انقعي الكمية لي راح تخلليها في كمية من الماء و اضيفيلو الملح بلا ما تقشري البصل لازم يتغطا البصل بالماء وديريلو صحن من الفوق باش ما يبقاوش الحبات طافيين الفوق و اكيد لازم ما يكونش فيه حبات راح يفسدو و خيري الحبات الصغار و غطي الاناء و خليه يوم كامل.
من جيهة جيبي كومبراس و ديري فيها عودان قرفة على حساب الكمية نتاع البصل مثلا كيلو ديريلو 2 عودان قرفة +1/2 م زنجبيل مطحون + 1م كسبر حب + 2 ورقات رند + حبات طيب + 1/2 م فلفل احمر و تغلقي عليهم و تحطيهم في اناء نتاع زجاج او فخار و تضيفي كمية من الخل و كمية من الماء و الخل يكون اكثر
مثلا 2 ك خل + 1 ك ماء و 2 م ملح و تخليهم منقوعين 24 ساعة بعد ما تغطي عليهم بغطاء نتاع زجاج او فخار يعني ما تستعمليش الحديد و لينوكس لانهم يتفاعلو مع الخل و يخسرلك البصل بسرعة.
من غدو حطيهم في كاسرونة و خلي يغلو 15 د على نار هادئة و خليه يبرد.
و جيبي البصل نتاعك و قشريه و مبعد شليه و خليه ينشف
و جيبي البلارات لي راح ديري البصل فيهم عقميهم بلا ما تمسحيهم و حطي حبات البصل و لوحي الخليط نتاعك و اغلقي و خليهم في الثلاجة الى حين الاستعمال.