سلفتي

[مشكلتي]

والله ياحبابي درك حتى الدموع اللي باش تنحيلي على قلبي ماحبتش تجي
عندي سلفتي ماكان بيناتنا والو رحتلها مرة وقامت بينا ماشاء الله وكنا نتلقاو في دار شيخي ثان ماشاء الله
مانقدروش نروحو لبعضانا لنه ظرو فها وظروفي ماتسمحش
وفجاة تغيرت اخر مرة رحتلها كثر خيرها وبعد تلاقينا في دار شيخي ماهيش حاملتني
ولدت انا وطهرت ولدي ودرت عملية لولدي حتى تليفون ماكانش
حرت
عيطلها بعد عامين قلتلها واش كاين قالتلي غايضني الحال كي نتلقاو نقلك عرضتهم لداري ماحبوش يجوني دارو سبة تافهة وماجوش طريق مكسرة وهي مشي مكسرة
تلاقينا وكيما قالتلي نقلك واش كاين لقيتها هازة روحها عليا جبدت روحي
ولدت عيطت نبارك ليها هزت عليا مرت خوها وقالت لي راهي في التواليت قلتلها بعد نعاود عاودت لقيت البورتابل مقفول
غاضتني عمري
درك فليكسيت وقلت نعيط باه نقلها واش كاين
عيطت باركتله وهدرت عادي
قلتلها مانيش نحتم في روحي عليك لكن قوليلي واش كاين وكل واحد في حاله
قالتلي انا مانقلكش هدرتي فيا ولا ماهدرتيش لانه ماتربيتش على القيل والقال
قلتلها لقيت البورتابل مقفول قالتلي كبيرة ونعرف صلاحي انا لبورتابل مانقفلوش ووووووو
قالتلي احنا ماكاين والوة والنار تشعل بيناتنا
مافهمتش واش تقصد
وهدرت معايا بطريقة هازة روحها عليا حتى اني ندمت كي عيطت ونشوف فيرو حي ماعندي حتى قيمة مع العلم انه هي مستوى ترمينال ولنا متخرجة من الجامعة
وانا بيا صلة الرحم على ولادي وراجليمع خوه اللي هو زوجها
مانعرف هل غلطت كي عيطت ولالا
مافمتش واش بيها وواش درتلها
مع العلم انها برانية وواحد مايقدر يتصل بيها غير بيت شيخي شكيت كاش ماقالوها
راني نشوف في روحي مانسواش

[أم عبد النور]

السلام عليكم


أختي مادام راكي تقولي مغلطتيش فيها وهي جابدا روحها

انت ما تعامليهاش بمثل وخلي كلش ربي والأيام كفيلة بتصحيح الأوضاع

تحياتي

[nasser26]

أختي والله العظيم بطريقتك هذه وتفكيرك في وصل الرحم انتي الان اعظم درجة منها وتسواي خير منها
والله حسيت بالراحة انو مزال كاين الخير كاين لي يخمو كيفك الحمد لله
انتي اوصليها وتكلمي معها عادي وتجاهلي طريقتها معك وان تكبرت عليك فاعلمي ان درجتك عند الله تكبر بتكبرها
كوني كما أوصى خير الانام محمد صلى الله عليه وسلم بصلة الرحم وان قطعوك وهنيئا لكي الاجر من عند الله

[khadidja1988]

يا ودي ما تقلقي روحك ما والو راه الناس كل عادو كيما هكدا وديري في بالك الناس لي كيما هكدا كيما ايقولو جماعت الرياضيات كلما هزو رواحهم نقصوا في القيمة

[oumhana]

راكي مليحة انا لوستي عندها ما قطعت فيا ومع هذاك كنت نروح بصح اخيرا وصل الموس للعظم و مرحتش لعندها فلعيد بحكم هي لكبيرة عليا وعلى زوجي المهم هو راح بعد أيام هدرت معايا بنتها تقولي كنا نعسو فيك فالعيد لو كان جيتي لولوكان حاوزناك سلم يا ربي سلم على صله الرحم .صله الرحم هكذا ولا ميشقاش مع العلم انا جبدت روحي من كثرة المشاكل و في كل مره نقول معليش في خاطر صله الرحم اما كلحقت دخلت للسبيطار قلت على الأقل نجبد روحي باه مجيش على صحتي.المهم انت كتكوني صافيه مع ربي خليها نهار تتكاكا مع روحها هي لتولي ليك متعمريش راسك خاطر إذا لحقت للصحة تولي تقولي خلي العالم كل يتكبر و ينفخ روحو عليا المهم صحتي.والسلام مراكيش وحدك لتعاني هذ التصرفات.

[لمعة السيف]

وعليكم السلام
بارك الله فيك اختي احييك على اخلاقك وعلى قلبك الكبير والذي يكسوه البياض ونادرا ما تجد هكذا قلب واحساس...
فالتستمري هكذا بطريقتك التي حسب شكواك وكلامك اثبت انك عندك اخلاق رفيعة ليس المستوى الشهادة الدنيوية التي
تجعل الانسان ذا اخلاق بل الاب والام المدرسة الاولى هي الامتحان الاول من تختبر اخلاق البعض ..ولهذا عندما نجد بعض الناس كلامهم فظ وتصرفاتهم غير لائقة من التكبر والتعجرف وشايفين حالهم اكثر من لازم وكأنهم هم افضل من غيرهم ..وحينما نصادف امراة من هذا النوع والصنف .. نقول مباشرة هي غير متربية ووالديها لم يربوها وان كانت عندها افضل الشهادات ...
في الحقيقة اختي سلفتك ليست من صلة الرحم اي ان لم تصليها لا تؤثمين لان العلماء قالو ان لم تقم الزوجة بزيارة أهل زوجها فلا يلحقها إثم قطيعة الرحم ؛ لأن أهل الزوج ليسوا من أقاربها – إن لم يكن بينها وبينهم نسب حقيقي - وصلة الرحم إنما تجب للأقارب فقط مثل الاب والام وليس لغيرهم من الأصهار والأصحاب .
قال النووي رحمه الله :
" قال القاضي عياض : اختلفوا في حد الرحم التي تجب صلتها ، فقيل : هو كل رحم محرم بحيث لو كان أحدهما ذكرا والآخر أنثى حرمت مناكحتهما .
ولكن مرعاة لزوج واهل الزوج حتى لا يعتقدون ان زوجة ابنهم لا تحبهم لهذا من الاحسان ان تزورهم وتحبهم وتعطف عليهم ..لكن سلفتك اظهرت تكبرا وترفعا عنك بعد اتصالك بها وتواضعك لها رغم اني لا اعلم ماهي الحقيقة الكل يظهر انه مظلوم ونحن نحكم حسب الشكوى ..فليس عليك ان تصليها واليكن بينكما السلام فقط درءا للمفسدة والشجار والقيل والقال ..ولكن هذا لايعني انك
تعاديها بل ان صادفتها وإلتقيتما عند اهل زوجك فقابلي الاساءة بالحسنة ..واعلمي انك على حق لانك كنت متواضعة وراعيت جانب الصلة اهل زوجك وهذا من الاسلام ..

[عاشقة العلم والمعرفة]

الله يعينك اختي بصح انت عارفة روحك ماراكيش غالطة اذا ربما ابتلاء من عند الله وان شاء الله يعوضك خيرا اصبري واحتسبي وعسى انتكرهوا شيئا وهو خير لكم
باين انك انسانة محترمة ومتخلقة ولو كان ما كنتيش هكا كون ما لمتيش نفسك ربي يبارك فيك ويهدي سلفتك وا يكون غير الخير ان شاء الله

[وردة حياتي]

سجليها في الجامعة تولي نفس المستوى تاعك ؟؟؟؟؟

[محمد جديدي التبسي]

هذي سلفتك ماش أختك أو صديقة عمرك فلم كل هذا؟!!
لا تبحثي عن تكسار الراس واحسني لرحمك وقرابتك ويكفيك هذا

[مسلمة انا]

بما انو كانت عادية معاك ثم تبدلت مرة وحدة فاغلب الظن هناك من نقل لها كلام سواءا قلتيه او كذبزا عليها
اهم شيئ المواجهة لان الامر يبدو كبير
روحي ليها على غفلة هذاك الوقت لازم تستقبلك واعطيها جواب مباشر وكوني قوية في سؤالك لها حتى لا تتهرب
واخبريها انك لا تريدين معرفة من نقل الخبر حتى تطمئن وتصارحك

اذا كنتي قلتي الكلام فاعتذري لها وان لم تقوليه برئ نفسك
هنا تكوني اديتي ماعليك ان احبت ان ترجع كما كانت فاهلا وسهلا واما اكملت في جفاءها فلا خير في اناس لا تنسى الماضي وتقف على الزلة

[hodahodahoda]

اختي اشتري ما امكن و حاولي زوجك ياخذك عندها و اقطعي عليك اللوم
بادري الى الحسنى من اجل زوجك

[كاميلا]

المشاركة الأصلية كتبت بواسطة محمد جديدي التبسي

هذي سلفتك ماش أختك أو صديقة عمرك فلم كل هذا؟!!
لا تبحثي عن تكسار الراس واحسني لرحمك وقرابتك ويكفيك هذا

كيما قال الاخ
المهم انتي درتي اللي يمليه عليك ضميرك انت متعمريش راس راجلك وولادك بيها خليهم يحتارموها وميقطعوهاش لاشتات انتي وليتي متحبيش تروحي مع انني انصحك بعدم القطيعة بصح خففي عودي روحي للضرورة عرس مرض موت لا قدر الله بهذه الطريقة درك تستخزي روحا
عمتي كانت ايضا هكذا وبمرأى من عيونا لكن امي ارغمتنا على احترامها وبالفعل كل ما شافتوا عمتي تيقنت ان امي مكانش كيفها ولات تقول لوكان مزوج ابوكم بامكم لكان ضاع هي احسن اختيار ودركا ولينا لاباس وظهرت باللي عمتي الثانية هي اللي كانت تشعل فيها هههههه وتحتم على عمتي الثانية انها تبع عمتي وخلصت الحكاية
اتبعي نصيحتي ومتعمريش راسك بيها المهم متكسريش راس راجلك وولادك بيها

[سلمى انا]

مادا تقصدين : هي مستوى ثارمينال وانت متخرجة من الجامعة ؟؟

الاخلاق لاتقاس بالمستوى التعليمي

جيل اجدادنا كانو احسن ناس في الاخلاق والتربية والعطف والحنان واحترام الاخر

ربي يصلح لحوال بيناتكم

[أم عابد]

متقلقيش روحك ، انت لي عليك ديريه و ربي يجيب الخير

[مناد بوفلجة]

السلام عليكم و رحمة الله

القراءة لمشكلتك فقط تكفي لمعرفة سبب عداوتها لك ، و هي إحتمالين

و هي إما أن تكون النميمة

يعني : أكيد يوجد شخص قد قام بإيصال لها كلمة أو إهاانة أو شيء من هذا القبيل لــ سلفتك

و على حسب ما تحدثتي ، سلفتك هاذيك عندها عزة نفس كبيرة ، و لا تحاول التأكد عندما يصلها خبر ما
و تشعر بــ الإهانة و ربما أنها خلال تلك السنوات ، ربما سنة كاملة لم تنام

لهذا ، حاولي مراجعة نفسك مع من كنت تتحدثين

و من هو الذي كان يمكنه التنقل بينكما

و إن أردتي أن تعود المياه لمجاريها

حاولي أولا التأكد ، لربما قد أصدرتي خطأ دون قصد

و قامت ربما حمامة نمامة بنقل ذلك مع بعض العقاقير و التوابل لسلفتك

في هذه الحالة ، عليك الذهاب لها حتى لو إضطررتي أن تكري حافلة " كورسة "
و وضحي لها الأمر و إعتذري لها

أما إن لم تخطئي ولا مرة في حقها و لم تقولي و لا كلمة فيها
لأي كان ، حتى و لو كان أقرب الأقربين لك

فحاولي أيضا مواجهتها وجها لوجه لمعرفة ما السبب و لتوضيح الأمر لها

يعني في كل الحالات ، يجب عليك مواجهتها وجها لوجه

و ليس التحدث في الهاتف ، لأن ذلك يعتبر بالنسبة لسلفتك ، الإعتراف بالخطأ في حقها
و رايحة تقول : راكي هاربة و ما حبيتيش تواجهيها ، خاصة و أنك قلت أنه لمدة سنتين و أنتما متخاصمتان
و هي مدة طويلة تثبت التهمة عليك ، طبعا بالنسبة لها


و الإحتمال الثاني ، ربما تهاونك عن مباركتها في أمر ما أو مناسبة ما ، و بالتالي شعرت بأن قيمتها سقطت في الأرض و هي بهذا تحاول رد الإعتبار
فأنا أعرف شخصين نشأت بينهم عداوة بسبب أن الأول لم يحضر لجنازة أحد أقارب الثاني
و كانت مطالبة الثاني هو رد الإعتبار
و في هذه الحالة دوما أيضا ، مواجهتها وجها لوجه

و ربي يصلح القلوب