السفنج أو لخفاف lyzzabel الطريقة سهلة و ماتعبش خلااااص ندير فرينة ملح حسب كمية الفرينة انا درت تقريبا رطل قرصة سكر نصف كيس خميرة الحلويات خميرة الخبز و نلم بالما دافئ تدريجيا و العجينة تجي شوية جارية مانعجنهاش نغطيها بطرف من البلاستيك و طورشون مالفوق و نخليها تخمر مليييح نخبطها بيدي بحيث ندخل صباعي تحت العجينة و نرفدها و نخبطها و نعاود هاك عدة مرات باش ندخللها الهوا و نعاود نعطيها و نخليها تخمر نكرر نفس العملية مرتين او ثلاثة انا كررتها مرتين راح العجينة تولي ايلاستيك و نخليها تخمر للمرة الأخيرة في مقلة نحط زيت ما يكونش غزير باش مين نحط الحبة تاع السفنج ما تتغطاش بيه نوجد حدايا إناء ولا بول تاع شوربة فيه شوية ما نشمخ يديا غير شوية باش العجينة ما تلصقليش فيهم بزاف نرفد بيدي قيس حبة متوسطة ونحلها مالوسط قبل ما نديرها فالزيت يعني تجي مثقوبة فالوسط هههه باش تفهمو ونقليها مين نشوفها دارت فقاعات من فوق نفرغ عليها الزيت بالملعقة راح تزيد تنتفخ و تجي فارغة من داخل و مين نشوفها حمارت من تحت نقلبها على الجهة لخرى و ما ننساش نحمرها ما لجوانب طبعااااا