السلام عليكم.بعد القصيده الاولى للشاعر الرائع عبد القادر بن النوي و التي كان يرثي فيها ابنته نجاة رحمة الله عليها ها هي القصيده الثانيه في نفس الموضوع حيث يبدع عبد القادر كعادته في رثاء نجاة اتمنا ان اكون موفق فيما اخترت لكم
كنت انقول اشعارفارس مدرب////و مقامي معروف عند القوالا
كنت انقول اشعار ونصور لعجب////و فقدت التعبير في ذا المقالا
موتك يا ريحانتي هول يشيب ////فجعتهاصهداو ضربه خلخالا
لسع يا نجاة بدقايق نحسب ////غدوا بنتي جايه قد اغزالا
خبرك جاني فالترع قبل المغرب////و انا و اهلي في طريق الجوالا
اتلفت القيت امك تستغرب ////و انا تايه بين حالات او حالا
قالتلي وشبيك جاوبني وزرب////انطق باللي كان وش ذا التخبالا
قلي كلش نحملو مهما يصعب////غير على نجاة يا خويا لا لا
عدت نفتوش ما بقالي ما نحجب////قلتلها نجاة ما بقات اسوالا
واتلفت الخاوتك مشعال ثقب ////مسكتني نيران تقدي هلهالا
حين اوصلنا بسكره عدت اروقب////ننظر من لبعاد نظره مذلالا
ما عنديش من الصبرباه انكهب////نصرش لرفاقتي و الطلالا
قالولي مالقاو لا كان المضرب////اصبر يا مفجوع صبر الرجالا
ما بناش الموت منها لا مهرب////لكن موتك جات فجعه هذالا
كلش ناطق بيك بجواب مرتب////ذكرياتك فيه جمله و فصالا
نتفكرك في كل حاضر و مغيب////نتفكرك فالصاعبه و المسهالا
كيفاش انت في اصمد و امطار تصب////وانا نرقد في فراشي بدلالا
نتفكرك وقت الربيع اذا عشب ////وفتح وردو في اعطايل خبالا
طاف على لكوان بازهارو زرب////فرش بالنوار لارض تتلالا
ويفكرني صيف ورعودو تضرب////و مواسم و اعيادها و الحفالا
ويفكرني فيك ريح هخريف اهب////و البر او قيطانتو و الرحالا
ويفكرني فصل الشتا جو مقلب////وارياحو طول اليالي صوالا
ثلجو ذوبناه وابنينا لقبب ////و الصوارا حاضره و السجالا
كل اجبل يلقانا بعد ويقرب////كل اشبر في ساحتو لينا دالا
و سهول و ويدان ومراسم وغيب////كلي هذا الكون لينا من والا
غبتي كلي ما مشيتي في مضرب////ما جوبتي في شراشف تتعالا
كلي ما كنتي معايا في موكب ////ما سقسات طيور عنك لوعالا
خليتيها واحشه قفرا ترعب ////لا بنه في شوف لا في تجوالا
العبنا و الموت حرشه ما تلعب////خداعه بامان تمشي ختالا
ما ينفع لا راي لا طلبه لا طب////لا نعريه لا كنوز الموالا
كاين سكته خير من عالم يخطب////اوكاين ثقله خير من الف اعجالا
اوكاين جريه ما ترد ولا تقلب////اوكاين جهله خير من بعض اعقالا
الدنيا سباخ و سراب يسرب////دار غرور و دار غدره وانذالا
تتنكر لاهل الخصايل و الادب////ويعيشو فيها ضبوعه و اغوالا
اتصد على الصيد وتود الثعلب////تكرم بخالا و تحرم فضالا
تحقد علي صيلهم من سلك ذهب////و تطاوع برهوش متروك اكعالا
لا عهده لا صيل فيها لامذهب////لا رحمه لا مسايسه لا تبجالا
خليها للي بغى منها ينهب ////خلي هذي السافله للسفالا
يا نجاة الناجيه خلقه و انسب////مثلك يختارو الناس الصيالا
شفت الموت الشور مثلك تتصبب////تخطف من لخيار وتعيف ارذالا
روحي بنتي صافيه من كل ذنب////غدوا نتلقاو عندو تعالا
فتحت ليك اقصورها و الخاطر هب////و الجنه مفتاحها بالبسمالا