كل واحدة تكتب كيفتش تعاقب ولادها

فراشات العمر · 2012-11-18, 16:01

السلام عليكم

حبيت كل ام تمد الطريقة لي تعاقب فيها ولادها وكيفاش تتصرف وتتحكم في اعصابها

sondse1 · 2012-11-18, 16:22

مساء الخير حبيبتي بنت خليل
كيف احوالك ان شاء الله بالف خير
انا في الحقيقة ما زالني انسة مازال م تزوجتش
مي ممكن نفيدك بطريقة عقاب ماما لينا
هي طريقة و الله فعالة و زيد ما تعتمدش على الضرب اللي معظم الامهات تعاقب به
احنا كي كنا غلطو في حاجة تنحيلنا حاجة عزيزة علينا و من بعد تقولنا الا اتسقمتو رح نردهالكم
و تاني تعتمد طريقة التحفيز و المكافئات
وهي انو مثلا تقولنا الا جبتو معدل كذا في هذا الفصل ليكم هدية كذا و كذا
وطريقة التنافس في اعمال الخير و والاقتصاد و اعمال البيت ايضا
مثلا وشكون اللي يقتصد اكثر و ما يبذرش مصروفو تزيدو في المصروف الشهر المقبل
و مثلا وشكون اللي يتصدق من مصروفو للفقراء او شراء مصحف او سجادة للمسجد
ومثلا وشكون اللي تكون غرفتو منظمة عندو كادو مليح .....الخ من الامثلة
ان شاء الله نكون فدتك ولو بالقليل
و اتمنى لبنات يزيدو يفيدوك و نستفادو معاك
بالتوفيق ليك حنونة

it's me · 2012-11-18, 16:38

غدوة الصباح على 10 حطي اذاعة قسنطينة تسمعي حوايج يفيدوك

نسيبة2012 · 2012-11-19, 00:05

ما نكذبش عليك عندي غير واحد راهو مهبلني ..................عاطياتو غير الفردة .........حبيت نبدل العقلية مي مازال ما هدانيش ربي...........ادعولي ربي يقدرني على تربيتو ..............

وفاء سعاد · 2012-11-19, 09:10

اختي بنت الخليل شوفي ماكانش احسن طريقة كي تحكي معاهم بالعقل وتجبديهم ليك بالحنان انا من قبل كنت دائما نعيط ونضربهم بصح هوما هوما مكان حتى نتيجة وكي وليت نتنارفى منهم نخرج من البيت ونتنفس مليح ونعاود نولي ليهم ونسمعهم علاش يتقابدو ومانعطي حتى حق لواحد لانها دمار نفسي لاولاد وندي كل واحد لبيت وحدو وهدر معاه على انه خاطيه ونعطيه يدير حاجة متلا تمارين وبالمكافئة يعني في الغد يدى مصروف زائد والصغير منهم نحطو في المىكرو يلعب والله احيانا حتى اقلق ونقولهم ارواحو نقعدو مع بعضانا المهم اختى بنت الخليل لازمك تنحي الضغط منك حتى تعرفي تتعاملي معاهم

ام ظافر · 2012-11-19, 15:01

ربي يقدرنا عليهم راهم صعابو بزااااف
انا نستعمل طريقة الغلق في غرفة منفردة لمدة تتناسب مع عمر كل واحد دقيقة لكل سنة من العمر وهكذا
ساعات تجيب نتيجة وساعات ما تجيبش
ونستعمل طريقة نزع حاجة عزيزة عليهم مثل خرجة اخر الاسبوع وهكذا هذي عندها مفعول مليح
ولكن الضرب ماعندوش اي فائدة غير انو يزيد في شقاوتهم

ommido · 2012-11-20, 14:27

شكرا لك أختي على الموضوع والله غير مشكل كبير كيفية معاقبة الطفل
أنا عندي طفل 4سنوات وبنت عام ونص عاملة في ادارة 8ساعات المشكلة هي غير نوض نقضي الأشغال المنزلية الطفل يضرب أختو بدافع الغيرة يقتلها وهنا أنا نتقلق بزاف عليه ونضربو مسكين أحيانا نتحكم في روحي نديرلو عقاب في دار وحدو مدة صغيرة باه يتنحالي الغش طريقة مليحة مي مش ديما نقدر نتحكم في روحي مع القلقة نتاع الخدمة والكثرة كي يضر أختو وساعات كي نكون نورمال مورالمون نحطو قدامي ونهدر معاه بالعقلية يفهمني لكن غيرتو من أختو هي المشكل الكبير

~ حراير ~ · 2012-11-20, 16:11

السلام عليكم و رحمة الله تعالى و بركاته
أختي بنت اخليل نحييك فعلا على إرادتك و همتك و عزيمتك في أنك تجدي حل لنفسك و انقولك أنه هاد هي أول خطوة في تصحيح طريقة تعاملك مع أبنائك و هي أنه تكون عندك الإرادة
قبل ما نجاوبك انحب نعلق على الأخت المشرفة و الأخت العاملة أنا كنت نعاقب ولادي نتركهم في غرفة وحدهم أو في ركنة و نعطيهم الوقت على كل سنة من عمرهم دقيقة عقاب يعني مثلا طفل عندو 3 سنوات نعطيه 3 دقايق عقوبة قاعد وحدو و امبعد نفهمو امليح على واش عاقبتو و هادي طبعا طريقة سوبر ناني..... و لكن تخيلو النتيجة كانت مش امليحة خلاص صارو وليداتي أنطوائيين و يخجلو و حسيت شخصيتهم تدمرت بعدما كانو ناشطين و يتكلمو مع الناس عادي صارو حشامين و يدرقو من ورايا
أيا وحد النهار بنتي مرضت اديتها لطبيب انتاعها كي العادة قالي وش بيها تبدلت و صارت تحشم قتلو مانعرف "و هي مرتو تعرفني و حكيتلها على طريقتي" في الليل لقيت مرت الطبيب كلمتني و قاتلي راهو ينصحك تحبسي طريقتك هاديك لأنه هاد الطريقة يديروها مع لولاد الميؤوس من أمرهم في القباحة ... و صرت و كأني نعاود نبنيلهم في شخصيتهم من دارى و جديد

بالنسبة لسؤالك قبل ما نقولك على العقوبة انحب انبهك للإيجابيات اسع يعني تديريلهم روح المنافسة تخدمي ورقة مزينة فيها واجباتهم اليومية نظافة الجسم ترتيب المنزل الدراسة "حتى الطفل تاع 4 سنين دخليه فيها" الصلاة مساعدة الأخ ، معاونة الوالدين
و توجدي شوية صرف عندك و شقاقة "أو شحيحة يعني الي نخبو فيها الدراهم و لو تصنعيها وحدك تجيبي علبة المايوناز تثقبيها من فوق و تزيني جوانبها بورق ملون"
و تلصقي الورقة بمساعدتهم يعني مثلا تسطري الخانات تاع الجدول و ولدك السنة الثانية يرسم وردة أو أشكال هندسية و يلونها خوه الصغير و خليهم يخربطو ماعليهش و كي يخربطو ماتنهيهش اضحكو اشبعو ضحك حتى بضحكة المهرج هاهاهاهيهيهيهييهوهوهوهوههو و امبعد كي تكملوها لصقيها في الفريجيدار بمساعدتهم راح يفرحو بيها كثير
و امبعد كل يوم في آخر النهار تقيميهم على كل واجب 1 دينار و اجمعيلهم الدنانير و اعطيهملهم
و تكونو متفاهمين تخبوهم في الشقيقة و في آخر الشهر يروحو يشرو قصة أو سيال جميل أو أي شيئ مفيد و ماتعطيهمش الدراهم يفسدوهم أبدا أنا بني عشرة سنوات عمري ماعطيتو فرنك يشري بيه
و حاجة أخرى كي تحبي تعطيهم جائزة ماتعطيهمش الدراهم ولا الحلوى راهو ضرهم أكثر من نفعهم أبداي بحوايج بسيطة "و هاد الكلام سمعتو من طبيبة نفسية في الإذاعة"مثلا
قبلة كبيرة ، عناق كبير، قصة، قلم جميل مثلا أنا كي نشريلهم سيال لماع يطيرو بالفرحة بيه و بنت أختي كي عطيتهولها رماتو و قاتلي هاد ماكان ؟؟؟.... أنا مانيش نبخل في ولادي و لكن نربي فيهم على عْقوبة الزمان يعني يعرفو كيفاش يتصرفو منا و جاي
و هاد الجدول و أي عقوبة لازملها الصرامة تبان امليح في عينيك يعني ماتبينيش غشك و قلقك و لكن بيني بلي راك صارمة و حازمة بالشوية راكي توالفي و يوالفو هوما تاني
راني طولت اعليك على هك خلي العقوبة لمرة أخرى

وفاء سعاد · 2012-11-20, 16:42

اقتباس:

المشاركة الأصلية كتبت بواسطة اريج المسك

السلام عليكم و رحمة الله تعالى و بركاته
أختي بنت اخليل نحييك فعلا على إرادتك و همتك و عزيمتك في أنك تجدي حل لنفسك و انقولك أنه هاد هي أول خطوة في تصحيح طريقة تعاملك مع أبنائك و هي أنه تكون عندك الإرادة
قبل ما نجاوبك انحب نعلق على الأخت المشرفة و الأخت العاملة أنا كنت نعاقب ولادي نتركهم في غرفة وحدهم أو في ركنة و نعطيهم الوقت على كل سنة من عمرهم دقيقة عقاب يعني مثلا طفل عندو 3 سنوات نعطيه 3 دقايق عقوبة قاعد وحدو و امبعد نفهمو امليح على واش عاقبتو و هادي طبعا طريقة سوبر ناني..... و لكن تخيلو النتيجة كانت مش امليحة خلاص صارو وليداتي أنطوائيين و يخجلو و حسيت شخصيتهم تدمرت بعدما كانو ناشطين و يتكلمو مع الناس عادي صارو حشامين و يدرقو من ورايا
أيا وحد النهار بنتي مرضت اديتها لطبيب انتاعها كي العادة قالي وش بيها تبدلت و صارت تحشم قتلو مانعرف "و هي مرتو تعرفني و حكيتلها على طريقتي" في الليل لقيت مرت الطبيب كلمتني و قاتلي راهو ينصحك تحبسي طريقتك هاديك لأنه هاد الطريقة يديروها مع لولاد الميؤوس من أمرهم في القباحة ... و صرت و كأني نعاود نبنيلهم في شخصيتهم من دارى و جديد

بالنسبة لسؤالك قبل ما نقولك على العقوبة انحب انبهك للإيجابيات اسع يعني تديريلهم روح المنافسة تخدمي ورقة مزينة فيها واجباتهم اليومية نظافة الجسم ترتيب المنزل الدراسة "حتى الطفل تاع 4 سنين دخليه فيها" الصلاة مساعدة الأخ ، معاونة الوالدين
و توجدي شوية صرف عندك و شقاقة "أو شحيحة يعني الي نخبو فيها الدراهم و لو تصنعيها وحدك تجيبي علبة المايوناز تثقبيها من فوق و تزيني جوانبها بورق ملون"
و تلصقي الورقة بمساعدتهم يعني مثلا تسطري الخانات تاع الجدول و ولدك السنة الثانية يرسم وردة أو أشكال هندسية و يلونها خوه الصغير و خليهم يخربطو ماعليهش و كي يخربطو ماتنهيهش اضحكو اشبعو ضحك حتى بضحكة المهرج هاهاهاهيهيهيهييهوهوهوهوههو و امبعد كي تكملوها لصقيها في الفريجيدار بمساعدتهم راح يفرحو بيها كثير
و امبعد كل يوم في آخر النهار تقيميهم على كل واجب 1 دينار و اجمعيلهم الدنانير و اعطيهملهم
و تكونو متفاهمين تخبوهم في الشقيقة و في آخر الشهر يروحو يشرو قصة أو سيال جميل أو أي شيئ مفيد و ماتعطيهمش الدراهم يفسدوهم أبدا أنا بني عشرة سنوات عمري ماعطيتو فرنك يشري بيه
و حاجة أخرى كي تحبي تعطيهم جائزة ماتعطيهمش الدراهم ولا الحلوى راهو ضرهم أكثر من نفعهم أبداي بحوايج بسيطة "و هاد الكلام سمعتو من طبيبة نفسية في الإذاعة"مثلا
قبلة كبيرة ، عناق كبير، قصة، قلم جميل مثلا أنا كي نشريلهم سيال لماع يطيرو بالفرحة بيه و بنت أختي كي عطيتهولها رماتو و قاتلي هاد ماكان ؟؟؟.... أنا مانيش نبخل في ولادي و لكن نربي فيهم على عْقوبة الزمان يعني يعرفو كيفاش يتصرفو منا و جاي
و هاد الجدول و أي عقوبة لازملها الصرامة تبان امليح في عينيك يعني ماتبينيش غشك و قلقك و لكن بيني بلي راك صارمة و حازمة بالشوية راكي توالفي و يوالفو هوما تاني
راني طولت اعليك على هك خلي العقوبة لمرة أخرى

اختى اريج والله كلامك عجبنى بزاف اا ايضا كنت مدمنة تفرج سوبر ناني والدكتور فيل واوبرا واي موضوع يتكلم عن تربية الاطفال وكنت نطبق زعمى تربية حديتة والله غير اولادي كي نحكى معاهم الان يقولولي ماما مكانش ام كيفك في الدنيا بصح علاه كنت تقفلي علينا في بيتنا بورتو كنت في هاديك الفترة مفهمتهم بالي راهو عقاب وكومام مانساوش راني نضم صوتي معاك واخطيوكم هده الطريقة وبالنسبة للمصروف راني معاك بصح انا باباهم ماقدرتش نقنعو راهو كل يوم مصروف حتى الاطفال اللي معاهم ضلو يقولولهم كيفاه حتان تديو كل يوم الصوارد

~ حراير ~ · 2012-11-20, 17:54

اقتباس:

المشاركة الأصلية كتبت بواسطة وفاء سعاد

اختى اريج والله كلامك عجبنى بزاف اا ايضا كنت مدمنة تفرج سوبر ناني والدكتور فيل واوبرا واي موضوع يتكلم عن تربية الاطفال وكنت نطبق زعمى تربية حديتة والله غير اولادي كي نحكى معاهم الان يقولولي ماما مكانش ام كيفك في الدنيا بصح علاه كنت تقفلي علينا في بيتنا بورتو كنت في هاديك الفترة مفهمتهم بالي راهو عقاب وكومام مانساوش راني نضم صوتي معاك واخطيوكم هده الطريقة وبالنسبة للمصروف راني معاك بصح انا باباهم ماقدرتش نقنعو راهو كل يوم مصروف حتى الاطفال اللي معاهم ضلو يقولولهم كيفاه حتان تديو كل يوم الصوارد

السلام عليكم و رحمة الله تعالى و بركاته
أختي لعزيزة وفاء ولادك بسلامتهم راهم كبرو و والفو بصوارد على هك بلاك تجيك شوية صعيبة باش تنحيلهم هاد الصنعة خاصة أنه راجلك ربي يهديه هو من يعطيهم فجربي بالشوية قوليلو و كانو من الرجال الي ماييحبوش نصيحة الزوجة "وهاد الشيئ مافيها والو كل واحد و طبعو" جيبيهالو بالعكس يعني قلو سمعت على طفل صغير في الإبتدائي و هو يتكيف في الدخان أو طفلة ضربوها و طيحوها على جال باش ينحولها دراهمها و قلو والله خفت على وليداتي أو قلو خفت عليهم من العين الناس كامل هازينهم بالفم و يقولولهم مني تجيبو في الدراهم ...يعني بي طريقة بدون ماتقوليلو مباشرة ماتعطيهمش يعني انت تعرفي راجلك و تعرفي كيفاش تهدري معاه ... أو حتى تستعيني بعجوزتك تقولو يعني أنا مانعرفش كيفاش عايشين المهم تعرفي كيفاش تسايسيه و تكلميه و كيما انقولو "كلمة الصبحة كلمة لعشية ترد المسلمة يهودية"
بالنسبة لوليداتك ربي يحفظهم جربي معاهم الشقاقة الي يخبو فيها الدراهم و خليهم هوما يشروها بالشكل الي يحبوه و باش تحفزيهم قلهم قد ما تحطو قد ما نزيدكم يعني كي يحط واحد خمسآلاف مثلا تحطي معاه نفس لمبلغ و زيدي حفزيهم قلهم وش حابين تشرو باش يكون عندهم هدف .... تعرفي أنا ابني الدراجة انتاعو شراها من الشقيقة تاعو رغم أني كنت قادرة نشريهالو وحدي ...و درك راهم مدايرين شقيقة جماعية باش يشرو اللعبة xbox في هاد الصيف
و حاجة أخرى اتسلفي من عندهم مثلا قلهم "بزربة باش تكلحيهم" ازرب ازرب "يعني اسرع" اعطيني شوية صرف باش نشري الخبز أو العصير أو أي حاجة و لكن بشرط ترجعيلهم ... و ساعات هاداك السلف رجعيه في الشقيقة و قولو راني كي كنت تقرا رجعهتهولك باش ما ننساش و هك بالشوية بالشوية حتن تروحلهم صنعة الصوارد و ضروري ضروري قبل المتوسطة لأنها هاداك لوقت اتحيري كيفاش اديري لأنهم درك راهم مازالو عجينة في يدك تقدري تشكليها كيما حبيتي

و كما قال عمر بن الخطاب رضي الله عنها سبع سنوات لعب و سبع سنوات تربية مالي ربيهم بأنك تفهميهم امليح كل ما تلقي الفرصة .... عموما بلا ما ننصحك راكي ماشاء الله عليك تعرفي تتصرفي امليح تقولك من نساء بكري ثابتة و رزينة ماشاء الله لا قوة إلا بالله

وفاء سعاد · 2012-11-20, 18:20

تعيشى اختي اريج على الرد انتاعك درك تقولنا بنت الخليل موضوعي ووفاء داتهولي شوفي انا اولا ماعنديش عجوزتي ماتت بسنوات قبل زواجي وزيد زوجى تربى في عائلة غنية جدا وعايشة انا معاهم في الفيلا ولكن كل وحده في طاجو وزوجي لديه مستوى ماجيستير في الالكترونيك يعني حاط روحو يعرف واش يدير وكي نقولو راك تفزد في الاولاد يقولي راني هكدا باه مانخليهمش يحسو بالفرق مع لافامي انتاعهم رغم انه اولادي فقط اللي يديو الصوارد وانا جربت الشقاقة وزيد والله راي دائما نقضى من عندهم الخبز والحليب بصح خفت يهزو نضرة علي ويعودو مايحترمونيش عدت انا ساعات كافئهم بالصوارد بصح راهى عجبتني الفكرة انتاعك تاع الدخان والطفلة يضربوها الاولاد راهو راجلي يخاف من هادو الامورات اليوم نبدا نحكيلوعلى هداالامر وربي يسهل ان شاء الله وشكرا كتيرا اريج راني نحسك متل اختي الحقيقية اواكتر

أم ياسين الزهراء · 2012-11-21, 08:23

شوفي حنونة ولادي الاولين دوق عمرهم 19 و20 الله يبارك نعاقبهم نحيلهم حاجة عزيزة ولا مايسهروش ولا نحيلهم العشاء اذا دارو حاجة كبيرة والان واش نقلك وليدي الصغير عمرو 4 سنين هو اللي يعقبني ماتحيريش طاحت بي ولا انا اللي كبرت ولا 00000000000000 مانعرف تبدل الحال

فراشات العمر · 2012-11-21, 10:24

شكرا جزيلا لكل واحدة
لما فلقت على ولدي الصغير راح تبول في الارض واش ندير جيت نعافبو عاقبني راني حائرة والاخر يخاف من الوحدة وليت خفت من الصرع ونولي في حاجة اخرى..........
ولادي لعبهم عنيف ولد اختي يناديلهم المدرعون ههههههههههههههه
حركيون بزاف بزاف نجرب الطربقة نتاع اختي اريج ونشوف رغم اني متاكدة لي ما نمدلوش الصوارد راح يحاول بخرب كل شئ

أم شيماءْ · 2012-11-22, 11:01

السلام عليكم نشكركم على هذا الموضوع المفيد
انا عندي بنتين وانا عصبية بزاف طريقة العقاب عندي هي الضرب حاولت كثيرا نحي هذه العقلية بصح مقد رتش
مع العلم ان بناتي صغار وحدة 7 سنوات واخرى3 سنوات

ام ظافر · 2012-11-22, 11:04

طريقة العقاب مثل ماقالت الاخت عنها ممكن عندها مساوء ولكن انا لما نعملها لاولادي اولا نادرة جدا لان ولادي بسلامتهم معروف عنهم عاقلين عند الناس اما في البيت يهبلوني ولهذا نغلق عليهم غرفتهم لمدة زمنية محدودة في النور وزيد راني حاكمة الباب بيدي يعني لما يحب يخرج ما يقدرش لانو عارف بلي راني وراء الباب مباشرة وحاكمة المقبض يعني عندهم احساس بلي ماراهمش وحدهم بل امهم معاهم ولكن بيناتنا باب فقط واولادي الحمد لله تنفع معاهم بمجرد ما نقول لواحد روح الغرفة واغلق على نفسك يروح وهو مطأطأ الراس بدون نقاش مدة ولما ناديه يخرج يضحك
في الفترة الاخيرة لاحظت انهم كبرو على هذه العقوبة وما عادتش تاثر فيهم لذلك نستعمل عقوبة عدم الذهاب للعب مع الاصدقاء في الحي وراهي تجيب في نتيجة حاليا
اماقضية المصروف راني نحاول نأجلها قد ما نقدر على الاقل للمتوسط ومن بعدها ربي يفرج