على مائدة الإفطار !
هذا الركن يستهدف المرأة الجزائرية في المطبخ، وحتّى الصغيرات يلزم يشوفوه، والذكور تاني (كون الإنسان ذكر لا يمنعه من أن يتعلّم الطبخ، ما تدريش وكتاه يحتاج هاد المعرفة)، وبهذا الركن راح نحكيو على المائدة الرمضانية وليكن في علمكم أنّي لا أتقصّد أن "أسخّفكم" ههههه (باه واحد ما يحصل فيا لا سخف ولا كاش ما صرالو -بعيد الشر-) حتّى أبرئ ذمتي !
إذن، الطاولة الرمضانية تختلف كثيرا عن سابقاتها من طاولة العيد والعرس وحتى تلك العادية (تاع كلّ يوم يعني)... فهي تتميّز بأكلات لا تُعدّ في سائر الأيام، يغلب عليها الطابع "الحلو"، فجسم المسلم الصائم دوما في حاجة إلى السكريات حتى يستعيدَ نشاطه بعد أكثر من نصف يوم من التوقف عن الأكل والشرب.
وبما أنني أعيش في قسنطينة "مدينة الجسور المعلقة"، قرّرتُ أن أتحدّثَ عن طاولتنا ! نحنُ في قسنطينة. واحدة ماتجي وتقوللّي لالا الطاولة القسنطينية ما تكونش هكا، أنا درت واش نعرف، ولو هي عندها أفكار فمرحبا بإثراء الموضوع وليسَ النقاش –فضلا لا أمرا-.
تختص الطاولة الرمضانية "القسنطينية" بوجود طبق الجاري في كلّ أيام رمضان، والجاري هو "شربة الفريك" يكون باللحم (مقطع أو كريات أو الاثنين معا) بالإضافة إلى الكرافس، الدبشة والمعدنوس وأيضا الفلفل الحار، وهناك من تُضيفُ النعناع الذي يضفي ذوقا خاصّا على الطبق.
وهذه صورة للطبق (ما تدعيوش عليا الله يرضا عليكم)
أممممم وكاين طبق تاني، وهو "البوراكْ"... تتختلف طريقة تحضيره من امرأة لأخرى، ولكن يجتمعو في الحشوة اللي فيها بشكل رئيسي "البطاطا المهروسة" والبصل، برك كاينة اللي تحط في الحشوة كذلك "لحم مرحي مقلي" أو "التونة" أو "الجبن الذائب" وغيرها من الحشوات المختلفة كما يمكن إضافة زيتون ومعدنوس، وحتى إن في الأحجام والاشكال اختلاف، كاينة بوراكة صغيرة (ماتشبّعش، وتحتاج منك أنك تاكل 3 على الأقل باه تشبع) ويستعمل فيها غالبة نصف ورقة "خطفة" وتكون في شكل السيجار. وكاينة الكبيرة، اللي غالبا يضيفولها بيضة بداخلها (هادي يا ربي تاكل وحدة وتخلّصها) وتستعمل فيها ورقة كاملة وتكون مربعة، كما كاينة المتوسطة اللي بيناتهم، تكون بشكل المستطيل. وكاين شكل آخر يكون مثلث (جرّبتو مرة برك، وماجيت نشكلو متّ بالعذاب هههه).
نحطّلكم صورة للبوراك ولا هاد المرّة رايحين توكّلو ربي علي ؟ أوو مانتفااهموووش عليها !
شوفو ! مراعاة لمشاعركم فقط رايحة نسكت عن الكلام، ورايحة نختم بأكلة تتميّز بيها قسنطينة (حسب ماقيل لي) على الولايات الأخرى، ألا وهي : طاجين العَيْن.
ماش رايحة نوصفهولكم هاد المرّة، بل رايحة نشرحلكم طريقة تحضيره (كما تُحضّره الوالدة العزيزة)، منها نحفظو أنا، ومنها تتعلّموه أنتوما.
إذن سيدتي الكريمة، اليوم رايحين نطبخو "طاجين العين" أو طاجين الحلو كما يقول البعض، فمن فضلك سيدتي حضّري أمامك المكونات التالي ذكرها، باه نباشرو بالعمل فور ذلك سيدتي.
المكونات: (اتخيلو رواحيكم تتفرجو في حصة طبخ، والمكونات ظهرت مكتوبة على الشاشة)
- ملح
- فلفل لكحل
- قرفة
- سكر
- لحم غنمي
- عين بقرة مجففة، مشيمشة (مشماش مجفف) وزبيب (عنب مجفف)
- لوز مسموط (مقشّر)
- بصل
- زيت
دركا سيدتي نبدااو بالعمل، وقبل كل شيء توكلي على ربي واغسلي يديك (ههههههه) وانوي هاد الطبخة لوجه الله، باه تفطّري بيها عائلتكِ الصائمة حتى تأخذي الأجر (حتى أنا نويت هاد الموضوع لوجه الله، باه ماتديش وحدك الأجر ههههه)
إذن سيدتي ماعليك سوى تقطيع اللحم إلى مربعات والبصل وتحطيهم في "البرمة" (القدر) مع الزيت والملح وفلفل لكحل وتقلّيهم مليييح حتى تذبل البصل واللحم كي يطييب مبعد يطييب ملييح !
كي تقلّييهم مليييح، صبّي لتر من الماء وخلي اللحم يطيب، وكي يطييب اللحم قومي بتصفية البصل من المرقة باه مبعد الاُكلة ماتجيش "معسّلة ومبصّلة". ثم حطي الفواكه المجففة (العين، المشيمشة والزبيب) بالقدر اللي تحبي (كمشة وخلاص) وحطي معاهم شوية تاع القرفة، وخليهم يطييبو.
زيدي حطّي السكر بالكمية اللي تحبيها وخلّيه يكمّل الطياب حتّى يعقد (بالصح شوية برك ماش يعود لاصق مايتهزّش بالمغرفة).
في الأخير حطّي اللوز (للتزيين فقط). وشهية طيّبة سيدتي !
الآن وصلنا لنهاية ركن الطاولة الرمضانية، نتمنى خرجتو منّو بأقل الأضرار، ومن فضلكم واحد ما يدعي عليا ! هههههههه
(ملاحظة: الصور من عمّي قوقل)