مشكلتي الصغيره

[مشكلتي]

انا اعلم ان زيارة اهل الزوج واجبه...انا شيخي متوفي وعجوزتي ساكنه مع بنتاها غير متزوجات......ولكن لاحظت في الاخير ان اهل زوجي لا يرحبون بزيارتي مرات يدهبون ويتركونني وحيده في بيت الصالون لااعرف لمادا ..مره جيتهم انا وسلفتي قالولنا ديرو العشاء (انا ماعنديش مشكل في هادي نضنا درنا العشا)...مرات كي نجيهم اخوات زوجي يخرجو....مرات كي نجي وتشدني عجوزتي للعشا اخوات زوجي يديروه بالزعاف......كرهت كل ما يقولي راجلي يالله نروحو لدارنا ..نتحجج باي حاجه ..وكي يسيف عليا نقوله داركم ماراهمش يجمعو معانا...مانيش غير انا قاع السلفات يتعاملو معاهم هكا...وليت نقوله نروحو لداركم بشرط نقعدو غير شويه ونروحو...يزعف يقولي نتي قاع ماتحبيش دارنا...واش ندير ..المشكله انهم يحبوني بصح معاملتهم في الزياره تغضبني ولكن انا مانبينليهمش ...ايلا راهم حابين مانزوروهمش يقولوهالنا....والله انا كي يجوني نرحب بيهم ونفرح ودايمن نشدهم للعشاء او الغداء

[بربرية و أفتخر]

اختي صح عندك الحق تزعفي و تنفري من زيارتهم
و لكن لا تتوقعي ان يصدقك زوجك
لانه ماهوش قاعد معاكم اثناء الزيارة باه يشوف بعينيه
اصلا حتی و يشوف مش راح يفهم
الحمد لله انت لك سكنك الخاص
تحمليهم يخي راهو غير عشا ولا غداا
زيارة قصيرة و تفوت و الزوج نتاعك يروح فرحان بيك
تحملي علی خاطرو
فهو يحب ان يری اهتمامك بهم لان حبك لهم يعتبر من حبك له
تحملي و خلاص
و حاولي ماتداوسيش معاهم او تبينيلهم
المهم تفوت الزيارة بسلام. و ترجعي لدارك انت و زوجك متفاهمين
وسعي بالك بارك
ربي يصلح بيناتكم

[ManouraHilwa]

انت على الاقل يجوك انا لا يزوروننا الا اذا عرضناهم وزوجي واولادي يداومون على زيارتهم وانا ازورهم مرة في الشهر وعندما ادخل اعلق حجابي في باب المطبخ والبس المئزر تاع الكوزينة وانا في المطبخ وبعد يومين ياتي زوجي ياخذني من المطبخ وكذلك سلفتي الاخرى ونسمع ما لا يرضينا بصح اعامل الله فيهم واحتسب الاجر من الله وارمي ما سمعت وراء ضهري والله المستعان

[houssem zizou]

ربما من صفات أخوات زوجك أنهم يتثاقلون من الضيف أصلا
أنت إذهبي إرضاءا لزوجك لا إرضاءا لهم و اصبري على أذاهم

[أثيلة]

ربي يعينك اختي العزيزة

[*سيرين نور عيني *]

كاين عباد و الله غير مايفهموش وش تديري ادعي ربي يعطيك الصبر و العقل

[الواثق]

بلا زعاف انا لا اصدقك او بالاحرى هناك شيء لم تتكلمي عنه وهو مربط الفرس في القضية ..........النساء راهم مصايب تجي الكنة تزوخ وتفوح وتعمر الدار روانب تخلي خوتات الرجل يكرهوها وتشعل فيهم النار .....وتعرفي الغيرة متوفرة في كل مكان ..............وزاد التقلاش والتمعني هذ الامور تخلي التريسيتي بين النساء وان وصلو ال 70 من العمر ...................لهذا ارجعي الى معاملتك وشوفي الشيء لي خلاهم يكرهوك .........وزاد مادام مكانش مناوشات وانت واش ضاعلك فيهم ؟؟؟.....اكرميهم وابتسمي في وجوههم وانتهى الامر ............والله المستعان

[أموله]

ربي يكون معاك

[ابتسام smile &hope]

اختي الكريمة هناك حل جربته الكثيرات ووجدنهه ناافعا انه الهدية والتواضع في اللباس
يعني كل ماتروحوا ضياف وصي راجلك يقضي ويعمر القفة ويقول فلانة وصاتني
واديمن تفكريهم يالوكان بديودورون تاع150دج
وفي العيد ديلهم سنيوة قاطو وجبات باش يعيدو
هاكا يولو يموتو عليك
مرة زوج ثلاثة حتى يبداو يتبدلو
الرسول صلى الله عليه وسلم وصانا بلهدية
وكي تكوني في جماعة هدري عليهم فالخير وقولي عليهم فحلات وشاطرات و تحبيهم كثر مخوااتاتك ...............الخ (باش توصلهم الهدرة)
ومرة على مرة ادوهم معاكم يحوسوا
واذاقدرتي سعاي باش تزوجيهم
وماتحكيش لراجلك على معلاملتهم ليك

بالنسبة للهدايا نعرف وحدة كانو دار راجلها مايحبوهاش بصح غلبتهم بالكادوات والمعاملة الطيبة

[لؤلؤة تلمسان]

السلام عليك ورحمة الله وبركاته

اختي في الله نصيحتي لك بالصبر قليلا وتحمل اهل زوجك ( اخواته خاصة ) لامرين :

1) فقد تفضلت بالقول انهم يحبونك

2) كذلك قلت ان اخواته غير متزوجات ، ربما هن اكبر منك او اكبر من ( بقية السلفات) وهن يتحسسن من هذا او يغرن وهذا حقهن ان تاخر نصيبهن ...

فحاولي يا اختي كسب ودهن و تصرفي وانت عندهم كانه بيتك ومازحيهن و لا تنسي ان هدية او كلمة طيبة قد تكسبك ودهن و يصبحن يجلسن معك لوقت اطول بل طول تواجدك عندهن


ولا تحرجي زوجك بقولك لا اذهب فمهما كان هن اخواته وسياتي يوم قد يضجر من كلامك و تصبحين مخطئة ولن يابه لتذمرك بعد ذلك ولو كنت صائبة ....

وفقك الله و اسعدك واهلك

[زهرة الحديقة]

اختي قابلي السيئة بالحسنة انتي واش خاسرة على 4 ساعات ولا 5 ما فيها والوا احكي معاهم كي ينوضوا للكوزينة روحي معاهم لتم واحكي معاهم احكي مع غيرك عليهم بالخير اعطيهم هدايا وقوليلهم اعلم انها اقل من مستواكم بصح لاجل دوم المحبة وباه نعبر عن حبي ليكم وشوفي كيفاه يوليو معاك ... وما تهدريش مع زوجك عليهم غير بالخير باه ميكرهكش و ما يكرهش من تدمرك ...... موفقة

[فاطمة الزهراء 29]

السلام عليكم

مثل ما قالولك الاعضاء انتي قابلي السيئة بالحسنة و اصبري عليهم

ربي يفرج عليك