قلت هذه القصيدة لما كنت مغتربا في إحدى الدول وكان يقطن معي زميل لي اسمه عبد السلام فتركني وذهب وأودعني اللهب وبعد مدة أرسل لي رسالة يخبرني أنه قد تزوج فجاشت عاطفتي وانهملت دموعي كديمة وطفاء واعتلج في نفسي الأنس والوحشة واليأس والتأسي والشوق الذي ألهب ضلوعي وأسال دموعي فأمسكت اليراع والقرطاس فتمخضت هذه القصيدة بعد إعسار.وسميتها قلبي اتوحش البهجة:
عبد السلام مبروك اعليك== من شنقيط عيسى ايحييك
معيشتنا دايمن أنتيك== بالكسكس أبالباستيك
حيتك من مرسة لكبيد== ابتحية من قلب اعميد
حييني من باب اجديد== باب الواد مدام لفريك
هذي مدة اطناش أن عام== ما فارق عقلي اتخمام
ألهبني الشوق ألهيام==عل البيضا واش ايسليك
قلبي اتوحش البهجة= ونار داخل متوهجة
قلها عيسى راه يرجى== من خالق يرجع ليك
قلها عيسى ليك اشتاق==يبكي من لوعة لفراق
يجري دمع مهراق==يا عيني الله يهديك
لما شافني العذول==ثوبي من دمعي مبلول
لامني وانشأ ايقول==كافيك يا الغري كافيك
جاوبت خليني نبكي==واعلى ليام الحلوة نحكي
اسكي ابذيك ليام اسكي==في بليدة أبوفاريك
بوروبة أوكاليتوس==أغرامها داخلي مغروس
بوزريعة وابن مسوس== شوفاليي ماني ناسيك
لقلاسيار زد باش جراح== الحراش اتداوي لجراح
بزيطة عروسة لفراح== بولوغين زينة اتلهيك
سلم على ابن عكنون== لا تنس مرجان الكون
بالي بيها مشطون== يا حيدرة راني نعنيك
لا تنس يا عبد السلام== اتبلغ للبلكور اسلام
لعقيبة امع بيلام== صالونبي رايعة تسبيك
حلق بي يا براقي== واخترق ذيك الافاق
طوفني على براقي == رفرف وعلي ابجنحيك
عرج اعلى بن بولعيد== القصبة أبور اسعيد
وصولك لمقام اشهيد== استعد واحي بيديك
ذيك نخبة ملخيار== انثر الياسمين والأزهار
خرجوا طغمة لاستعمار== استخبر ليام تنبيك
سلم على غليزان= قسنطينة مع تلمسان
تايهة بقدها الفتان== حسن جمالها يكويك
هبلتني جيجل أسما== كيفت جنة طايحة مسما
بجمالها تعلى وتسمى== صافية كعين الديك
لا تنس تيزي وزو== قلبي من شوفتها يهتز
كم منظر فيها انعزو==يحرك شبحك يحييك
عندي ليك أوصاية== تسلم لي على بجاية
هي في الوجود آية== عن الله ما عند اشريك
توحشتك كثير في الغربة==يازينة لحيا القبة
كم اجليت من كربة== صدري ينشرح بيك
أرض الصحراء محلاها==حسن وجمالها بهاها
أرض الأبطال ما ننساها==باتنة مع ابن ابريك
يا الرايح وين امسافر== ماشي بنفسك امغامر
في أرض ابعيدة حاير==ارجع وفرح والديك
خلي عنك الغربة خلي==واسمع اكلام دحمان لمحلي
يا الرايح تروح تعيا واتولي== اشحال ندمو لعباد قبليك
سلم على اولاد ابلادي== الحاضر منهم والبادي
شوفتهم تقلع تنكادي==تفرح قلبك واتزهيك
يا ربي يرب الارباب== احفظ بلادي ملأرهاب
وفرها كل الأسباب== اسباب الخير يا المليك
باسماك الحسنى يا العلام== انشر فرجاءها السلام
السعادة والابتسام== يا بلادي ربي يحميك.