العيد

[مشكلتي]

عندي 3 سنين زواج ونسكن وحدي من عادات دار راجلي نعيدو في الدار الكبيره كل واحد يدبح شاته في دار عجوزتي راجلي عنده اخوه بزاف 2 ساكنين مع يماهم و3 ساكنين وحدهم وانا منهم......هي لمة العيد شابه بصح راني نكره منين ندبحو كل واحد يبدى يعس في شاته ويقول هادي دوارتي هادا بوزلوف نتاعي......انا والله ماعندي هاد العقليه ..انا نعاونهم في الدبيحه ونتغدى عندهم ونروح لدار بويا....ونخلي شاتي عند عجوزتي حتى يقطعها راجلي في الليل ويجيبها ....بصح سلافاتي قافزات يدو كامل الدواره والشاه لديورهم ...ويقولولي نتي جايحه تروحي وتخليلهم شاتك....عييت مع راجلي وقتلو نعيدو في دارنا خير ماحبش ....العام الي فات قسمت مع عجوزتي دوارتنا قاتلي شدي دوارتكم (بالتشناف).......راني نكره العيد في دار عجوزتي .حابه نعيد في داري كيفاش نقنع راجلي ......انا مارانيش مكراشه ..راني نكره لي جاست الي يديروهم ويبقاو يعسو في الدبيحه نتاعهم ...واش رايكم

[مياسم الصمت]

السلام عليكم ورحمة الله وبركاته
طيب اختي ان كانت ربما والدة زوجك تحب تجمع اولادها في يوم العيد
وعلاه تمنعي الامر باستثناء زوجك
ما تكوني شاذة على المجموعة وترجعي انت الغالطة في نظرهم

هو نهار ويعدي
ومادام انت ما عندك تلك العقلية اللي عندهم
خليهم وعقلياتهم

ياخي بوزلوف بوزلوف كيف كيف

وحتى الدوارة ما رايحة تفرق

خليهم اللي قالت لي هذي درواتي قولي لها بصحتك هاهي ليك
وهني راسك من تكسار الراس وما تمرضي روحك وتفسدي فرحة العيد على روحك
وعلى زوجك ربما

[الصديق قروف]

رايي انتي ثاني غالطة
معندك مديريلهم اصبري على وجه راجلك
‏ انتي ميعجبكش الحال راجلك عاجبلو بين ماليه

[sarl02]

هذا عيد الرحمة والصدقة ...والاضحية في هذا العيد للصدقة بالدرجة الاولى ماشي للشجار من اجل دوارة وبوزلوف هذو من المفروض ما تحكوش عليهم نهائيا...هذا اللحم لا يجب ان يتجاوز 48 ساعة في البيت وهذا هو المطبق عندنا الله يهديكم.

[hanatendresse]

كيما دكروا الاخوة و الاخت العيد للفرحة ماشي للدواس و الشجار بلاك راهم يديروا فيك هكدا بالعاني و باش تنطقي و تخرجي ظالمة قدام زوجك يعني يستفزوك و فكرة انك تعيدي في داركم و يخلي يماه لا يقبلها اي جزائري و ماكالاه تدبري علي زوجك تدبار فيما يخص عائلته والا راح تطيحي في عينيه و نصيحة نهار العيد تزيني و خلي الابتسامة ما تفارقش و حتى والا قالولك الشاة طارت ابتسمي و خليهم ترى نهار و فوت و بالاك تربحي العيب على جال دوارة
سلام

[ManouraHilwa]

انا راني فاهماتك عندي نفس المشكل انا احاول ان اقنع زوجي باش انعيدوا في بيتنا والله يجيب الخير وهي المشكل انت ماكيش شارحاتوا مليح ربما صدقيني المشكل في الكلام اللي راكي تسمعيه من عندهم بالمباشر وبغير المباشر ولو اخذوك عن طيبة خاطر انت تعطيلهم كل اللحم وانت فرحانة بصح الاخوة ما يقدروش يفهموك الله يهنيك اكثري الاستغفار والمشكل 2 انو الدواة والزليف ماتقدريش تصنعيهم بالحجاب واخوة زوجك طالعين هابطين الرسول صلى الله عليه وسلم اوصانا على الحجاب وما اوصانا على مكان الذبح الله يهدينا ويهدي ازواجنا وان شاء الله كل امراة تعيد في بيتها كرهنا من مسايرة التقاليد على حسابنا الخاص ماتنسايش صيام ال10 من ذي الحجة

[El Montaser]

العيد لربط صلة الرحم لا لقطعه

[zineb_saib]

اذبحي في دارك وادي قسمة عجوزتك وروحي ليها لعشية مافيها حتى مشكل تاني العجايز راهم دايرين قصة على الذبيحة ومكبرين الموضوع
نورمالمون كل واحد يذبح في دارو ولعشية يتلاقاو وعلاش تكسار الراس
والا معليهش نهار ويعدي

[~ دروب الخير ~]

اختي عادي جداااا ، الكثيير اللي كيفك اصبري و كيما قالو نهار و يفوت و اذا داولك حقك خليها على ربي
ربي يفرجها عليك

[النجمة القطبية]

مفهمتش يا اختى واش من دوارة واش من بوزلوف العيد اصﻻ معمول للصدقة ومدام اهل بيتك عايلة كبيرة خليهم يدو على راحتهم ولك اﻻجر
افرحى يا حبيبتى باجر صلة الرحم واللمة واجر التعب والعمل والمساعدة زيديلها اجر الصدقة والمغافرة يوم العيد
ودعى عنك اى افكار تعكر مزاجك
انا عندى خالتى متزوجة منذ سنوات تذبح عند عجوزتها وتخلى الشاة كاملة مكملة ﻻ تاخذ منها شئ اﻻ ما تفضلت بها عليه
على اعتبار ان عجوزتها تتكفل بالصدقة رغم ان زوجها يشرى شاتين واحدة لها وواحدة ﻻمه
ورغم ذلك عمرى ما سمعت منها شكوى
افرحى العيد فرحة وفرحى وﻻدك وابشرى
صح عيدك مسبقا

[سماح 2]

ربي يهديكْ ,, ختى ,, ع جال حاجة هكــآ ,, خلي ديوه كـآمل الكبش ,,والله ايامات ماتزيدش تتعاود خلاه جاي نهــآر ويروحوا الكبار ويتفرق السوق وتعيدي وحد في دارك مع ولآدك وتتوحشي اللمة ,,

مــآلآ كبري عقلكْ ,, وعيشي حياتكْ ,,وربي يسهلكْ ان شاء الله ,, =) سلآمْ ,,

[anissa90]

قنعت زوجي هذا العيد ان شاءالله نعيد في داري لانوا شاف تصرفات امه و اخواته البنات في بالهم العيد للاكل نروح حتى اجوز كلش العيد للفرح مش لدواس و تشناف

[imanewafa]

اسمحيلي بصح كلامك ما يبينش بلي انت شبعانة . علاش تشوفي لسلافاتك . واش فيها كي تدي عجوزتك الدوارة اذا تحبها مديهالها انت مشي تقولي اداتلي منها .انا والله العظيم راني مخلوعة في مواقف بعض الزوجات تجاه اهل الزوج . عيب الوحدة تهدر في اهل زوجها . هو نهار او جايز او زيد قلتي تروحي لداركم ما تجوزيش حتى النهار معهم.

[زهرة الحديقة]

ربي يفرج عليك

[alyassin]

ان كيدكن عظيم ,,,,,,,,,,,,,,,,,,,,,,,لو كنت مكان زوجك لاوجعتك ضربا ,,,,,,,,,,,,,,,,,,,,,,


اتقي الله .,,,,,,,,,,,,,,,,,تريدن ان تفرقي عائلة من اجل وساوس شيطانية و نفسانية تدور في ذهنك ,,,,,,,,,,,,,,,,,,,,,,,,,,,,,,,,,,,,,,,,,,و ما ذا تساوي الدوارة و البزلوف و الاضحية كلها بالمقارنة مع صلة الرحم التي تريدين قطعها بين زوجك و اهله ............................

اقول لك الله يهديك ,,,,,,,,,,,,,,,,اتقي الله في نفسك و انضمي في صف العائلة و لا تكوني سببا في ابعاد زوجك عن اهله او خروجه عن طاعتهم و لو كان ذلك على حساب المال او الكبرياء المذموم ................