راح نسافر بعيييد
لواحد البلد اسمها الشّام ..
أبو طالب كان حابّ يسافر باه يتاجر
يعني يبيع ويشري حوايج باه يربح المال بزّاف ...
فسيّدنا محمّد قال له أنا باغي نسافر معاك
عمّه أبو طالب كان يحبّه بزاااف ومايقدرش يقول له لالا ...
فقال له خلاص ندّيك معايا ...لكن ماتبعّد علياّ مانبعّد عليك...
وفعلا ادّاه معاه ... 
ناس بزّاف كانوا يسافروا للشّام ...ويعرفوا الطريق...وكل مرّة يروحو يشريو ويبيعو سلعة من ثمّة
الطريق كانت طوييييييلة
فحبسوا في واحد البلاصة باه يرتاحو ومن بعد يكمّلوا ...
كان في هاذيك البلاصة واحد الراجل كبير اسمه
وكان كل مرة الناس يسافروا فيها للشام ويحبسو يرتاحو لثمّا
بحيرا الراهب مايهدرش معاهم ...في حاله مايهدر حتى مع واحد
لكن هاذ المرّة ..لمّا وصل سيّدنا محمّد ...
بقا يشوف معاهم يشوف ...يشوف
ومن بعد راح عندهم وحكم يد سيّدنا محمّد وقالهم:
الطفل هذا راح يكون سيّد الدّنيا كامل
هذا هو اللي راح يبعثه ربي سبحانه باه يعلّم النّاس
فكل اللي كانوا حاضرين قعدوا يشوفوا حايرين..
قالهم انا نعرف اوصاف النبيّ اللي ربي سبحانه راح يختاره
ونعرف بلّي عنده علامة في كتفه
(العلامة هاذي ماما يديرها ربي سبحانه في كل نبي ...
اسمها خاتم النّبوّة)
ومنبعد بحيرا الراهب سأل أبو طالب ...
قال له وش تكون نتا لهاذ الطفل ؟
قال له أبو طالب :أنا باباه..(لأنه كان يربيه في بلاصة باباه)
قال له بحيرا:لالا ...انت ماكش باباه ...
النبيّ اللي راح يختاره ربي سبحانه يكون يتيم
فأبو طالب قال له فعلا ..أنا عمّه ..لكن نربّيه ونخاف عليه في بلاصة باباه
وباباه مات وهو صلى الله عليه وسلّم في بطن أمّه
قال له بحيرا :هاذي هي الصفات اللي كاينة في النبيّ اللي أخبر ربّي سبحانه
بيها النّاس بكري أنّه راح يبعثه...
وفي الأخير طلب بحيرا من أبو طالب حاجة ...
قال له انتهلّا فيه ...وعسّه ..لأنّه لو شافوه اليهود ...
راح يعرفو بلّي هو النبيّ اللي ربي سبحانه اختاره
وراح ياذوه...لأنهم كانوا دايما ياذيو الانبياء 
رجّعه ضرك بعد لمكّة وماتخلّي حتى واحد يشوفه
أبو طالب سمع كلامه ...ورجعوا لمكّة ....
وفي الحلقة الجايّة ان شاء الرّحمن ..نكمّلوا مع بعضانا ...
أجمممممل حكاية
اللهم صلّ وسلّ وبارك على رسولنا وسيّدنا وحبيبنا محمّد