لكل من تريد أن تفقد الوزن (تشيان) وصفة مجربة و بطريقتي

[walido2011]

السلام عليكم
اليوم جبتلكم وصفة شوربة الملفوف التي تفقد الوزن الزائد لكن عندي شوية نصائح بش ماترجعوش الوزن لي فقدتوه
بسم الله
المقادير :

رأس ملفوف كبير أو رأسين متوسطين الحجم
2 حبات طماطم
4 حبات فلفل حلو
6 حبات بصل أخضر
ربطة كرفس
6 فصوص ثوم
ملح،فلفل أسود،كمون،رأس الحانوت
الطريقة :

تقطع جميع الخضروات بأي شكل المهم أنها تنطبخ لأنه في الأخير راح نرحيوها كاين لي ياكلوها بلا مايوحيوها لكن اعععععع مشي بنينة يعني هي في الحقيقة هي ماتجيش بنينة لكن لازم تتحملو و ماتملحوهاش بزاف لأنوا يروحلها المفعول ،تديرولها الماء حتى تتغطى جميع الخضروات و نخلوها ما بين 45 و 60 دقيقة المهم تمسو الخضار وتشوفوها إلى طابت

هنا راهي طابت الخضار

ومن بعد نرحيوها

دوك نهدرو شويا على الريجيم أنا درت نوعين من الريجيم والحمد لله فقدت كل الوزن الزائد لي كان عندي الريجيم الأول هو :
القهوة تاع الصباح تشربوها عادي لكن بدون سكر أحملو شويا وتاكلو معاها بريوش أو كرواصون المهم مشي الحلوة
الفطور تاكلو وش طيبتو المهم مشي قليان و المشروبات الغازية و العصائر لي تتباع تنحوهم أثناء الريجيم وتاكلو طرف صغير تع الخبز 6 سم و بعدها تشربي كأس شاي بدون سكر و الشاي الأخضر المخصص لفقدان الوزن يدير 200دج تبعوني يفقد بزاف الوزن .
الشوربة تشرب 3 مرات بعد الظهر وفي أي وقت تحسون بالجوع لأنها تحرق الدهون تشربوها سخونة والشاي تاني 3 مرات وشرب كل يوم لتر أو لتر و نصف من الماء صدقوني الماء مفيد جدا في فقدان الوزن
العشاء ماكاش عشاء كل ما تجوعو أشربو الشوربة لأنه كل ماتشربون الشوربة و الشاي كل ما تفقدون الوزن .
لكن كاين فترة يتوقف الوزن عن النزول هنا لازم نبدلو ريجيم آخر و نروحو للريجيم الثاني و الي يتكون من الشوربة الأولى لكن فيه أشياء صحية و مافيهاش بزاف سعرات حرارية
شرط أنو في هذا الريجيم تاخذوا راحة و هي يومين فقط
والنصائح الأخيرة و الي دايما نأكد عليها إدا ماتبعتيش هاد النصائح ماكاله تبداو الريجيم من فضلكم و الي هي بعد ما تفقدو كل وزنكم الزائد إنشاء الله ما تولوش للعادات السيئة :
نقصوا القليان كولو مرة أو مرتين بالأكثر في الأسبوع القليان وبكمية قليلة
كملو أشربو الشاي بعد الأكل لأنه يساعد في عملية الهضم و حرق السعرات الحرارية
دايما قيصو الوزن في كل أسبوع و إيدا شفتي روحك زدتي ب كيلو أو 2 ديري ريجيم يومين أو 3 المهم تولي لوزنك الطبيعي
جربو مرة على مرة كي يكون كاين عشاء ثقيل ماتاكلوش ولا كولو سلاطة ولا خضرا مفورا
ماكاش الماكلا بين الوجبات الثلاث لأنه تزيد الوزن
والقهوة تع لعشية أسوأ وجبة في العالم يعني الجسم يحتاج لثلاثة وجبات وهاد الوجبة زيادة وتزيد الوزن يعني لوكان تنساوها خير
وهادي هي النصائح الي عاونتني بش ما وليتش للوزن الكبير الي كنت فيه و إنشاء الله مايوليش

بالصحة والهناء