تطبيق فاشل للخبز المطلوع و المحاجب

[nadjwa mhamed]

مساء الخير الى الأخوات راهو ولا عندي شوك كبير من عجن الخبز والمحاجب نتبع خطوات مختلفة نسمع قع النصائح ونطبقها بسح العجينة دايما تجيني الاستيك وما تتحلش .أرجو من الأخوات مساعدتي وتقديم بعض النصائح

[madoucha]

rabi ywafkek be la3kal bark w teb3i nasa ih ta3 akhawat

[sim1]

ma3lich jrbi lkhatra ljaya

[الأمنيات]

شوفي اختي كي تكون العجينة مطاطية يعني خصها ترتاح مليح حتى تساعدك في تشكيلها

[منال100]

كما قالت الامنيات مدام العجينة ماتحبش تتمدد معناها خصها ترتاح بعد ما تكوريها غطيها بالبلاستيك وخليها ترتاح على الاقل نصف ساعة ومن بعد جيك ساهلة وتلقايها تجري تحت يديك لا تيأسي كري العملية حتى تنجحي وتصيري معلمة

[ladymillion]

أختي عجينتك لازم و لازم تخليها ترتاح لهذا السبب تجيك مطاطية من الاحسن تبلي العجين ملييييييح وتخليه يرتاح وكي تحبي ديري محاجب بلي العجين في الليل وهاذاك الصباح اعجنيه مليييييح وخليه يرتاح 10د من بعد كوري العجين نتاعك وزيدي خليهم يرتاحو لمدة ساعة على الاقل
نتمنى نكون افدتك

[نجمة ساطعة]

ملازمش تفشلي ديما حاولي حتى تنجحي

حسب خبرتي البسيطة جدا نقولك النصائح التالية...

عجينة المطلوع تختلف على عجينة المسمن ااو لمحاجب ... عجينة المطلوع لازم تكون مطلوقة شوية مش يابسة

و زيد كي تقرصي الخبز خليه يرتاح مليح و يطلع براحتو باش يجي مفشفش و الملح ما ديريهش في لول راه يبس العجينة

خليه في الاخير و ننصحك تستعملي طريقة الساشي تاع النيلو راهي تجيك عجينة طرية و مليحة

اما عجينة لمسمن تكون ناشفة شوية مش يابسة و لكن مشدودة باش كي ديري الزيت ما تتطلقش

و بالتوفيق ليك

[هبة الله اريج]

اختي من خطاك نستفيد شكرا

[كنت طفلة]

بالنسبة للمحاجب ننصحك باستعمال السميد لرطب ماشي الفرينة لكن من نوعية مليحة وحتى اذا اضطريتي ما تكثريش من الفرينة حتى الذوق السميد احسن

وتاني كيما قالولك

بعد ما تدلكي العجينة من دون تقطيع خليها ترتاح

و تاني كي تجي راح تحلي العجينة باه تطيبي شكليها كويرات كويرات و خليها ترتاح في بلا مدهون بالزيت و زيدي ادهنيها بشوي زيت من فوق و غطيها بغلاف بلاستيكي و اجبدي منها بالحبة

راهي تجري وحدها في الطابلة ان شاء الله

موووووووووفقة

[محبة الكتاب]

حسب الشوفة اختي راكي عجنتيها بالقسا وخليتيها قاسية على هكا تجيك مطاطية زيدي الماء بالشوي بالصح ماتطوليش معاها وهي قاسية لازم تكون طرية وكيما قالوا الاخوات وين تغطيها وتخليها ترتاح وين تطلع خير

[ام عبودة]

لازم تخلي العجينة ترتاح وما لازمش تكون يابسة
ودائما غطيها بساشي

[nadjwa mhamed]

شكرا يا أخوات أنا كنت نزيدلها الماء بصح تجرا ليا وما توليش صالحة للخبز هل ممكن اعطائي وصفة ناجحة للخبز و المحاجب مع بعض النصائح والملاحظات يعني كمية الماء الخميرة السميد أو الفرينة لأنو أنا نسعمل طريقة عينك ميزانك وكذلك ما الأحسن في تحضير الخبز طاجين الطين أو الفرن مع العلم أن فرننا يشتعل بالغاز ولا يمكن تحديد درجة الحرارة
هل اضافة الحليب بودرة والكمون حبة الهيل نجمة الأرض شيئ مليح وما هيى معايير استعمالها