تفكرت أول قاطو درتو شفت وصفة السيدة أرزقي في التلفاز وكنا في الصيف نظت في القايلة خليت ماما راقدة ودرتو عبارة عن تفاح مقشر ومغلي ومرحي ومن بعد تخلطيلو جلجلانية حب وتحاولي تشكلي منو حبات قاطو مايطيبش صراحة كارثة اللي يذوقو يبصقو من فمو مافهمتش لليوم السيدة أرزقي كان منها بالصح ولا دارت كاميرا مخفية ومن وراها ماشي بزاف تعرفي الحرارة نتاع الفحالة زدت قلت الماما ضرك نديرلك الياوورت درتلك برمة كبيرة حليب وحطيت فيها لحظة وسكر وغطيتها وكل شوية نروح نطل عليه ماحبش يولي ياوورت قلتلها الحليب ماشي مليح ومرة ثاني درت تارت اسمها " تارت لينز "شفتها في MBC على بالك أنا من بكري عندي ثقافة مطبخية نحب الطبخ المودرن Iهي جي على شكل فطيرة هي عجين تشبه للبريزي ودرتها شوية خشينة وتحطي فيها معجون وتزيدي تغطي بالعجين واش نقلك ماطابتش بقات عجين يعععععع اللي يذوق يبصقها من فمو طاحلي المورال بايتة حية مارقدتش مع طلوع النهار جاتني فكرة نطت على 4 نتاع الصباح رابيتها في لا راب وزدتلها معجون ودرتها صبيعات وطيبتها في الفرن ودرتها في المعجون ورمدتها في الالنواة كوكو جات بنينة وحامضة وشوية معلكة طبعا هذو كامل في عطلة الصيف وفي عمري حوالي 15 سنة الكوارث اللي نديرهم ضرك أكبر بكثير ماحبيتش نبدالكم بالثقيل خفتكم تتخلعو راني جاية غير بالشوية