pain au lait بريوش وصفة أصلية راااااائع بالخطوات المصورة من مطبخي

oum anas 69 · 2013-09-30, 16:58

بسم الله الرحمن الرحيم
والصلاة و السلام على رسول الله عليه أفضل الصلوات
اليوم عندي ليكم وصفة بريوش رائعة و أصلية هش و خفيف ريشة و لذيذ جدا غير متعب و طريقته سهلة تبعو معايا :

500 غ فرينة
ملعقة أكل خميرة الخبز
10 غ ملح = 1 ملعقة قهوة و نصف إلى 2 ملاعق
70 غ سكر عادي = 3 ملاعق أكل و ممكن تزيدي إذا حبتيه حلو بزيادة
2 بيض كاملين
100 زبدة أو مارقرين طرية بدرجة حرارة المطبخ
180 إلى 200 غ حليب سائل = كاس ناقص أصبع يعني كاس مش معمر دافئ
قطع شيكولا لحشو البريوش أو حبيبات نخلطوهم مع العجين كي نجو نشكلوهم
جولي للمعان و للتزيين فارميسال ملونة أو مكسرات مدشدشة

التحضير نعجن المقادير كلها ماعدا الزبدة حتى نتحصل على كرة

ثم نضيف الزبدة مقطعة و طرية و نعجن حتى تختفي تماما و تكون عندنا عجينة مطاطية ملساء و رطبة و جميلة

تبانلكم جارية بصح هي لالا شوفو كي نلمها بشوية فرينة مالازمش تجي يابسة

نكورها و نغطيها تخمر كيما الصورة لمدة ساعة إلى ساعتين حتى يتضاعف حجمها جيدا

هنا إختمرت

ممبعد بيدي نهبطلها الخميرة و نغطيها و ندخلها الثلاجة مدة ساعة

هنا زادت خمرت بعد ساعة ضرك نبداو نشكلوها

نقسموها كريات صغرة نحشوها بقطعة شيكولا أو تخليهم بدون حشو
أو تضيفي حبيبات الشيكولا للعجينة و تتحصلي على بريوش بحبيبات الشيكولا مممممم

هنا نوريلكم تزيين

أدهنيهم بالبيض أنا خلاصلي إستعملت حليب +قطرات فانيليا + قطرات زيت و دهنت و زينت بحبيبات السكر و اللوز إفيلي

عاودي خليهم يخمرو مليح في المطبخ حتى يتضاعف حجمهم ثم أدخليهم الفرن يطيبو من تحت ثم شعليلهم من فوق يحمارو

حذاري راه يطيب بسرعة ليس مثل الخبر غير تشوفوه حمار من تحت هبطو السني للتحت و شعلو من فوق

ندهنه بشوية جولي للمعان أو ديري كيما أنا سخنت شوية معجون و دهنت الوجه و ممكن تزيني كيما لي يتباع بالفارميسال الملونة و هذا شكله

خفيف خلااااااااااااص ممممممم

نتمنى تجربوه و يعجبكم لأنه راااااائع و جيد جدا للأطفال كي يخرجو من المدرسة راح يعجبهم كثيرا و تتهناو من شراؤه خطرش شوفو الله يبارك 500 غ فرينة دارتلي 13 حبة
دعيوة خير تكفيني و إتظروني في وصفات أخرى للبريوش الأصلي بإذن الله
تقيدو بالخطوات جيدا و خاصة وقت التخمير مهم جدا لنجاحه موفقين

حبيباتي لي ماعندهاش العجانة تقدر تستعمل يدها عادي بنفس الخطوات فقط لازم العجينة تبقى طرية جدا باش يجي خفيف