على ابواب الزواج و مانعرفش نطيب

chica loca · 2013-06-23, 16:48

السلام عليكم اخواتي .
حبيت نطرح مشلكلتي رغم انو ماشي ها دا مكانها

انا عمري 18 قريب 19 سنة هاد العام جوزت الباك
ماما من الصغر مدلتني ( ياريتها ما دللتني )
كبرت و مانعرف ندير والو
جامي دخلتني الكوزينة و قاتلي ديري حاجة و لو بسيطة
كبرت و انا على هاد الحالة
ضركا عندي 2 نسا خاوتي معانا فالدار ( دارنا كبيرة و الافراد أيضا)
كي نجي داخلة للكوزينة نلقا كل وحدة فيهم حاكمة خدمة و انا ما نلقا ما ندير الطبيخ كامل عليهم
و حشمت باه ندخل نتعلم قدامهم .. علابالي راخ نغلط بزاااف و طبعا ما نقدرش نتحكل انهن يضحكو عليا
مالقيتش كيفاه
الخطابة عند الباب
نتاجاتب و لي صغار عليا يعرفو يطيبو
ختي صغيرة عليا بـ 8 سنين في عمرها 11 سنة تعرف خير مني ..ماما كي شافت حالتي بدات تعلم فيها على الصغر
و انا كي ندخل و مانعرفش حاجة ولا نغلط تبدا تعاير فيا قدامهم كامل
...والله حابة نتعلم و نكون ربة بيت
واش ندير
و كي نشوف كاش حاجة فالنت و نجي نديرها لازم نلقا حاجة ناقصة و يقوقولي ماديريهاش

واش تنصحوني .... لازم نتعلم في اقرب وقت

ladymillion · 2013-06-23, 16:58

Chica loca
مالا مازالتي chicita ماعليش أنا كنت قدك بديت نتعلم الطبخ ومافيها والو أختي أدخلي وأتعلمي قدام نسا خاوتكم وعلاه يضحكو واحد مازاد وهو متعلم وابداي المأكولات السهلة البسيطة مافيهاش بزاف مكونات أبداي بالحلويات السهلة كيما المسكوتة .... وبشوي تتعلمي كلشئ حبيبتي وأي حاجة حابة تسقسي عليها تفضلي ولازم في رمضان الكريم تغتنمي الفرصة وتدخلي تتعلمي

كونان الجزائرية · 2013-06-23, 17:01

لازم تزدمي و تخلطي حتى و اذا كانت النتائج غير مرضية

لكن مع الوقت رايحة تتعلمي

اميرة في دنيا حقيرة · 2013-06-23, 17:13

حنونتي متتقلقي ما والوا الطياب راهوا ماهوش حاجة لي جامي صرات بالشوي الشوي درك تتعلمي مزالك صغيرة و وعلاه تحشمي من نسا خاوتك ولاه هوما ولدوا من كروش ماتهم متعلمين حتى هوما كلاو البخس ليمن شبعوا باه تعلموا

و زاد التعلم مافيش احراج حتى كان بخساتك يماك راهي في مصلحتك درك تكبري و تعودي في دارك و تفهميها

انا كنت نقرى في الجامعة منكدبش عليك حتى انا كنت دلوعة العايلة بصح نعرف نطيب حوايج خفاف ما القواطوا والالطياب الكبير لا هههههههه

و كي تزوجت والله العظيم في الدار تعلمت وحدي بصح منحشمش كي نروح لدار عجوزتي حاجة منعرفهاش نقول منعرفهاش ونتعلمها ووليت الحمد لله بصح مزال نتعلم وكلنا وامهاتنا كلهم يبقاو يتعلموا و في التعلم كاين وقت متصلحش الحاجة والله غالب من اخطانا نتقنوا الحاجة نحي عليك تفكير انوا متعلمش باه متنبخسش قدام نسا خاوتي بالعكس كوني فخورة ونتي تتبخسي ههههههههههه

و حطي في بالك حتى هوما ياما تبخسوا تعلمي حنونتي و حنا هنا في المنتدى وانا اولهم حطيني اختك واي حاجة حبتني نعلم هالك نقولك مكانش مشكل تبعي المنتدى و تشوفي تولي خير منهم

noussa_94 · 2013-06-23, 17:19

يبدو أنني لست الوحــــــيدة :d

مريم الصابرة · 2013-06-23, 17:21

السلام عليكم
انا كنت كيما إنت بطاطا ومان عرفش نقليها يحكم كنت نقرا وأختي اصغر مني قعدت فالدار هي دير كل شي وتعرف طيب وانا والو من بعد لما عولت ندير مرة نكحلها ومرة نعميها مي ضرك تعلمت كل شي ووحدي من الكتابات ومن جاراتي نسقسي وندير ووليت في رمضان نقعد قدام يمى ونشوف ولما تخرج نجرب بلاما نقلها وهكذا وليت ندير كل شي
بالشوي تتعلمي والله يبارك المنتدى فيه اطباق روعة عولي وإبداي تتعلمي منو انا شخصيا جربت انواع كثيرة منو ونجحت الحمد لله موفقة

إلهام07 · 2013-06-23, 18:26

نصيحة أدخلي توالنا لقسم واش طيبتي اليوم واختاري أطباق سهلة واطرحيلنا أسئلة رايحين نعاونوك كامل ونبقاو معاك حتى تولي شاف
https://www.djelfa.info:8080/vb/showt...334623&page=12